Woho wa Mbetɛ Anto Ambeki l’Ekimanyielo ka Dibuku Ewo
1 Akristo tshɛ wekɔ l’oyango wa dimɛna efula wa ndakanya akina mɛtɛ ndo mbetɛ wanɛ ‘wakoka kondja lɔsɛnɔ la pondjo’ ambeki. (Etsha 13:48; Mat. 28:19, 20) Dia tokimanyiya, ɔlɔngɔswamelo wa Jehowa akatosha ehomɔ ka dimɛna efula: dibuku Ewo Katɔla Otsha lo Lɔsɛnɔ la Pondjo. Ɔtɛ adiɔ a dui mbikaka epole ɔsɛkɛ l’ohomba wa lânde wa mbeka l’anto Bible lawakawɔ. Mɛtɛ, dia kondja lɔsɛnɔ la pondjo, pombaka mbeka dia mbeya Jehowa, Nzambi ɔtɔi ka mɛtɛ, la Ɔnande, Yeso Kristo.—Joa. 17:3.
2 Kakianɛ, dibuku Ewo mbaya okanda waki la Société wahombaso kamba la wɔ lam’etshaso anto Bible la ngelo. Oma l’ekimanyielo kadiɔ, sho kokaka ndakanya mɛtɛ aha l’okakatanu, lo yoho yokɛma hwe ndo lo tshena pe. Kɛsɔ kayotokimanyiya dia minanda etema wa wanɛ walakanyaso. (Luka 24:32) Mɛtɛ, ekɔ ohomba dia ɔnɛ letsha onto kamba la toho t’ɛlɔlɔ ta wetshelo. Diɔ diakɔ diakalɔngɔswama dikatshi di’okotsha nɛ l’oweso wa mbisha tokanyi la waohwelo w’endana la toho ta wetshelo takɛnama ɔnɛ tekɔ amɛna efula. La shɛnɔ ndo lo ndjela akoka aso, tayokoka mɛtɛ kamba la tokanyi tɔmɔtshi l’atei a tɔsɔ yema yema, kânga kamba latɔ tshɛ. Tômbe dikatshi di’okotsha nɛ ndo katodialake tena efula. Diɔ diekɔ l’akambo wotshikitanyi wayokoka tokimanyiya dia sho monga tomanamana lam’akambaso la dibuku Ewo dia mbetɛ anto ambeki.
3 Têtsha Onto Bible lo Yoho ya Nde Pama: Shamɛ toyasha le ombeki l’otema ɔtɔi, lo mbɔ̂saka oko ombeki w’Okristo ndo oko ɔnangɛso ɔmɔtshi kana kadiyɛso. Tônge la wangasanu, la lɔngɛnyi ndo l’ohetoheto. Naka tekɔ ampokami wahokɛ lotui, kete tayeya onto akɔ—woho wakinde ntondo ndo nganɛ wende lo lɔsɛnɔ—kɛsɔ kayotokimanyiya dia mbeya woho woleki ɔlɔlɔ wa mbôkimanyiya lo nyuma. Tônge suke dia ndjasha tshɛ di’ɔlɔlɔ w’ombeki.—1 Tes. 2:8.
4 Naka wekelo amboshikikɛma, kete ndeka ɔlɔlɔ sɛdingola totshapita ta dibuku Ewo l’ɔnɔngɔ. Ngasɔ mbayokoka ombeki mpotɔ mɛtɛ yema yema, nɛ dia dibuku diakɔ mɔmbɔlaka akambo wele lo Bible l’ɔnɔngɔ. Sala woho wa wekelo mongaka wɔdu ndo ɔlɔ, dia vɔ pɛtahɛta ndo ntshɔ otsha la ntondo. (Romo 12:11) Lo ndjela akambo ndo akoka w’ombeki, ondo nyayokokaka sɛdingola efula ka totshapita takɔ, tshapita tshɔi lo yɛdikɔ y’oshidi a tango ɔtɔi, aha la mbeka lowango lowango. Ambeki wayohama efula naka ombetsha ndo vamɛ nɛmiya randevu wa wekelo wa lomingu tshɛ. Ondo lâsɔ ayokoka mbeka l’efula k’anto totshapita 19 ta dibuku diakɔ lo yɛdikɔ ya ngɔndɔ shamalo.
5 Nyotatɛke wekelo tshɛ l’elembetshiyelo wa lo hiembola wayokotola yambalo y’onto l’awui wayonyeka. Nyayɛna dia ɔtɛ wa tshapita tshɛ mbele dikambo diayolembetshiyama l’etei ka tshapita yakɔ. Ɔtɛ a dui wahɔnyi tshɛ sɔtɔlaka dikambo dimɔtshi di’ohomba, kɛsɔ kayonyokimanyiya dia nyu kimɛ ɔtɛ a dui wa tshapita. Tanyɔtɛkɛtake efula. Koko nyosale tshɛ dia tshutshuya ombeki lo nde tɛkɛta. Lo mombolaka wembola w’eshika ndo wahomba mbɔlɔmbɔla, lo ndjela kɛnɛ kambondoshila la mbeya, nyayowokimanyiya dia nde kana lomba ndo kondja wetshelo w’ɔlɔlɔ. (Mat. 17:24-26; Luka 10:25-37; Enda lo Manuel pour l’École, lɛkɛ 50, od. 10.) Nyoyele alako wele lo dibuku Ewo lo nna ndo lo nna. Naka nyu mbidja elembetshiyelo ekina, kete nyayotshika tokanyi toleki ohomba kana tidinyadinya, ko wekelo wayotatalɔka tsho. (Joa. 16:12) Naka dimbola dimɔtshi diahɔtɔnɛ la dikambo diekanyu diambombwama, tena efula nyu kokaka ndjodikadimola l’ekomelo ka wekelo. Dikambo sɔ diayonyokimanyiya dia tetemala la wekelo wa lomingu longo aha tonda lɛnɛ tonda lɛnɛ. Nyewoya ombeki ɔnɛ nde ayokondja okadimwelo lo efula ka wembola ɛsɔ lam’ayonyotekaka.—Enda lo Manuel pour l’École, lɛkɛ 94, od. 14.
6 Naka ombeki ekɔ lo mbetawɔ Losato l’Osanto l’eshikikelo tshɛ, ndo ɔnɛ anima havu, ifɛrnɔ wekɔ kana mbetawɔka wetshelo ekina wa kashi ko olembetshiyelo wele lo dibuku Ewo hakoke le nde, kete wɛ kokaka mbosha dibuku Comment raisonner kana okanda okina watɛtɛka dikambo diakɔ. Ewoyande ɔnɛ nyayoyodisawola l’ɔkɔngɔ wa nde kana yimba lo kɛnɛ kayondala.
7 Lo tatɛka ndo kumiyaka wekelo la dɔmbɛlɔ woho wa nyanga ɛlɔmbwɛlɔ ka Jehowa, tayɔsa etena kakɔ la nɛmɔ ndo onto l’onto ayodja yimba la nɛmɔ, tadja Jehowa la ntondo oko Ombetsha wa mɛtɛ. (Joa. 6:45) Naka ombeki âkanɔ mfɔka, ondo ayonga ohomba mbɔ̂lɔmba di’aha nde nnɔ wonya wekanyu.—Etsha 24:16; Jak. 4:3.
8 Tolakanya Dimɛna Efula l’Ekimanyielo k’Afundelo, ka Diɛnyɛlɔ ndo Wembola w’Ovuswelo: Oyadi kânga tambeka awui akɔ mbala efula: ombetsha wele la yewo ayovusolaka wekelo tshɛ la ntondo, akanyiya akoka w’ombeki l’ombeki. Dikambo sɔ diayowokimanyiya dia nde mbekamɛ ombeki lo wembola ɛmɔtshi wayondokoka mboka. Dia ndakanya dimɛna efula, hotɔ atshina w’akambo wa lo tshapita dimɛna. Yanga avɛsa dia menda lo na endanawɔ l’awui wekama ndo sɔna wanɛ wayâlema wonya wa wekelo. Kanyiya dimɛna woho wakokayɛ ndakanya l’ekimanyielo k’esato ndo ka wembola w’ovuswelo wele l’ekomelo ka tshapita.
9 Lo kambaka l’Afundelo dimɛna efula, wɛ ayokimanyiya ombeki dia nde mbeya ɔnɛ mɛtɛ nde ekɔ lo mbeka Bible. (Etsha 17:11) Nyokambe la kiombo yata ɔnɛ: “Ekesanɛ la Bible Kayɛ Dimɛna,” lo lɛkɛ 14 la dibuku Ewo, dia mbêtsha woho wa tana avɛsa. Ɛnyande woho wa nde mbeya avɛsa woshilami lo tshapita. Naka etena kekɔ, nyoyange ndo nyâle wanɛ wofundiwɔ tsho koko wahashilami. Mbola ombeki dia nde nembetshiya nganɛ wasukɛ kana wokiya avɛsa asɔ kɛnɛ kata odingɔ akɔ. Tɛtɛ lo tenyi di’ohomba dia avɛsa dia ombeki mboka ohomba w’atshina w’akambo wa tshapita yakɔ. (Neh. 8:8) Hatongaka ohomba dia ombetsha kotsha avɛsa akina lo wonya wa sawo lâdiko wa wanɛ wele lo dibuku. Lembetshiya ohomba wa mbeya nkombo ndo woho wahɔnyi abuku wa lo Bible. Ondo ayonga ohomba ombeki mbala Tshoto y’Etangelo ya Mam’ɛkɔngɔ la Tange 15, 1991 (lo Falase), lɛkɛ 27-30. L’etena kasungana, ɛnya ɛlɔlɔ wa kamba la Traduction du monde nouveau. Wɛ kokaka mɛnya yema yema woho wakokande kamba l’awui atɔ wa lânde, oko avɛsa woshami l’asa ndjelo hiende ya lo lɛkɛ la lɛkɛ ndo index des mots bibliques.
10 Wekelo 34 wa Manuel pour l’École du ministère théocratique mɛnyaka ɔnɛ diɛnyɛlɔ kana wɛdinyelo sokoyaka onto lo nde kanyiya ndo kimanyiyaka dia mboka tokanyi t’eyoyo esadi eto. Diɔ mbishaka onto yimba la nsaki, ko losango totamaka la wolo ɔmɔtshi wele ɛkɔndɔ w’akambo watshama ato hawodja. (Mat. 13:34) Dibuku Ewo diekɔ la diɛnyɛlɔ efula dia ndakanya, dia wɛɔdu koko nkudu. Ɔnkɔnɛ sho tanaka lo tshapita 17 ɛnyɛlɔ kɛmɔtshi katosokoya dia monga la lowando lo woho watosha Jehowa, lo yoho ya lo nyuma, mbo ya ndɛ, ahɔndɔ ndo ekokelo lo tshimbo y’etshumanelo k’Akristo. Asango w’amɛna w’alangi wele lo dibuku Ewo kokaka kambema dimɛna efula dia pɛtshahɛtsha nsaki y’anto. Lam’asɛdingolaso ɔtɛ a dui woyedi wata ɔnɛ: “Eolwelo k’Ɔngɛnɔngɛnɔ” lo lɛkɛ 185, odingɔ 18 ayonga la shɛngiya mɛtɛ le ombeki naka nde menda sango diele lo lɛkɛ 86. Ondo dui sɔ mbeyaka mbôsokoya dia nde mɛna dia eolwelo ekɔ dui dia mɛtɛ diayosalema lo Diolelo diaki Nzambi.
11 Pombaka ambeki wa Bible pama lo nyuma lo wekelo tshɛ. Diɔ diakɔ diele tohɛke mumbola wembola w’ovuswelo wele lo kiombo yata ɔnɛ: “Hemba Ewo Kayɛ” yatanema l’ekomelo ka tshapita tshɛ. Longamɛ efula oleki nde mbeya awui wakanyeke la yimba ya mukanda tsho. Wembola ɛmɔtshi l’atei awɔ wekɔ l’oweso wa sokoya onto dia nde mbisha okadimwelo ande ndamɛ. Oko ɛnyɛlɔ, enda lɛkɛ 31, lɛnɛ ambolawɔ ombeki ɔnɛ: “Waonga akɔna waki Jehowa Nzambi wakɔngɛnyangɛnya lo woho wa lânde na?”—2 Kor. 13:5.
12 Nyolakanya Ambeki dia Vɔ Ndjalɔngɔsɔlaka dia Wekelo: Ombeki watâdiaki awui wayonyeka, fundaka ekadimwelo ndo kanyiyaka woho wokokinde mbakadimola l’ɛtɛkɛta ande ndamɛ ayohama esadi eto lo nyuma. Oma lo ɛnyɛlɔ kayɛ la ekeketshelo kawoshayɛ, wɛ kokaka mbêtsha woho wa nde ndjalɔngɔsɔlaka dia wekelo. Ɛnyande dibuku diayɛ, lɔnɛ akayekɛ eshidi la bikɛ kana la markɛrɛ la tshina dia wetelo la ɛtɛkɛta w’ohomba efula. Ɛnyande woho wa tana ekadimwelo mbala kakɔ ɔtɔi lo wembola wofundami. Wɛ kokaka kimanyiya ombeki naka wɛ nɔngɔsɔla la nde tshapita mɔtshi. Keketshande dia nde mbuta l’ɛtɛkɛta ande ndamɛ. Ngasɔ oto mbokokiyɛ mbeya ɔnɛ nde ekɔ lo mboka mɛtɛ akambo wekanyu. Naka nde ambâla okadimwelo lo dibuku, wɛ kokaka mbôtshutshuya lo nde kanyiya naka wɛ mombola nganɛ wayondolembetshiya onto okina kanyi shɔ l’ɛtɛkɛta ande ndamɛ.
13 Keketsha ombeki dia nde nyanga avɛsa wahashilami lam’ayalɔngɔsɔlande lomingu la lomingu, nɛ dia ondo hanyotonga l’etena ka mbala avɛsa akɔ tshɛ wonya wekanyu. Andolande lo weolo wadjande lo nɔngɔsɔlaka wekelo ande. (2 Pet. 1:5; enda lo Tshoto y’Etangelo ya Loseketanya 15, 1993 (lo Falase), lɛkɛ 13-14, lɛnɛ atanaso tokanyi tokina lo kɛnɛ kokoki sala oyadi ombetsha kana ombeki dia nde mbeka dimɛna efula lo wonya wa wekelo wa Bible.) Ngasɔ, ombeki mbekaka woho wa ndjalɔngɔsɔla dia nsanganya ya l’etshumanelo ndo lo mbisha kɔmatɛrɛ y’amɛna. Nde ayeka woho wa monga la mbekelo y’amɛna ya wekelo w’onto ndamɛ; ngasɔ mbayondonga l’akoka wa tetemala la pama lo mɛtɛ lam’ayoshila wekelo ande wa Bible lo dibuku Ewo.—1 Tim. 4:15; 1 Pet. 2:2.
14 Tɔlɔmbɔlɛ Ambeki Otsha l’Ɔlɔngɔswamelo wa Jehowa: Wanɛ wetɛ anto ambeki wekɔ l’ɔkɛndɛ wa nɔmbɔla ambeki otsha l’ɔlɔngɔswamelo wa Jehowa. Ombeki ayotatshundaka esadi esadi lo nyuma naka nde mbeyaka ndo ngɛnangɛnaka ɔlɔngɔswamelo wa Nzambi ndo naka nde mbeyaka ohomba wa monga lɔkɔ. Sho kombolaka dia nde ngɛnangɛna mbɔtɔnɛ l’ekambi wa Nzambi ndo ndjâla la saki ka monga la so lo Mbalasa ka Diolelo, lɛnɛ ayondotokondja ɔsukɔ wa lo nyuma ndo wa lo lɔkɛwɔ oma le etshumanelo k’Akristo.—1 Tim. 3:15.
15 Biukubuku Les Témoins de Jéhovah — Unis pour faire la volonté de Dieu sur toute la terre akatondjama dia kimanyiya anto dia vɔ mbekesanɛ la tshɔi yakɔ y’ɔlɔngɔswamelo wakamba Jehowa la wɔ nshi yaso nyɛ dia kotsha lolango lande. Naka wekelo amboshikikɛma, bonde kahatasha ombeki miɔtshi? Oma ko tatelo, elɛ ombeki tena la tena oya lo nsanganya. Tɛ̂nde woho wasalemayɔ. Wɛ kokaka mbosha ɔtɛ a dui wa dako dia mbala kekina kana mbɛ̂nya sawo diayɔsɛdingolama lo wekelo wa Tshoto y’Etangelo. Ondo wɛ ayokoka mbɛ̂nya Mbalasa ka Diolelo etena kele losanganya bu, dia kitshakitsha wɔma wokande wa ntshɔ mbala ka ntondo lo dihole diende heye. Aha la tamu wɛ kokaka mbɔsɛngɔla dia ntshɔ la nde lo nsanganya. Lam’ayondoya lɛkɔ, ngɛnyangɛnyande, dia nde mboka ɔnɛ wambôlongola dimɛna. (Mat. 7:12) Lowolande le Ɛmɛnyi ekina, kamɛ ndo le dikumanyi. Tambolongamɛ dia nde ayomɛ mbɔsa etshumanelo oko nkumbo kande ka lo nyuma. (Mat. 12:49, 50; Mako 10:29, 30) Wɛ kokaka mbodjɛ oyango ɔmɔtshi wa nde kotshaka yema yema, oko mbɔtɔ lo losanganya lɔmɔtshi lomingu tshɛ.—Heb. 10:24, 25.
16 Lam’atatetemala wekelo lo dibuku Ewo, tɛtɛ lo tenyi diaka epole ɔsɛkɛ l’ohomba wa ntshɔ esangɔ tshɛ lo nsanganya ya l’etshumanelo. Lembetɛ djekoleko lɛkɛ 52, 115, 137-139, 159, kamɛ ndo tshapita 17. Ɛnya ɔlɔ w’omaka tshina di’otema wa lowando lele layɛ wɛmɛ otsha le ɔlɔngɔswamelo wa Jehowa. (Mat. 24:45-47) Tɛkɛta ɛtɛkɛta wa lokumu lo dikambo di’etshumanelo kanyu ndo kɛnɛ kekanyu lo nsanganya. (Osam. 84:10; 133:1-3) Ayonga dimɛna dia ombeki menda vidéocassettes tshɛ ya la Société, tatɛ oma lo Les Témoins de Jéhovah — Un nom, une organisation. Nyayotana tokanyi tokina lo woho wa nɔmbɔla anto otsha l’ɔlɔngɔswamelo lo Tshoto y’Etangelo ya Asase a Ndjoko 1, 1985 (lo Falase), lɛkɛ 22-26, ndo lo dikatshi di’okotsha dia Olimu Aso wa Diolelo wa Mɔmbi 1993 (lo Falase).
17 Nyokeketsha Ambeki dia Vɔ Sambisha Akina: Lam’ekaso l’anto, oyango aso ele mbaetɛ ambeki wayonga ɛmɛnyi wa Jehowa. (Is. 43:10-12) Mbuta ate ombetsha pombaka keketsha ombeki dia nde mbutɛ akina kɛnɛ kekande lo Bible. Sho kokaka disala aha l’okakatanu lam’ambolaso ɔnɛ: “Ngande wayolembetshiya nkumbo kayɛ akambo a mɛtɛ asɔ na?” kana: “Avɛsa akɔna wayoyɔsa dia mɛnya ɔngɛnyi ɔmɔtshi dikambo sɔ?” Sɔtɔla avɛsa w’ohomba wa lo dibuku Ewo wasokoya onto lo sambisha, oko wanɛ wele lo lɛkɛ 22, 93-95, 105-106, ndo lo tshapita 18. L’etena kasungana, kokaka mbisha ombeki tokatshikatshi tɔmɔtshi tayondotakambaka latɔ lam’asambishande lo tshakitudi. Shande kanyi ya nde mbelɛ ase nkumbo kande dia vɔ monga lam’ekanyu. Onde nde ekɔ l’angɛnyi wakombola mbeka Bible ndo vɔ la wɔ? Tɛ̂nde akote wanɛ walanga.
18 Lo mbɔtɔka lo Kalasa k’Olimu wa Teokrasi la lo losanganya l’olimu, ɔnɛ lakeke ayolowana ndo ayokeketshama nto dia koma opandjudi wa lokumu l’ɔlɔlɔ. Naka nde ambolanga fundja lokombo lo kalasa kana koma opandjudi wahatabatizama, kete sunganaka ndjela alako wele lo dibuku Notre ministère, lɛkɛ 98-100. Naka nde hakotsha kɛnɛ kalɔmbama lo dikambo dimɔtshi dia lo lɔsɛnɔ lande, kete wɛ kokaka nyangayanga l’ekanda wa la Société tokanyi t’ohomba tatɛkɛta dikambo diakɔ ko mbɛ̂nyatɔ. Oko ɛnyɛlɔ, mbeyaka monga ko ombeki mbokaka wolo tshika ɔnwɛlɔ wa mfɔka kana didjoyadjoya dikina. Dibuku Comment raisonner mbishaka ɛkɔkɔ w’eshika w’oma lo Bible wahomba Akristo tshika mbekelo shɔ ya kɔlɔ ndo diɔ mɛnyaka lo lɛkɛ 118 woho ɔmɔtshi wa dimɛna wa kimanyiya onto dia nde tshungɔ oma lo mbekelo kakɔ. Lɔmba la nde kâmɛ lo dikambo sɔ ndo tɛ̂nde dia nde nyomoleka ndjaɛkɛ le Jehowa dia kondja ekimanyielo.—Jak. 4:8.
19 Woho wa sala dia mbeya ɔnɛ onto ekɔ lo kotsha kɛnɛ kalɔmbama dia sambisha lo sɛkɛ fundama lo Tshoto y’Etangelo ya Yâta Afusa 1, 1996, lɛkɛ 10, od. 6. Naka ombeki ambokotsha kɛnɛ kalɔmbama, kete ekɔ dimɛna tahembi la nde tena dimɔtshi dia mbɔlɔngɔsɔla woho wa nde sambisha lushi la ntondo layondotomba. Lo yoho yahomba mbokeketsha dimɛna, nyosawole dia woho wasala anto ndo wekamu wahomana la nyu tena efula lo mbilo kanyu. Ntondo, tatɛ la nde la esambishelo ka lo soko la soko lo yɛdikɔ yakoka, ko wɛ ndjôlakanya yema yema lo weoho ekina w’olimu. Naka sawo diayɛ mongaka mondo ndo aha l’okakatanu, kete nde hôka wolo kôkoya. Keketshande, yâla l’ɔngɛnɔngɛnɔ l’esambishelo; lâsɔ mbayondeya yimba yayɛ ndo ndjiyela. (Etsha 18:25) Ombeki w’oyoyo pombaka monga l’oyango wa koma opandjudi wa lokumu l’ɔlɔlɔ wasambisha ngɔndɔ tshɛ ndo w’etete. Aha la tamu wɛ kokaka mbôkimanyiya dia nde ndjasalɛ ekongelo k’ɔlɔlɔ k’esambishelo. Dia mbôkimanyiya lo nde pama lo woho wasambishande, wɛ kokaka mbotɛ dia nde mbala asawo wa Tshoto y’Etangelo ya Tshaka Fudu 15, 1984, lɛkɛ 15-25; Lotena Eduwa 15, 1988, lɛkɛ 9-20; Tshango 15, 1991, lɛkɛ 15-20 ndo Tshango 1, 1994, lɛkɛ 20-25 (lo Falase).
20 Nyokeketsha Ambeki dia Vɔ Ndjakimɔ le Nzambi ndo Batizama: Ombeki mɛtɛ walanga pombaka mbeya awui efula lam’ekande dibuku Ewo dia nde ndjakimɔ le Nzambi ndo kotsha kɛnɛ kalɔmbama dia batizama. (Enda lo Etsha 8:27-39; 16:25-34.) Koko, la ntondo k’onto monga la saki ka ndjakimɔ le Nzambi, nde pombaka tokotamamemi Jehowa ma. (Osam. 73:25-28) Lo wekelo w’otondo, yanga waaso wa wɛ keketsha lowando lande otsha le Jehowa nɛ dia waonga ande. Ɛnya ngandji k’oma k’ɛse otema kokayɛ Nzambi. Kimanyiya ombeki lo nde kana yimba lo woho wakokande monga la diokanelo lasande la Jehowa. Naka nde ambeya ndo ambolanga Nzambi mɛtɛ, kete lâsɔ nde ayowokambɛ la kɔlamelo, nɛ dia mamema Nzambi nemanɛka la woho wɔsa onto Jehowa.—1 Tim. 4:7, 8; enda lo Manuel pour l’École, lɛkɛ 75, od. 11.
21 Sala tshɛ dia munanda otema w’ombeki. (Osam. 119:11; Etsha 16:14; Romo 10:10) Ekɔ ohomba dia nde mɛna lo na endanande la mɛtɛ ndo mbɔsa yɛdikɔ dia woho wayondohomba kamba la kɛnɛ kambondeka. (Romo 12:2) Onde mɛtɛ nde mbetawɔka akambo a mɛtɛ wawɛnyawɔ lomingu la lomingu? (1 Tes. 2:13) Dia wɛ mbeya, wɛ kokaka mombola wembola wa nde mbisha kanyi yande, oko: Akanayɛ lo dikambo sɔ? Ngande wokokiyɛ kamba la dui sɔ lo lɔsɛnɔ layɛ? Oma lo kɔmatɛrɛ yande, wɛ kokaka mbeya akambo akɔna wokokiyɛ mbôkimanyiya efula dia munanda otema ande. (Luka 8:15; enda lo Manuel pour l’École, lɛkɛ 50, od. 11.) Ɛtɛkɛta wa l’asango wa lo lɛkɛ 172 la 174 lo dibuku Ewo mumbolaka ɔnɛ: “Onde wɛ akayakimɔ le Nzambi lo dɔmbɛlɔ?” la “Kakɔna kakoshimba dia wɛ nongola batismu?” Wembola ɛsɔ kokaka sokoya ombeki lo nde mbɔsa yɛdikɔ mɔtshi.
22 Woho wa sala naka opandjudi ambolanga batizama mɛnyama lo Tshoto y’Etangelo ya Yâta Afusa 1, 1996, lɛkɛ 11, od. 9. Dibuku Ewo diakalɔngɔsɔma l’oyango wa kimanyiya onto dia nde kadimola “Wembola le Wanɛ Walanga Nongola Batismu.” Wembola ɛsɔ wayɔsɛdingola dikumanyi kâmɛ la wɔ, tanemaka lo biukubuku Atshina a Wetshelo w’Oma lo Bible. Naka wɛ akake epole ɔsɛkɛ lo ekadimwelo wa wembola wakafundama lo dibuku Ewo, kete ombeki hoka wolo l’asawo wotshikitanyi wayondosawola la dikumanyi lo dikambo dia batismu.
23 Tokimanyiya Wanɛ Wamboshidiya Wekelo Awɔ wa Bible: Sho nongamɛka ɔnɛ onto lambokoma l’ekomelo ka wekelo wa dibuku Ewo ambɛnya otema ɔlɔlɔ ande hwe ndo saki kande k’oma ka tshina di’otema ka kambɛ Nzambi. (Mat. 13:23) Diɔ diakɔ diambola ɔtɛ a dui w’ekomelo lo dibuku diakɔ dimbola nɛ: “Kakɔna Kayoyosala?” Edingɔ wa ndjihelo wekɔ lo keketsha ombeki dia nde kana yimba lo diokanelo diakandahombe pamia l’asande la Nzambi, l’ohomba wa kamba la ewo kakandakondja ndo ohomba wa mbɔsa yɛdikɔ mɔtshi aha la tshimbatshimba dia nde mɛnya ngandji kokande Jehowa. Kɔnɔngɔsɔma dia sho mbeka ekanda ekina l’anto wamboshidiya dibuku Ewo. Naka ombeki hasale ndoko dui kânga mbayande l’ewo ka Nzambi, okiyande hwe ndo la lotutsha kɛnɛ kahombande sala dia pama lo nyuma. Wɛ kokaka mêmbolaka tena la tena, ɔsɔku mbôtshikɛyɛ soko hwe dia nde takula wanya wayowɔtɔla otsha lo lɔsɛnɔ la pondjo.—Und. 12:13.
24 Ombeki w’oyoyo wetawɔ mɛtɛ ko nongola batismu pombaka mpama nto efula l’ewo ndo l’oshihodielo w’awui la ntondo ka nde monga mɛtɛ nge lo mbetawɔ. (Kol. 2:6, 7) L’ɔkɔngɔ a shidiya dibuku Ewo, lo dihole dia tetemala la mbêtsha la ngelo, wɛ kokaka mongaka suke wonya tshɛ dia mbôkimanyiyaka lo yoho ya lânde ondo dia nde tshunda lo nyuma. (Ngal. 6:10; Heb. 6:1) Lo wedi ande, nde kokaka kotsha oshihodielo ande lo mbalaka Bible lushi tshɛ, lo mbekaka ndamɛ Tshoto y’Etangelo ndo ekanda ekina w’‘ɔhɔmbɔ wa kɔlamelo,’ lo ndjalɔngɔsɔlaka dia nsanganya ndo lo mbɔtɔka lɔkɔ, ndo lo kɛtshanyaka dia mɛtɛ kâmɛ l’asekande wa lo mbetawɔ. (Mat. 24:45-47; Osam. 1:2; Etsha 2:41, 42; Kol. 1:9, 10) Dia nde ndjalɔngɔsɔla woho wa kotsha olimu ande l’ɔlɔlɔ tshɛ lo woho wa lo Teokrasi, ayonga ohomba nde mbala dibuku Notre ministère ndo ndjela alako wa lɔkɔ.—2 Tim. 2:2; 4:5.
25 Tohamia Diewo dia Ndakanya: Takalongola ɔkɛndɛ wa ‘mbetɛ anto ambeki, la mbaetsha.’ (Mat. 28:19, 20) Lam’ele diewo dia ndakanya diekɔ ohomba efula dia mbetɛ anto ambeki, sho nangaka sala tshɛ dia koma embetsha w’eshika. (1 Tim. 4:16; 2 Tim. 4:2) Dia alako akina lo woho wa pamia diewo dia ndakanya, ondo nyayolanga mbala: “Woho wa monga la diewo dia ndakanya” ndo “Woho wa munanda etema w’ampokami aso” lo Manuel pour l’École, wekelo 10 la 15; “Ombetsha, wetshelo” lo Auxiliaire; l’asawo wa lo Tshoto y’Etangelo (lo Falase) anɛ: “Diewo dia mbika la diangɔ diahalongola la dja” la “Etena kalakanyayɛ, nânda asolo,” Tshaka Fudu 1, 1984; “Onde wɛ mbeyaka kana yimba dimɛna efula oma l’Afundelo?” Asase a Ndjoko 1, 1986; la “Vɔ ngɛnangɛnaka mbetɛ anto ambeki,” Yâta Afusa 15, 1996.
26 Etena kasalanyu tshɛ dia mbetɛ anto ambeki l’ekimanyielo ka dibuku Ewo, nyɔlɔmbake Jehowa tena tshɛ, Nde “ɔnɛ lôdia,” dia nde tshɔkɔla weolo wadjanyu dia munanda etema la lokumu l’ɔlɔlɔ la Diolelo. (1 Kɔr. 3:5-7, NW) Nyonge l’ɔngɛnɔngɛnɔ watokondjaka onto lam’alakanyande okina dia nde mpotɔ ewo katɔla otsha lo lɔsɛnɔ la pondjo, kâmɛ ndo mbeya oshinga atɔ ndo sala kɛnɛ k’ɔtɔnɛ latɔ!