Tokeketsha mbetawɔ le Otungi w’onto
1 Anto efula wekɔ la tokanyi tawɔ lo kɛnɛ k’endana la etatelo ka lɔsɛnɔ. Lonyangu ko, efula wekɔ lo nɔmbwama lo kɔlɔ ndo wekɔ lo mbetawɔ okadimwelo wakasha ohilwelo. Dibuku Création sɛdingolaka wɛnamelo akɔ ehende wa dimbola sɔ l’ɔmɔmɔ ndo mbishaka tolembetelo tasuya Bible. Woho akɔna wokokiso kimanyiya anto w’etema ɔlɔlɔ wɛnama oko wekɔ lo nanga mpokamɛ na? Lo sala waembwelo w’eyoyo. Ekɔ ɔlɔlɔ ndjâlaka nshi tshɛ la dikambo dimɔtshi di’oshika dia mbuta lo yimba etena kakalolaso, diayokeketsha mbetawɔ k’onto le Jehowa, Otungi aso.
2 Naka onto akɔ aketawue Bible, sho kokaka tatɛ ɔkɛtshanyelo lo woho w’oshika lo mbuta ɔnɛ:
◼ Isaya 45:18 mbutaka l’ɔlɔlɔ tshɛ kɛnɛ k’endana la etatelo k’andja; dimi nangaka mbeya kɛnɛ kakanayɛ lo dikambo sɔ. [Ala divɛsa diakɔ ndo tshika onto akɔ asha lokanyi lande.] Jehowa ndamɛmɛ ndjalowolaka oko Otungi w’elongo la wa kɛtɛ. Ko kayotota dia dikambo dia lɔsɛnɔ la kɛtɛ na? Isaya 42:5 mboshaka paka nde dikoka sɔ. [Ala.] Naka kɛnɛ kata Bible kekɔ mɛtɛ, kete ohilwelo ekɔ kashi. Onde wɛ fɔnyaka dia sho kokaka mbetawɔ Bible oka?” Totshu lo tshapita 17 ya dibuku Création, ndo toke epole ɔsɛkɛ l’ɛkɔkɔ ekina watetawoya ɔnɛ: Jehowa kele Otungi.
3 Sho kokaka tatɛ ɔkɛtshanyelo oko lo yoho nyɛ:
◼ “Lo diembwelo diami dia ndjihelo, takatondja dimbola nɛ: Woho akɔna wayônga onto ndo kɛtɛ lo nshi yayaye na? Enda woho wakadimola dibuku diakamakotshikɛ lo dimbola sɔ.” Tofole dibuku Création lo lɛkɛ 234-5 ndo tokeketsha onto akɔ dia nde mbala palagalafɛ 6 la 7. Naka nde akɛ̂nya saki kande, kete sho kokaka mbuta ɔnɛ: “Oko le yɛ, etshikitanelo akɔna wa diambo wayosalema la kɛtɛ na?” Naka diaaso diekɔ, sho kokaka kɛtshɛnya lo dimbola sɔ kakiye, kana lo diembwelo dia mbala kekina, lo tetemala la walelo wa palagalafɛ kina ya lo tshapita nyɛ ya dibuku Création.
4 Naka ɔtɛkɛtshi aso mɛnamaka oko ekɔ lo ndjasha yema l’ɔtɛmwɛlɔ, sho kokaka mombola nganɛ:
◼ “Onde wɛ ɛnakɔ dia nshi nyɛ anto efula wekɔ lo mbetawɔ wolo wele kema w’onto kana wɛnama oko w’onto w’elɛwɔ ɔnɛ Nyango Andja oka? [Tshikɛ onto akɔ dihole asha lokanyi lande.] Bible hatotshike l’ohotohoto lo dikambo dia eongelo k’Otungi wa mɛtɛ.” Ala Enyelo 4:11. L’ɔkɔngɔ a walelo wa divɛsa, ondo ɔtɛkɛtshi aso ayosha lokanyi lande. L’ɔkɔngɔ sho mbeyaka kotola yambalo yande lo lokanyi lɔmɔtshi kana tokanyi tohende t’eshika tele lo tshapita 11 ya dibuku Création, ndo ondo wɛ mbeyaka tɛtɛ ɔnɛ: sangwelo di’Otungi ele dia mbetɛ kɛtɛ paradiso kayɔlɔmbwama la tshina dia Diolelo dia Kristo.
5 Yoho kina ya tatɛ diembwelo di’oyoyo ele ya mbuta ɔnɛ:
◼ “Anto wakadiɛnɛ efula la kandji ndo la lonyangu l’ɔtɛ w’akambo wa kɔlɔ. Jehowa, Otungi wa kɛtɛ, akalake dia akambo asɔ wayoshila. [Fola dibuku lo lɛkɛ 196, ndo ala Tokidi 2:21, 22.] Wanɛ wawetawɔ ɔnɛ nde kele Otungi awɔ ndo wasala lolango lande kokaka kongɛ ɛngɛnɔngɛnɔ wa mamba ɛsɔ.” Naka sunganaka, totetemale la sɛdingola Enyelo 21:4, 5 lo lɛkɛ 197-8.
6 Apandjudi wambekesanɛ l’olimu mbeyaka dia ekɔ ɔlɔlɔ tômbi etena ka sala waembwelo w’eyoyo. Tɛdikɔ t’eshika tayotokimanyiya dia mbesa saki esadi esadi. Tênde etena koleki sungana le so ndo le anto wa lo mbilo kaso. Naka tayosalaka olimu ɔnɛ lo tena la tena, kete tayoyala l’ɔngɛnɔngɛnɔ wa kotsha lotumu l’endana la ‘mbetɛ anto ambeki.’—Mat. 28:19, 20.