Tɔlɔmbɔlake wekelo wa Bible dimɛna
1. Naa ɔkɛndɛ wele l’apandjudi weka l’anto Bible?
1 Ndooko onto lakoka nkambɛ Nzambi paka Jehowa “kookotodi.” (Jni. 6:44) Kaanga mbediɔ ngasɔ, apandjudi weka l’anto Bible pombaka mbisha lonya dia mbakimanyiya dia vɔ ndjasukanya la Shɛwɔ lele l’olongo. (Jak. 4:8) Dui sɔ nɔmbaka dia ndjalɔngɔsɔla. Mbadia tsho odingɔ ko mboka dimbola diofundami hakoke nkimanyiya ombeki aso dia nde nshihodia losango ndo nsala ehamelo.
2. Naa etombelo wakoka monga lo nɔmbɔla wekelo wa Bible dimɛna?
2 Dia nɔmbɔla wekelo wa Bible dimɛna, apandjudi pombaka nkimanyiya ambeki awɔ dia 1) nshihodia kɛnɛ ketsha Bible, 2) mbetawɔ kɛnɛ ketsha Bible, ndo 3) nkamba la kɛnɛ ketsha Bible. (Jni. 3:16; 17:3; Jak. 2:26) Nɔmbamaka ngɔndɔ efula dia nkimanyiya ombeki wa Bible dia ntakola wanya asɔ. Koko, nna tshɛ nembetshiyaka dikambo di’ohomba diakoka mbokimanyiya dia monga la diɔtɔnganelo la Jehowa ndo ndjakimɔ le nde.
3. Lande na kele embetsha w’eshika mbokaka ambola watshutshuya onto dia mbisha kanyi yande?
3 Kakɔna kakanyiya ombeki wa Bible?: Dia mbeya kana ombeki aso wa Bible amboshihodia ndo ambetawɔ kɛnɛ kekande, sho pombaka nkeketsha ombeki dia mbisha nkanyi yande ndo mbewɔ dia tɛkɛtaka efula. (Jak. 1:19) Onde nde akashihodisha kɛnɛ kata Bible lo dui diekinde? Onde nde koka dilembetshiya l’ɛtɛkɛta ande hita? Ngande wayaokande lo dikambo dia kɛnɛ kekinde? Onde nde mbetawɔka dia kɛnɛ ketsha Bible kekɔ dimɛna? (1 Tɛs. 2:13) Onde nde shihodiaka dia kɛnɛ kekande pombaka ntshikitanya yoho ya nde ya lɔsɛnɔ? (Kɔl. 3:10) Dia nkondja ekadimwelo lo ambola wa ngasɔ, sho pombaka mboka ambola watshutshuya onto dia mbisha kanyi yande l’ɔkɔmi tshɛ ndo mbohokamɛ.—Mat. 16:13-16.
4. Ahombaso nsala naka ombeki ekɔ l’okakatanu dia nshihodia kana nkamba la kɛnɛ kekande oma lo Bible?
4 Mbala efula, tokanyi ndo mbekelo mɔtshi monɛmaka wolo l’otema w’onto ndo nɔmbamaka etena k’otale dia tionula. (2 Kɔr. 10:5) Kakɔna kahombayɛ nsala naka ombeki ayɛ hetawɔ kana hakambe la kɛnɛ kekande? Wɛ pombaka monga la solo dia lotutsha lo ntshika dia etena k’otale mbeta dia Ɔtɛkɛta waki Nzambi ndo nyuma k’ekila monga la shɛngiya l’otema w’ombeki ayɛ. (1 Kɔr. 3:6, 7; Hɛb. 4:12) Lo dihole dia mbotshutshuya, mbala efula ndeka dimɛna nyu mbeta lo wekelo okina naka ombeki ayɛ ekɔ l’okakatanu dia nshihodia kana nkamba la wetshelo ɔmɔtshi wa lo Bible. Naka sho ntetemala mbeetsha la solo dia lotutsha ndo la ngandji tshɛ awui w’oma lo Bible, kete nde koka ndjotshutshuyama l’edjadja ka wonya dia nsala etshikitanu wahombama.