‘Yaka, ondjele’
1. Wekelo wa Bible wa l’etshumanelo wayotosha diaaso diakɔna lo ngɔndɔ yayaye?
1 Ɛkɔndɔ wa l’Evanjiliɔ ɛnɛi wendana la lɔsɛnɔ laki Yeso lanɛ la nkɛtɛ tolembetshiyaka akambo efula wendana l’Ɔna Nzambi. Lam’ele Akristo pombaka ‘ndjela wanya ande dimɛna dimɛna,’ tayolanga ndjalɔngɔsɔla dimɛna ndo mbidja yimba efula etena kayoteka dibuku ‘Yaka, ondjele’ lo Wekelo wa Bible wa l’etshumanelo wayotatɛ lomingu la Ngɔndɔ ka sato 1 lo ɛtɛkɛta ɛmɔtshi. (1 Pet. 2:21; Mako 10:21) Tayoleka mbidja yimba lo akambo wa lo lɔsɛnɔ laki Yeso wakoka tokeketsha l’esambishelo.
2. Ɛlɔlɔ akɔna wakokaso nkondja oma l’ɛnyɛlɔ k’ekikelo kaki Yeso?
2 Ɛnyɛlɔ kakatshike Yeso: Onde wɛ atahomanaka l’onto latona losango laso etena katayasambisha lo luudu la luudu? Etena kahomanaso la dikambo sɔ, tohɔ ɛtɛkɛta waki Yeso wata ɔnɛ: “Naka vo wakansuya, wayunyusuya ndu nyu.” (Joa. 15:20) Lo mɛtɛ, aha otonelo tshɛ mbahomba mbɔsama oko yoho mɔtshi ya ɔhɛnyɔhɛnyɔ. Koko, ɔngɛnɔngɛnɔ wakakitshama la ntondo kande mbakakimanyiya Yeso dia nde mbikikɛ weho tshɛ w’ehemba ndo w’ekakatanu. Sho lawɔ kokaka nsala tshɛ dia mbetawɔma le Jehowa ndo nkondja difuto oma lo kɔlamelo yaso. Kɛsɔ ayotokimanyiya ‘diaha sho nkɔmɔ ndo nɛmba lo anima aso.’ (Heb. 12:2, 3; Tuk. 27:11) Naka sho ntetemala lo olimu w’esambishelo, kete tayokoka monga la eshikikelo nto dia Kristo Yeso ayotosukɛ.—Mat. 28:20.
3. Ngande wakokaso mbokoya woho wakɔsaka Yeso olimu w’esambishelo?
3 “Dimi lakatumama dia dikambu diako”: Olimu w’esambishelo ka Diolelo wakɔsaka dihole dia ntondo lo lɔsɛnɔ laki Yeso. (Luka 4:43) Nde akayakimɔ tshɛ l’olimu w’esambishelo. Nde akɔshi dia olimu akɔ pombaka kambema la shamanya ndo mbala tshɛ nde akayangaka waaso wa nsambisha awui wendana la Diolelo. Lam’ele tekɔ ambeki waki Yeso, ndjela wanya ande ayotokonya lende? Etena katshɔso l’elimu aso wa lushi la lushi, onde sho mpomanaka l’anto wakokaso nsambisha lokumu l’ɔlɔlɔ? Ngandji ka Kristo katotshutshuya dia ndeka nsambisha anto lokumu l’ɔlɔlɔ!—2 Kor. 5:14.
4. Lo toho takɔna takokaso ndowanya olimu aso w’esambishelo?
4 “Nduku untu edja ndu kakiane akateketa wuhu oso”: Yoho yaketshaka Yeso akambiya ampokami ande. (Joa. 7:46; Mat. 7:28, 29) Kakɔna kakôtshikitanyaka la embetsha ekina? Nde akalangaka akambo wa mɛtɛ wakandetshaka, nde akalangaka anto wakandetshaka ndo nde akakambaka la toho totshikitani ta wetshelo. Lo mbokoya Ombetsha wa Woke, sho kokaka ndowanya olimu aso w’esambishelo.—Luka 6:40.
5. Oyango akɔna wahombaso ndjadjɛ etena kayoteka dibuku ‘Yaka, ondjele’?
5 Ɔsɔ ekɔ akambo amɔtshi wa lânde wakokaso mbeka lo dikambo dia Yeso. Naa akambo akina wa lânde wakokaso mbeka? Etena kayotɔsɛdingola lɔsɛnɔ laki Yeso lo Wekelo wa Bible wa l’etshumanelo, toyadje oyango wa “mbeya ngandji ka Kristu” lo mbokoya ɛtɛkɛta ndo etsha ande.—Ef. 3:19.