Esambishelo ka laande kayotatɛ Ngɔndɔ ka sato 1 dia mbelɛ anto oya lo Eohwelo
1. Etena kakɔna kayototatɛ dia mbelɛ anto oya lo Eohwelo ndo lande na kele esambishelo ka laande kɛsɔ kayonga la yema ya nshi efula ɔnɔnyi ɔnɛ?
1 Lushi la tanu, Ngɔndɔ ka sato 1, tayotatɛ esambishelo kaso ka laande ka l’ɔnɔnyi dia mbelɛ anto akina oya lo Eohwelo. Eohwelo kayosalema lo Ngɔndɔ ka sato 26, ndo dui sɔ mɛnyaka dia otshikitanyi la ɔnɔnyi wetshi, ɔnɔnyi ɔnɛ tayonga la nshi efula ya nkahanya akatshi wa leeta. Dui sɔ diayosha anto efula diaaso dia nkondja dikatshi dimɔtshi dia leeta, djekoleko naka wekɔ lo nsɛna lɛnɛ ele etshumanelo ekɔ la ɛtshi ka nkɛtɛ ka woke ka nsambisha.
2. Tɛdikɔ takɔna tambɔsama lo dikambo di’okondjelo w’akatshi wa leeta ndo lo kɛnɛ kendana la okindjekindjelo w’ɛtshi kaso ka nkɛtɛ?
2 Toyalɔngɔsɔlɛ: Dikumanyi diayotɛnya woho wayotokindjakindja ɛtshi kaso ka nkɛtɛ ndo ahole wakokaso ntshika akatshi wa leeta naka akanga wa luudu bu lawɔ. Naka akatshi wa leeta amɔtshi wambotshikala l’ɔkɔngɔ wa sho nshidiya nsambisha lo luudu la luudu l’ɛtshi kaso ka nkɛtɛ, kete sho kokaka mbakahanya kaanga l’esambishelo ka lo sɛkɛ. Omendji w’olimu pombaka ndjashikikɛ dia yɛdikɔ y’ɔlɔlɔ y’akatshi wa leeta wakakitshami lanɛ wakitshawɔ ekanda kana periodikɛ di’apandjudi mbaɔsa otsha l’esambishelo. Akatshi wa leeta asɔ wayokitshamaka yema yema, koko aha tshɛ mbala ɔtɔi. Sho pombaka mbɔsa paka akatshi wa leeta wayonga la so ohomba lo lomingu.
3. Ahombaso nama lo yimba etena kashaso anto akatshi wa leeta?
3 Kakɔna kayotota? Ndeka dimɛna ntɛkɛta lo tshena pe, nɛ dia dui sɔ diayotokimanyiya dia nsambisha anto efula. Lɛkɛ 4 lekɔ la ɛnyɛlɔ ka mbɔtwɛlɔ kakokaso ntshikitanya yema dia kiɔtɔnganyiya l’ɛtshi kaso ka nkɛtɛ. Lo mɛtɛ, tatosasɛke dia ntshɔ naka ompokami ekɔ lo mɛnya nsaki ndo ekɔ la ambola. Etena kakahanyaso akatshi wa leeta lo wikɛndɛ, sho pombaka nto mbisha anto periodikɛ naka kokaka. Lo Ngɔndɔ ka sato 2, tayoleka ndjasha dia nkahanya akatshi wa leeta lo dihole dia ntatɛ mbeka l’anto Bible.
4. Lande na kahombaso ndjasha l’ohetoheto tshɛ l’esambishelo ka laande kayosalema?
4 Tekɔ la elongamelo di’anto efula wayoya lo Eohwelo. Sawo diayoshama diayolembetshiya Yeso eende mɛtɛ. (1 Kɔr. 11:26) Diɔ diayɛnya ɛlɔlɔ wakondjaso oma lo nyɔi kande. (Rɔmɔ 6:23) Ndo diɔ diayotɛnya nto lande na kele ekɔ ohomba dia sho mboohɔka. (Jni. 17:3) Nyɛsɔ toyasha l’ohetoheto tshɛ l’esambishelo ka laande kɛsɔ!