Vɔ Pombaka ‘Mbetawɔ Ɔtɛkɛta L’otema Ɔtɔi’!
1 Miliyɔ y’anto wekɔ lo mbeka Bible l’Ɛmɛnyi wa Jehowa. Naka vɔ nangaka monga anto wasungana dia kondja lɔsɛnɔ la pondjo, kete vɔ pombaka ‘mbetawɔ ɔtɛkɛta l’otema ɔtɔi,’ oko akatshe anto 3 000 wakakadimula etema ndo batizama lushi la Pɛntɛkɔsta ka l’ɔnɔnyi 33 T.D. (Etsha 2:41) Naa ɔkɛndɛ wele laso ɛlɔ kɛnɛ lo dikambo sɔ na?
2 Sho la dia kimanyiya anto weka la so Bible dia vɔ mamema Jehowa. (1 Tim. 4:7-10) Lo dikambo sɔ, dikatshi di’okotsha di’Olimu Aso wa Diolelo wa Ngɔndɔ k’Esambele 1996 mbishaka dako nɛ l’odingɔ 20: “Lo wekelo w’otondo, yanga waaso wa wɛ keketsha lowando [l’ombeki] otsha le Jehowa nɛ dia waonga ande. Ɛnya ngandji k’oma k’ɛse otema kokayɛ Nzambi. Kimanyiya ombeki lo nde kana yimba lo woho wakokande monga la diokanelo lasande la Jehowa.”
3 Okakatanu Wahomana Laso: Anto efula wasɛngiyama l’ɛtɛmwɛlɔ wa kashi, ngɛnangɛnaka woho ɔmɔtshi w’ɔtɛmwɛlɔ wahawaɔsɛ wenya efula, wahâlɔmbɛ mbidja weolo ndo hawonyi tshima vɔ tshikitanya nsɛnɔ yawɔ tshɛ. (2 Tim. 3:5) Le so, okakatanu wele laso ele wa kimanyiya wanɛ weka la so Bible dia shihodia ɔnɛ ɔtɛmwɛlɔ wa mɛtɛ mbâlɔmbaka awui efula oleki monga paka ampokami ato w’ɔtɛkɛta wa Nzambi. Vɔ pombaka kamba la kɛnɛ kekawɔ lo nsɛnɔ yawɔ. (Jak. 1:22-25) Naka dui dimɔtshi diendana la lɔkɛwɔ lawɔ hadiɔngɛnyangɛnya Nzambi, kete vɔ la dia mbeya ɔnɛ vɔ pombaka ‘sekesɔ’ ko ntsha kɛnɛ kele ɔlɔlɔ dia mbɔ̂ngɛnyangɛnya. (Etsha 3:19) Dia kondja lɔsɛnɔ la pondjo, vɔ la dia ‘mbidja weolo wa mamba’ ndo mbeta la sɔlɔ wedi ɔtɔi.—Luka 13:24, 25.
4 Etena kasɛdingolanyu weho wotshikitanyi wa lɔkɛwɔ, mbola onto leka layɛ Bible nganɛ wɔsande akambo akɔ mɛtɛ ndo kɛnɛ kahombande ntsha naka nde ambɛna dia nde pombaka tshikitanya lɔkɛwɔ lande. Kotola yambalo yande otsha l’ɔlɔngɔswamelo, oma lɛnɛ atomba akambo wa mɛtɛ wekande dia nde mbɔtɔka lo nsanganya tshɛ.—Heb. 10:25.
5 Toyadje oyango wa mbetshaka ambeki lo yoho yananda etema awɔ. Tayonga l’ɔngɛnɔngɛnɔ lo tshutshuyaka eyoyo dia vɔ mbetawɔ ɔtɛkɛta wa Nzambi l’otema ɔtɔi ndo batizama.—1 Tes. 2:13.