Ekenga ehende wa falanga wele bu la nɛmɔ di’efula

Yoho mɔtshi yasukɛso wahɔ wa Diolelo, ele lo nkimɔ falanga yaso dia nsukɛ olimu w’esambishelo wasalema l’andja w’otondo. Ko, kayotota naka sho bu la falanga efula?

Lo diaaso dimɔtshi, Yeso akɛnyi wadi aki odo ɔmɔtshi l’ose wola adja ekenga ehende wele bu la nɛmɔ di’efula l’ekitshelo ka tɛmpɛlɔ. Ngandji kakandokaka Jehowa kakotshutshuya dia nde nkimɔ “uma lu wula andi, . . . kene kaki la ndi, kakandahumbi ndjakimanyia.” (Mako 12:41-44) Woho wakate Yeso dikambo dia womoto ɔnɛ mɛnyaka dia woshasha ande waki la nɛmɔ di’efula lo washo wa Nzambi. Woho akɔ wâmɛ mbele, Akristo wa lo ntambe ka ntondo kɔmbɔsa dia ɔkɛndɛ wakimɔ falanga dia nsukɛ olimu wa Diolelo wakendanaka paka l’Akristo waki l’ekondjelo k’efula. Ɔpɔstɔlɔ Paulo akate dikambo di’ase Makɛdɔniya, wele kânga mbakiwɔ la ‘wola w’efula . . . wakatetemala sɛngasɛnga la etete dia vɔ monga la diɛsɛ dia nkimɔ weshasha wa la lolango.’—2 Kor. 8:1-4.

Ɔnkɔnɛ, oyadi tekɔ la diɛsɛ dia nkimɔ paka ‘ekenga ehende wa falanga wele bu la nɛmɔ di’efula,’ sho mpombaka mbohɔka dia weshasha efula wa yema tshitshɛ ndjokonyaka dia vɔ monga woshasha w’efula. Woho wakimɔso l’otema ɔtɔi ayɔngɛnyangɛnya Shɛso lele l’olongo, nɛ dia “[Nzambi] nangaka untu latukimoka l’ongenongeno.”—2 Kor. 9:7.