Akatshi wa leeta wa Eohwelo wayotatɛ kahanyema lo ngɔndɔ ka nɛi 2
1. Etena kakɔna kayotokahanya akatshi wa leeta wa Eohwelo ka l’ɔnɔnyi ɔnɛ, ndo naa ohomba wele l’esambishelo ka lânde kɛsɔ?
1 Oma lo Ngɔndɔ ka nɛi 2 polo Ngɔndɔ ka nɛi 17, tayokahɛ anto akatshi wa leeta wendana la dikambo dioleki ohomba dia l’ɔnɔnyi, mbuta ate Eohwelo ka nyɔi ka Kristo. Lo ɛnɔnyi wakete, anto efula wɛnya nsaki l’akambo wa mɛtɛ waketawɔ leeta lɔsɔ. Ɛnyɛlɔ, lo lushi la Eohwelo, mama kɛmɔtshi akelɛ Bɛtɛlɛ lo mbuta ɔnɛ: “Etena kakamakomi la ngelo, lakatanyi dikatshi dia leeta l’ɛse ka soko diami. Dimi nangaka ntshɔ, koko haleye wonya shikaa wayosalema Eohwelo.” Ɔnangɛso akôlembetshiya lɛnɛ ahombande ntana awui asɔ lo dikatshi dia leeta. Mama kɛsɔ akakomiya sawo diande lo mbolaka ɔnɛ: “Layotshɔ lo losanganya lanyu la dikɔlɔ nɛ!”
2. Kakɔna kayotohomba mbuta etena kashaso onto dikatshi dia leeta?
2 Woho wayotosala dikambo sɔ: Lam’ele sho bu la wenya efula dia nshidiya ɛtshi kaso ka nkɛtɛ, ayonga dimɛna sho ntɛkɛta lo tshena pe. Sho kokaka mbuta ɔnɛ: “Akemwe. Sho nangaka mbisha nkumbo kayɛ dikatshi nɛ dia leeta diendana la dikambo dimɔtshi di’ohomba efula dia l’ɔnɔnyi diayosalema l’andja w’otondo Lushi la lomingu Ngɔndɔ ka nɛi 17. [Tshuma ompokami ayɛ dikatshi dia leeta.] Lushi lɔsɔ ekɔ lushi la Eohwelo ka nyɔi kaki Yeso. Sawo di’oma lo Bible diahawalɔmbɛ onto dia mfuta falanga dia dihokamɛ diayoshama dia nembetshiya woho wakokaso nkondja wahɔ oma lo tshungo kaki Kristo. Dikatshi dia leeta nɛ mɛnyaka dihole ndo wonya wayosalema losanganya lɔsɔ l’etshumanelo kaso.”
3. Kakɔna kakokaso nsala dia mbelɛ anto efula?
3 Naka etshumanelo kanyu kekɔ la ɛtshi ka nkɛtɛ ka woke, kete dikumanyi mbeyaka nyotɛ dia ntshika akatshi wa leeta lo ahole wele anto kema lawakawɔ, koko aha lo dihole diakoka ambetshetshi mɛna. Toyashikikɛ dia mbelɛ anto wayotokalola dia tenda lo wendelo w’oyoyo, ewotɔ aso, asekaso wa l’olimu, wa la kalasa ndo anto akina weyana la so. Etena kayototshɔ lo wikɛndɛ dia tokahanya akatshi wa leeta, katosha anto ndo periodikɛ naka kokaka. Onde wɛ kokaka nkamba oko ombatshi mboka wa tshanda lo Ngɔndɔ ka nɛi dia wɛ ndeka ndjasha lo esambishelo ka lânde kɛsɔ?
4. Lande na kakombolaso dia anto wɛnya nsaki ndja lo Eohwelo?
4 Ande wetshelo wa diambo wayolongola anto wakɛnya nsaki wayonga lo losanganya lɔsɔ lee! Vɔ wayoshihodia ngandji ka woke kakɛnya Jehowa lo nkimɔ tshungo. (Joa. 3:16) Vɔ wayoyeya woho wayokondja anto wahɔ oma lo Diolelo diaki Nzambi. (Is. 65:21-23) Vɔ wayɔlɔmbama dia mɛnana la wanɛ washana ahole dia nɔmba di’onto ɔmɔtshi tekaka la wɔ Bible dia vɔ nyomoleka mbeya akambo efula. Tekɔ lo nsala alɔmbɛlɔ di’anto efula wele l’etema w’ɛlɔlɔ mɛnya nsaki l’esambishelo ka lânde kɛsɔ ndo ndjosangana kâmɛ la so lo Eohwelo.