Têke Woho Wa Mbeya Anangɛso
1 Bible mbutaka ɔnɛ ɔngɛnyi w’oshika mbekesanɛka l’onto ndeka ɔnango; lɔngɛnyi lande ndo kɔlamelo yande hayotshikitana, ndo nde atokimanyiyaka wonyande lo nshi ya pâ. (Tuk. 17:17; 18:24) Hatotohomba angɛnyi wa ngasɔ l’atei w’etshumanelo naka sho ntsha la wolo dia mbeyana ndo mbokana ngandji l’asaso.—Joa. 13:35.
2 Sho kondjaka waaso w’ɛlɔlɔ wa mbeya anangɛso dimɛna la ntondo la l’ɔkɔngɔ wa nsanganya. Lande na kahaye k’ɔlɔmɔ ndo tshikala yema l’ɔkɔngɔ woho wa sawola l’ananyɔ la wangasanu na? Sawoya ananyɔ efula, djekoleko wanɛ waya esombe, wambohokɔ akambo efula, ɛlɔngɔlɔngɔ kana akina wele ɛsɔnyisɔnyi.
3 Tatɛ la Sawo: Aha mbisha onto mɔyɔ oto lam’atayete ko pe. Wɛ kokaka tatɛ sawola la nde lo tɛkɛta dikambo dimɔtshi diakete l’esambishelo, kanyi mɔtshi ya dimɛna yotshiwɔ lo periodikɛ keke katomba kana yakawatshi lo losanganya l’oma la shila. Wɛ koka mbeya awui efula wendana l’ananyɔ lo mbâlonga ɔlɔlɔ, mbâkeketsha dia vɔ kɔkɔndɔlɛ kɛnɛ kakawɛnyi ndo kotɛ awui wekawɔ. Naka wɛ mumbola onto tsho woho wakandeye Jehowa, kete nde ayokotɛ awui efula. Amɔtshi wakete l’atei w’ekakatanu wakakeketsha mbetawɔ kawɔ, koko akina wekɔ lo mbikikɛ akambo wa mamba ɛlɔ kɛnɛ wahatakoke fɔnya kânga yema. Lam’ayoteya akambo asɔ, tayotsha oko angɛnyi w’eshika weya ehomba w’anto akina ndo tayowakimanyiya.
4 Tôkanake Kandji L’asaso: Kadiyɛso kɛmɔtshi kaki oma la mvusha yana yande ya yimato akokaka wolo memba esambu wa Diolelo watɛkɛta di’eolwelo. Nde ekɔ lo mbohɔ ate: “Lushi lɔmɔtshi, kadiyɛso kɛmɔtshi kakadjasɛ l’okala lo wedi okina akamɛnyi lalela. Nde akaye suke la mi, akadinge lonya ko akembe la mi tshenyi y’osambu akɔ yakatshikala. Lakokaka analengo ngandji k’efula ndo lakangɛnangɛna efula woho wakatatshu lo losanganya, nɛ dia lakɛnaka dia lɛkɔ, lo Mbalasa ka Diolelo, mbakondjaso ekimanyielo.” Sho la dia ngɛnangɛna anangɛso lo mbâkeketshaka wonya tshɛ wewɔ l’ohomba w’ekeketshelo.—Heb. 10:24, 25.
5 Etena kɛnɛ kataleke andja w’omusu ɔnɛ tɔsɔkisha, tɔshi yɛdikɔ dia mbeka woho wa mbeya anangɛso dimɛna. Sho tshɛ tayɔtshɔkɔmaka lam’ayotokeketshanaka l’otema ɔtɔi lasaso.—Romo 1:11, 12.