Otungi Aso wa Woke Tokanɛka!
1 Jehowa akambola lam’akandatshaka tshɛ dia kana yimba l’Isariyɛlɛ w’ohedia ate: ‘Wɛ ateye? Wɛ atoke? Jehowa, Otungi wa tokoma ta nkɛtɛ, ekɔ Nzambi ka pondjo.’ (Isa. 40:28) Sho mbeyaka Otungi aso wa Woke, ndo sho mɛnaka woho watokokɛnde la ngandji tshɛ. Koko, miliyɔ y’anto hawetawɔ ɔnɛ nde ekɔ ndo kana wekɔ lo mbɔ̂sa lo woho okina wahɔtɔnɛ la kɛnɛ ketsha Bible. Ngande wokokiso mbâkimanyiya na?
2 Dibuku di’oyoyo dia lo Falase di’ɔnɛ: Y a-t-il un Créateur qui se soucie de vous ? diakatondjama lo dikambo diawɔ. Diɔ keketshaka anto wakanyiya dia vɔ kana yimba l’akambo watshama mɛtɛ. Awui waleka kotola yambalo y’anto ndo tokanyi tawaetawoya tele lo dibuku sɔ tayohomba kotola yambalo ya wanɛ wadiadja.
3 Manyamanya Dibuku Créateur: Kimɛ akambo woleki ohomba wele lɔkɔ l’ɔtɛ. Tshapita 2 polo 5 mɛnyaka woho wakatɔngɔ andja, lɔsɛnɔ, onto ndo akɔna akâtonge. Tshapita 6 polo 9 kɛnɛmɔlaka Bible l’Otungi atɔ ndo tɛkɛtaka djekaleka di’ɔnɛ ɔkɔndɔ w’etongelo wele lo dibuku di’Etatelu wekɔ mɛtɛ. Tshapita 10 mbishaka okadimwelo wa dimɛna efula lo dimbola dimɔtshi l’atei a wembola wakonya anto ewo wayambolawɔ: “Naka Otungi ɔmɔtshi watokanɛ ekɔ, lande na pâ efula nganɛ?”
4 Hemba Kana Yimba l’Akanga a Tamu: Lɛkɛ 78 la 79 la dibuku Créateur mbishaka tokanyi tokokiyɛ kamba latɔ dia kimanyiya akina dia vɔ vamɛ monga la kanyi y’ɔlɔlɔ lo dikambo dia Nzambi. Mbolawɔ wate: “Onde andja waki la etatelo?” Efula wayetawɔ ɔnɛ andja waki la etatelo. Naka ngasɔ, mbola wate: “Onde etatelo kɛsɔ kakahɔhɔ twamɛ kana bu?” Efula mbetawɔka ɔnɛ wakakihɔhɔla. Lâsɔ ko wɛ ndjowoka dimbola dia komelo ɔnɛ: “Onde ɛngɔ kɛmɔtshi ka pondjo mbakahɔhɔla etatelo k’andja kana Onto ɔmɔtshi lokôngaka pondjo?” Sawo dia ngasɔ koka konya anto efula lo vɔ mɛna ɔnɛ Otungi ɔmɔtshi pombaka monga.
5 Dibuku Créateur mbele mɛtɛ ɛngɔ kahomba anto efula. Ɛnya ewotɔ ayɛ, asekayɛ wa l’olimu, wa la kalasa ndo anto akina weyana la yɛ. Ɛmbaka amɔtshi l’esambishelo woho wa wɛ tosha wanɛ wayohomana la yɛ wahetawɔ ɔnɛ Nzambi ekɔ. Lam’ayototalekaka manyamanya dibuku nɛ, mbayotalekaka fula ndo ngandji kokaso Otungi kayototshutshuya dia tetemala la kɛndakɛnda l’ɛlɛmbɛ ande woleki tshɛ.—Ef. 5:1; Eny. 4:11.