Jehowa Nangaka Olimu W’okambɛyɛ L’anima Ayɛ Tshɛ
‘Oyadi kakɔna tshɛ kasalayɛ, okisale l’anima ayɛ tshɛ oko ɔnɛ lasalɛ Jehowa koko aha anto.’—KOLOSAI 3:23.
KAMBƐ Jehowa ekɔ diɛsɛ dioleki woke diakokaso kondja. Jurunalɛ nyɛ mbeyaka bonde kakeketshayɔ Akristo deko aha nɛ dia vɔ ndjasha l’olimu, ndo ‘tetemala’ la kamba olimu akɔ l’etena tshɛ kewɔ la diaaso. (1 Tesalonika 4:1) Kânga mbatosokoya otema aso, aha nshi tshɛ mbatototshaka kɛnɛ tshɛ kakokaso sala dia kambɛ Nzambi. Kadiyɛso kɛmɔtshi k’onyemba kambobatizama suke l’ɛnɔnyi 40 w’etondo ate: “Lo menda waaso wele la mi, dimi mɛnaka ohomba wa kambaka lo tena tshɛ. Ɔkɔkɔ wakambami ngasɔ bu dia kondja ahɔndɔ wa lokumu kana w’oshinga wolo, kana wa mbɔsaka kɔnje ko sala nkɛndɔ y’etale lo masuwa dia tansɛnyaka washo, koko dia kotsha ehomba ami, wele oko kondja falanga ya futaka lopitadi kana ya sakɛka wanyu. Dimi toyaokaka di’oko lekɔ lo mbisha Jehowa paka akɔmbɔ wa wenya la wa wolo ami.”
2 Ngandji kokaso Nzambi tosokoyaka dia sho kombola kamba olimu aso w’esambishelo lo yɛdikɔ yɛdimi l’akoka aso. Koko, awui wa lo lɔsɛnɔ mbeyaka toshimba di’aha sho sala kɛnɛ kakokaso sala. Mɛmba ɛkɛndɛ ekina wa l’Afundelo, kâmɛ ndo ɛkɛndɛ wa l’atei a nkumbo, kokaka tɔsɛ wenya efula ndo wolo aso. (1 Timote 5:4, 8) Lo “tena dia wulu” nɛ, lɔsɛnɔ laya mɛtɛ ololo. (2 Timote 3:1) Naka sho kema l’akoka wa sala kɛnɛ tshɛ kakombolaso sala l’olimu wa Nzambi, kete asolo aso mbeyaka tokandjakandja. Sho mbeyaka ndjoyambola ɔnɛ kana Nzambi ngɛnangɛnaka woho wɔtɛmɔlaso.
Ɔlɔlɔ wa Kambɛ Nzambi l’Anima Aso Tshɛ
3 Lo Osambu 103:14, Bible toshikikɛka la wangasanu tshɛ ɔnɛ Jehowa “mbeyaka uma lu na akatatungama. Ndi atuhoka ati: Ditshu mbesu.” Oleki osek’onto tshɛ, nde mboleki mbeya lanɛ wokome wolo aso. Nde hatɔlɔmbɛ kɛnɛ kahatakoke mbosha. Kakɔna kalongamɛnde oma le so na? Ɛngɔ kakoka onto tshɛ mbosha, oyadi lɔsɛnɔ la ngande lele lande: ‘Oyadi kakɔna tshɛ kasalayɛ, okisale l’anima ayɛ tshɛ oko ɔnɛ lasalɛ Jehowa koko aha anto.’ (Kolosai 3:23) Eelo, Jehowa nongamɛka dia—sho tshɛ—mbokambɛ l’anima aso tshɛ.
4 Kambɛ Jehowa l’anima aso tshɛ kɛdikɛdi na? Tshɛkɛta ya lo Grɛkɛ yokadimudiwɔ ɔnɛ “la anima tshɛ” kɛdikɛdi “oma ko tshondo y’anima.” “Anima” kɛdikɛdi tshondo y’onto, l’akoka ande tshɛ wa lo demba ndo wa lo yimba. Kambɛ Nzambi l’anima aso tshɛ kɛdikɛdi ndjasha la tshondo, mbokambɛ olimu l’akoka ndo la wolo aso tshɛ polo ndo lɛnɛ akokawɔ komɛ. Mbut’ate sala la wolo tshɛ wakoka anima aso sala.—Mako 12:29, 30.
5 Onde lasɔ, kambɛ Nzambi l’anima aso tshɛ nembetshiyaka ɔnɛ sho tshɛ la dia mbokambɛ olimu lo yɛdikɔ yamɛ oka? Dui sɔ diekɔ wolo salema nɛ dia, lɔsɛnɔ la anima la anima ndo akoka awɔ tshikitana. Nyɛsɔ tɔshi ɛnyɛlɔ k’apɔstɔlɔ wa kɔlamelo waki Yeso. Vɔ tshɛ kokokaka sala olimu lo yɛdikɔ yakɔ yamɛ. Oko ɛnyɛlɔ, hateye awui efula wendana l’apɔstɔlɔ amɔtshi wele oko Simɔna k’Ose Kanana la Jakɔba, ona Alafayo. Ondo nɛ dia vɔ kokambaka efula l’olimu awɔ w’apɔstɔlɔ. (Mateu 10:2-4) Koko, Petero aki l’akoka wa mbetawɔ ɛkɛndɛ a weke efula—eelo, Yeso akawosha “sapi ya diulelu”! (Mateu 16:19) Koko, nde kombidiya Petero lâdiko di’apɔstɔlɔ akina tshɛ. Lam’akɛnyi Joani ɛnɛlɔ ka Jerusalɛma y’Oyoyo lo dibuku di’Ɛnyɛlɔ (oya lo 96 T.D.), nde akɛnyi ave 12 wakahikama ehele k’osomba ko “kumbu dikumi la hyendi ya atumami dikumi la ahendi” yakafundama lɔkɔ.a (Enyelo 21:14) Jehowa akangɛnangɛnaka lutumu l’apɔstɔlɔ tshɛ, kânga mbele amɔtshi wakakokaka kamba efula oleki akina.
6 Woho akɔ wamɛ mbele, Jehowa halɔmbɛ dia sho tshɛ kimɔ yɛdikɔ yâmɛ ya wenya lam’asambishaso. Yeso akɛnya dikambo sɔ lo wɛɛla ande w’ombuki a woho wɛnya nganɛ wɔtɔnɛ olimu w’esambishelo la ntɔngɔ yakonɛma. Ntɔngɔ yakakɔ lo nkɛtɛ yotshikitanyi, mɛnyaka nganɛ wotshikitanyi etema a wanɛ wôka losango la diolelo. Yeso akalembetshiya ate: “One lakukama lu kete y’ololo, eli one latukaka diui, latudishihudiaka. Mete ndi atotokaka elua: emotshi lukama lukama, ekina akumi asamalu akumi asamalu, ekina akumi asatu akumi asatu.” (Mateu 13:3-8, 18-23) Elowa akɔna ɛsɔ, ndo lande na akawatɔ lo tɛdikɔ totshikitanyi na?
7 Lam’ele lɔtɔngɔ lakonɛma ele “diui dia diulelu,” ɔtwɛlɔ w’elowa mendanaka la odianganyelo wa dui diakɔ, mbut’ate mboditela anto akina. (Mateu 13:19) Efula k’elowa wakatɔ tshikitana—oma lo akumi asato akumi asato polo lo lokama lokama—nɛ dia akoka la lɔsɛnɔ l’onto l’onto tshikitana. Onto lele la demba dia ki ndo dia wolo kokaka sambisha wenya efula oleki ɔnɛ latalɛmbɛ yema yema nɛ dia hemɔ kɛmɔtshi kawosanya kana nɛ dia nde otatshunde osombe. Ɔlɔngɔlɔngɔ kana osekaseka w’onyemba ndo waha l’ɛkɛndɛ wa l’atei a nkumbo kokaka kamba efula oleki ɔnɛ lahomba kamba olimu w’etshaka wenya dia kotsha ehomba wa nkumbo kande.—Ɛdika la Tukedi 20:29.
8 Ko lo asho wa Nzambi, shi onto lôkambɛ l’anima ande tshɛ lo ntɔ elowa akumi asato akumi asato bu la kɔlamelo y’efula oko ɔnɛ latɔ elowa lokama lokama? Atonga na! Efula k’elowa watɔ kokaka tshikitana, koko Jehowa ngɛnangɛnaka olimu akɔ edja tshɛ kêwɔ etombelo wa kɛnɛ tshɛ kakokaso mbosha. Ohɔ dia, efula k’elowa wɔtwɛ ndo woye oma l’etema wa “kete y’ololo” tshikitana. Tshɛkɛta ya lo Grɛkɛ (ka·losʹ) yokadimudiwɔ ɔnɛ “ololo” kɛdikɛdi yangɔ ya “dimɛna efula” ndo “yangɛnyangɛnya otema, ndo yasha asho ɛtɛtɔ.” Ande nganɛ wambotokeketshama lam’amboteya ɔnɛ naka sho mbisha kɛnɛ tshɛ koleki ɔlɔlɔ le so, kete otema aso wayonga dimɛna efula lo asho a Nzambi lee!
Tɛdikake Olimu Ayɛ la wa Onyayɛ
9 Teye di’otema aso waha kokele mbeyaka tolombosha. Vɔ mbeyaka mbɛdinya olimu aso la w’anto akina. Vɔ kokaka kana ɔnɛ: ‘Anto akina sambishaka efula ondeki. Ngande wayɔngɛnangɛna Jehowa olimu ami na?’—Ɛdika la 1 Joani 3:19, 20.
10 Tokanyi la mboka ya Jehowa mangana la yaso etale efula. (Isaya 55:9) Lo 1 Koreto 12:14-26 sho kondjaka kanyi mɔtshi ya woho wɔsa Jehowa weolo wadjaso, lɛnɛ ɛdikande etshumanelo la demba diele la bɛkɛ efula—asho, anya, ekolo, atui, ndo bɛkɛ dikina. Nyɛsɔ totokenda demba di’onto nganɛ wediɔ. Ande sɔnyi naka sho mbɛdinya asho l’anya aso kana ekolo l’atui aso lee! Lɛkɛ la lɛkɛ lekɔ l’olimu alɔ, koko bɛkɛ diakɔ tshɛ diekɔ ohomba ndo mbɔsamaka la nɛmɔ. Woho akɔ wâmɛ mbele, Jehowa nangaka olimu wokambɛyɛ l’anima ayɛ tshɛ, oyadi kânga akina wekɔ lo kamba efula kana wekɔ lo kamba yema tshitshɛ.—Ngalatiya 6:4.
11 Lam’ele demba nɛi hasambe olando, lotshundu, kana awui akina wa lo lɔsɛnɔ mbeyaka toshimba di’aha sho kamba efula, tena dimɔtshi, amɔtshi l’atei aso mbeyaka ndjoyaoka ɔnɛ tekɔ “wodu” kana ‘hawoleke tɔsa la nɛmɔ.’ Tete le aha ngasɔ mbatɔsa Jehowa. Bible totɛka ɔnɛ: “Beke diku dia dimba dienasu shati: Dio mbuleki wodu, dieko uhumba. La beke . . . dienasu shati: Dio nemiamaka yema tshitshe, dio mbalekasu nemia efula; beke diasu dia dingeno diatoyalaka la kenemo utamanya . . . Keli [Nzambi] akasanganya beke dia dimba, akaleki nemia leke lahumba.” (1 Koreto 12:22-24) Omalɔkɔ, onto tshɛ kokaka monga ohomba le Jehowa. Nde mbɔsaka olimu wokambɛso la nɛmɔ efula lo ndjela kɛnɛ kakokaso sala. Onde otema ayɛ hakotshutshuya dia wɛ nyomoleka kombola kambɛ Nzambi kɛsɔ ka ngandji ndo katokanɛ lo ntsha kɛnɛ tshɛ kakokayɛ mbosalɛ?
12 Lâsɔ, aha kamba olimu woleki wɔnɛ wakoka onto okina kamba mbele ohomba le Jehowa, koko dia wɛ sala kɛnɛ kakoka—anima ayɛ—otondo ayɛ wɛmɛ sala. Kɛnɛ kele ohomba lo asho wa Jehowa lo menda weolo wadjaso nto mɛnamaka oma lo dionga diananda asolo aso diaki la Yeso otsha le amato amɔtshi ahende lo nshi y’ekomelo ka lɔsɛnɔ lande la la nkɛtɛ.
Oshasha “w’Ushinga a Wulu” Waki Omoto Ɔmɔtshi Waketawɔma
13 Lushi la Tanu la dikɔlɔ lo Ngɔndɔ ka Nisana 8, mbakakome Yeso la Bɛtaniya, ngelo ngelo yele l’oholola wa lo lɛkɛ l’ehotwelo ka wonya ka Dikona di’Ɔlivɛ, yɔ mangana la Jerusalɛma suke la kilɔmɛtɛlɛ shato. Yeso aki l’angɛnyi l’osomba ɔsɔ—Mariya, Mata, la Lazaro l’ɔnangɛwɔ. Ondo mbala efula, vɔ wokolongolaka Yeso lakawɔ oko ɔngɛndangɛnda. Koko, Lushi la Samalo la dikɔlɔ, Yeso l’angɛnyi ande wakatɔlɛ mma laka Simɔna, kanga sudi ɔmɔtshi l’edjedja lele ondo Yeso mbakɔkɔnɔla. Etena kakalɛka Yeso lo mɛsa, Mariya akatshe dui dimɔtshi di’okitshakitsha diakɛnya ngandji k’efula kakandokaka pami kakolola ɔnango. Nde akole ɔlɔndɔ wa malashi “w’ushinga a wulu.” Tɔ kaki oshinga wolo mɛtɛ! Tɔ kakasondjamaka denariyo 300, falanga yɛdimi la difuto di’ose olimu di’ɔnɔnyi w’otondo. Nde akatela Yeso malashi w’opumu ɔsɔ l’ɔtɛ ndo l’ekolo. Nde akonya ekolo wa Yeso la divo diande.—Mako 14:3; Luka 10:38-42; Joani 11:38-44; 12:1-3.
14 Ambeki ande wakanyange heyama! Vɔ wakambwana vati: ‘Lande na nanya malashi nganɛ na?’ Judasɛ akashɛ lɔɔngɔngɔ lande la mbase lo mbetshiya ewo dia salɛ akanga a weola ɔlɔlɔ ko akate ate: “Okoko wana wakiwo kunsundja malashi one lu denariyo kama shatu, dia mbisha akanga a weula?” Mariya kombahola ndoko dui. Ko Yeso akatɛ ambeki ande ate: “Nyuwete. Okoko wana wôhenyahenyanyu? Ndi ambuntshela dikambu di’ololo [yoho ya ka·losʹ yakatatshi] . . . Ndi akatshi uku akandeyi ntsha. Ndi akamvutedi malashi dia nongosola dimba diami utsha lu diumbu. Mete kanyutelami nti: Lu ahuli tshe wa la kete wayuwutasambishaka lukumu l’ololo lone, wayutataka ndu dikambu diutshendi, dia ndjala euhwelu kandi.” Ande nganɛ wakahombe ɛtɛkɛta wa Yeso wa wangasanu ɛsɔ tutsha Mariya solo lee!—Mako 14:4-9; Joani 12:4-8.
15 Yeso akangɛnangɛna efula lo menda kɛnɛ kakatshe Mariya. Le Yeso, nde akatshe dui diasungana mandɔma. Yeso kombidja lomba lo dikambo di’ɔnɛ malashi akɔ waki oshinga wolo, koko nde akadje yimba lo dikambo di’ɔnɛ “ndi akatshi uku akandeyi ntsha.” Nde akakambe la diaaso diakandakondja ko akawosha kɛnɛ kakandakoke mbosha. Dikadimwelo dikina kadimolaka ɛtɛkɛta ɛsɔ ɔnkɔnɛ: “Nde akatshe kɛnɛ tshɛ kakandakoke ntsha,” kana, “Nde akatshe kɛnɛ kakinde la wolo wa ntsha.” (An American Translation; La Bible de Jérusalem) Oshasha wa Mariya aki wa l’anima ande tshɛ nɛ dia nde akasha kɛnɛ kakaleke ɔlɔlɔ le nde. Kɛsɔ mɛtɛ mbelɛwɔ kamba olimu l’anima ayɛ tshɛ.
Oshasha wa “Ekenga Ehendi” Waki Wadi Aki Odo
16 Nshi oko hiende tsho l’ɔkɔngɔ, lo Ngɔndɔ ka Nisana 11, Yeso aketsha lushi l’otondo lo tɛmpɛlɔ, lɛnɛ akawadje tamu dikambo dia lowandji lande, ndo lɛnɛ akandakadimola wembola a wolo wendana l’ofutelo w’elambo, eolwelo , ndo embola ekina. L’atei w’awui wakandamia Afundji la Afarisɛ, nde akate ndo dia woho ‘watowɔhɔtɔlaka wadi waki edo mvudu yawɔ.’ (Mako 12:40) Omalasɔ ko Yeso ndjɔsa kɔsa, ko nde mbidjasɛ lo Sɛkɛ dia Amato, lɛnɛ aki ɛshɛtɛ 13 wakawadjaka weshasha lo ndjela mbekelo y’ashidi y’Ase Juda. Nde akadjasɛ kanda ya wenya, ênda la yambalo tshɛ nganɛ wakadjaka anto eshasha awɔ l’ɛshɛtɛ akɔ. Akanga w’ɛngɔnyi efula wakaye, ondo amɔtshi wakayafɔnya ɔnɛ vɔ mbele akanga w’osembwe, kana dia ndjoyaɛnya tsho. (Ɛdika la Mateu 6:2.) Yeso akatɔsha omoto ɔmɔtshi asho lo yoho ya laande. Asho w’onto k’onto kokoka mɛna ndoko kiambokambo y’ohomba yakendanaka la omoto akɔ ndo la oshasha ande. Koko Yeso, ɔnɛ laki l’akoka wa mbeya etema w’anto akina, akeye ɔnɛ omoto akɔ aki “wadi aki udu.” Nde akeye ndo lofulo la falanga ya oshasha ande—‘ekenga ehende wa totshitshɛ, waki kondjala la nɛmɔ di’efula.’b—Mako 12:41, 42.
17 Yeso akelɛ ambeki ande oya le nde, dia nde tawaɛnyisha wetshelo wakinde suke la mbisha. Yeso akawatela ate: Nde “ambudja ushasha wuleki wudjisha akina tshe lu ekitshelu.” Lo woho wakandɛ̂dikola, kɛnɛ kakadje omoto ɔsɔ ndamɛ akaleke kakadje anto akina tshɛ kâmɛ. Nde akadje ‘kɛnɛ tshɛ kaki lande’—lofalanga lande l’okenga lakatshikala. Lo ntsha ngasɔ, nde ndamɛ akayaɛkɛ l’anya waki Jehowa ɔnɛ lakotsha ehomba aso. Omalɔkɔ, onto lakawaleke mandola oma l’ɛnyɛlɔ kakandɛnya k’onto lasha Nzambi ele ɔnɛ lele oshasha ande aki oko anyanya lo menda nɛmɔ diawɔ dia l’emunyi. Koko lo asho a Nzambi, vɔ mbakaleke ohomba!—Mako 12:43, 44; Jakoba 1:27.
Tokondja Wetshelo oma lo Woho Wɛna Jehowa Olimu Wokambɛso l’Anima Aso Tshɛ
18 Oma lo woho wakonge Yeso nde la amato ahende asɔ, tambokondja wetshelo ɔmɔtshi watonanda polo ndo l’evɔ lo menda woho wɔsa Jehowa olimu wokambɛso l’anima aso tshɛ. (Joani 5:19) Yeso kɔmbɛdinya wadi aki odo la Mariya. Nde akɔshi ekenga ehende wa wadi aki odo la nɛmɔ dia woho ɔnɛ wakandɔshi malashi waki Mariya “w’ushinga a wulu.” Lam’ele amato akɔ ahende wakakimɔ kɛnɛ kakaleke ɔlɔlɔ le wɔ, le Nzambi, eshasha akɔ ehende waki la nɛmɔ. Omalɔkɔ, toyakiyanyake naka kanyi y’ɔnɛ olimu ayɛ wekɔ anyanya yambokoyɛ nɛ dia wɛ hakoke kambɛ Nzambi lo yɛdikɔ yakombolayɛ mbokambɛ. Jehowa ngɛnangɛnaka kɛnɛ kawoshayɛ naka tɔ koleki ɔlɔlɔ le yɛ. Ohɔ dia Jehowa “atendaka utema,” ɔnkɔnɛ nde koleki mbeya okiyanu ayɛ.—1 Samuele 16:7.
19 Woho wɔsa Jehowa olimu wokambɛso l’anima aso tshɛ la dia monga la shɛngiya lo yoho yɔsaso ndo yasalɛso anto akina. Ande kɔlɔ kayoyala naka tayɔnyɔla weolo wadja anto akina kana mbɛdinya olimu aso shamɛ la w’anto akina lee! Lonyangu ko, Okristo ɔmɔtshi akafunde ate: “Mbala efula, anto amɔtshi mbutaka ɔnɛ naka wɛ bu ombatshi mboka, kete wɛ ndoko solo onto. Sho amɔtshi anɛ walɔ ta lɔlɔ dia ndjâla ‘paka’ apandjudi wa Diolelo ato, sho nangaka vɔ tɔsa ndo sho lawɔ la nɛmɔ.” Tatohɛke ɔnɛ sho kema la lotshungɔ la fundɛ onto kɛnɛ kahombande ntsha l’olimu w’Okristo l’anima ande tshɛ. (Romo 14:10-12) Jehowa ngɛnangɛnaka olimu wa l’anima tshɛ wokambɛ onto tshɛ la l’atei a miliyɔ y’apandjudi wa Diolelo, ndo sho lawɔ la dia ntsha ngasɔ.
20 Ko kayotota naka anto amɔtshi salaka yema tshitshɛ etena kewɔ l’akoka wa kamba olimu efula na? Naka wenya wasambisha onyaso ombetawudi wambokitakita, kete dui sɔ mbeyaka mɛnya dikumanyi diawenda ɔnɛ nde ekɔ l’ohomba w’ekimanyielo ndo w’ekeketshelo. L’etena kakɔ kamɛ, tatohɛke ɔnɛ le amɔtshi, kamba l’anima tshɛ mbeyaka fɔna efula la oshasha w’ekenga ehende wa totshitshɛ wakakimɔ wadi aki odo lo dihole dia fɔna la malashi waki Mariya w’oshinga wolo. Nshi tshɛ, ndeka ɔlɔlɔ sho kanyiyaka ɔnɛ anangɛso l’akadiyɛso mbokaka Jehowa ngandji ndo di’ɔnɛ ngandji ka ngasɔ ayowasokoya dia vɔ kamba efula—koko aha yema tshitshɛ—lo ndjela akoka awɔ. Lo mɛtɛ, ndoko okambi wa Jehowa wele la nkum’otema k’ɔlɔlɔ wayɔsɔnɔla dia kamba yema tshitshɛ l’etena kende l’akoka wa ndekanya lâsɔ l’olimu wakambɛnde Nzambi!—1 Koreto 13:4, 7.
21 Koko, le ekambi a Nzambi efula, mbokambɛ l’anima awɔ tshɛ akalɔmbɛ dia vɔ tetemala mbokambɛ oko ombatshi mboka—lutumu lele la difuto dia dimɛna efula. Ɛtshɔkɔ akɔna wakondjawɔ na? Kayotota lo dikambo diaso sho amɔ wanɛ wele tatôngaka l’akoka wa kamba oko ombatshi mboka—ngande akokaso mɛnya ɔnɛ tekɔ la yimba y’ambatshi mboka na? Wembola ɛsɔ mbayotɔkɛtshana lo sawo diayela.
[Footnotes]
a Lam’ele Matiasɛ mbakahɛnɛ Judasi lo dihole diande di’ɔpɔstɔlɔ, lokombo lande—koko aha la Paulo—mbakahombe mɛnama l’atei a wanɛ wakenga ave 12 wokami osomba. Kânga mbaki Paulo ɔpɔstɔlɔ, nde komonga l’atei w’apɔstɔlɔ asɔ 12.
b Okenga l’okenga aki yɛdikɔ ya lepton ɔtɔi, okenga woleki tshitshɛ wa falanga yakanandaka Ase Juda l’etena kɛsɔ. Lɛpɛta hiende akɛdimaka la 1/64 ka difuto di’ose olimu dia lushi l’otondo. Lo ndjela Mateu 10:29, onto akakokaka somba sɔlɛ pende la asariyo (assarion) ɔtɔi (okenga wɛdimi la lɛpɛta enanɛi), tofudu takalekaka oshinga wɔdu l’atei a tɔnɛ takalɛka ase wola. Ɔnkɔnɛ, omoto ɔsɔ aki mɛtɛ kanga wola, nɛ dia falanga yande akɛdima paka l’oshinga wa somba ɛsɔlɛ ɔtɔi kahanya l’ahende, onatshi wahakoke anto ndɛ kânga mbala ɔtɔi.
[Study Questions]
1, 2. (a) Naa diɛsɛ dioleki woke diakokaso kondja? (b) Lande na kele lo tena dimɔtshi sho hatokoke sala kɛnɛ tshɛ kakombolaso sala dia kambɛ Nzambi na?
3. Kakɔna kalongamɛ Jehowa oma le so sho tshɛ na?
4. Kambɛ Jehowa l’anima aso tshɛ kɛdikɛdi na?
5. Ngande wɛnya ɛnyɛlɔ k’apɔstɔlɔ ɔnɛ sho tshɛ hatokoke kamba olimu woho akɔ wamɛ na?
6. Lo wɛɛla wa Yeso w’ombuki a woho, kakɔna kakakomela ntɔngɔ yakonɛma lo “kete y’ololo,” ndo wembola akɔna wambɔma?
7. Elowa akɔna watɔ lɔtɔngɔ lakonɛma, ndo lande na atɔ elowa ɛsɔ lo weho wotshikitanyi na?
8. Ngande wɔsa Jehowa wanɛ washa kɛnɛ tshɛ koleki ɔlɔlɔ kakoka anima awɔ mbisha na?
9, 10. (a) Otsha lo tokanyi takɔna ta kɔlɔ takoka tɔtɔla otema aso? (b) Ngande wɛnya wɛɛla wa lo 1 Koreto 12:14-26 ɔnɛ Jehowa hatɛdinya l’anto akina lo kɛnɛ kosalɛso na?
11, 12. (a) Bonde kokoki anto amɔtshi ndjaoka ɔnɛ wekɔ “wodu” kana ‘hawowaɔshi la nɛmɔ’? (b) Ngande wɔsa Jehowa olimu wokambɛso?
13. (a) Akambo akɔna wakayokonyaka Mariya dia nde ndjotɛ Yeso malashi w’opumu l’ɔtɛ la l’ekolo na? (b) Malashi waki Mariya waki la nɛmɔ dia woho akɔna?
14. (a) Kakɔna kakasale ambeki lo menda tshelo yakatshe Mariya? (b) Ngande wakayɔtɛkɛtɛka Yeso Mariya?
15. Lande na kakangɛnangɛna Yeso lo menda kɛnɛ kakatshe Mariya, ndo wetshelo akɔna wambotokondja lo dikambo di’olimu wahombaso kambɛ Nzambi l’anima aso tshɛ na?
16. (a) Ngande wakeye Yeso oshasha wa tshitshɛ wakakimɔ wadi aki odo? (b) Ekenga waki wadi aki odo waki falanga ngana?
17. Ngande wakɛdikola Yeso oshasha wakakimɔ wadi aki odo, ndo oma l’ɛnyɛlɔ kɛsɔ, wetshelo akɔna wakondjaso lo dikambo dia oshasha aso otsha le Nzambi?
18. Wetshelo akɔna wambotokondja oma lo woho wakonge Yeso l’amato ahende asɔ na?
19. Lande na ahatahombe nombosha anto akina lo kɛnɛ kasalawɔ l’olimu a Nzambi na?
20. Kakɔna kele ɔlɔlɔ sho kanaka nshi tshɛ lo dikambo di’anyaso atɛmɔdi na?
21. Lutumu lakɔna lele la difuto latakambe anto amɔtshi, ko wembola akɔna wambwama na?
[Caption]
[Footnotes]
[Caption]
[Questions]
[Caption on page 10]
[Caption on page 10]
Mariya akakimɔ kɛnɛ koleki ɔlɔlɔ le nde, akatɛ Yeso malashi “w’ushinga wulu”
[Caption on page 12]
[Caption on page 12]
Ekenga wa wadi aki odo—oko anyanya lo menda oshinga awɔ koko waki la nɛmɔ di’efula lo asho wa Jehowa
[Caption on page 13]
[Review on page 13]
Ngande Wayoyokadimola Na?
◻ Kambɛ Jehowa l’anima ayɛ tshɛ kɛdikɛdi na?
◻ Ngande wɛnya wɛɛla wa lo 1 Koreto 12:14-26 ɔnɛ Jehowa hatɛdinya l’anto akina na?
◻ Lo ndjela kɛnɛ kakate Yeso lo dikambo dia malashi waki Mariya w’oshinga wolo la di’ekenga ehende wa totshitshɛ waki wadi aki odo, wetshelo akɔna wambotokondja lo dikambo dia mbisha Nzambi l’anima aso tshɛ?
◻ Kanyi yakɔna yahombaso monga layɔ otsha le anto akina lo menda nyɛ yele la Jehowa lo dikambo di’olimu wokambɛso l’anima aso tshɛ?