Tolowanya akoka aso wa nsambisha—Lo ndowanya ambeki wa Bible dia vɔ monga la mbekelo y’amɛna ya wekelo

Ohomba wa dikoka sɔ: Dia vɔ mpama polo ndo nkoma anto wambotshunda lo nyuma, ambeki wa Bible pombaka ndesha wɛɔngɔ ndo etema awɔ l’akambo efula oleki komɛka tsho lo wetshelo w’etatelo wa l’Ɔtɛkɛta wa Nzambi. (Hɛb. 5:12–6:1) Mbeka nɔmbaka dia mbidja welo. Dui sɔ nɔmbaka mbeya awui akina w’eyoyo laadiko dia kɛnɛ kambotoshilaka mbeya ndo nkana yimba lo ohomba w’awui akɔ. (Tuk. 2:1-6) Mbeka woho wa nsala eyangelo w’onto ndamɛ ayokimanyiya ambeki wa Bible dia vɔ monga l’akoka wa mbisha ekadimwelo lo ambola w’oma lo Bible lo nkamba l’ekanda aso w’Akristo. Welo wa l’otema ɔtɔi wayowodja dia nkamba la kɛnɛ kekawɔ ayowakimanyiya dia vɔ ndjeya nshika tanga la ntondo k’ekakatanu wayohomana la wɔ oko Akristo.—Luka 6:47, 48.

Woho wa nsala dui sɔ:

Tɔtɔmiya ohomba wa nyangaka ekimanyielo kaki Jehowa lo dɔmbɛlɔ la ntondo ka wekelo tshɛ.—Jni. 14:26; 1 Kɔr. 2:10.
Lo etatelo, nkeketsha ombeki ayɛ dia talɔngɔsɔdi la ntondo wekelo ande wa Bible. Ɛnyande dibuku diayɛ dia wekelo ndo etshande woho wakokande mbekɛ eshidi lo ɛtɛkɛta kana lo ditelo diele ohomba.
Kimanyiya ombeki ayɛ dia nde mbisha ekadimwelo wa ambola l’ɛtɛkɛta ande hita. Ewɔ dia nkonya wekelo lo ambola la ekadimwelo, mbuta ate ombeki mbadiaka tsho ekadimwelo mbala kakɔ ɔtɔi oma lo dibuku.
Keketsha ombeki ayɛ dia nde mbadiaka etenyi kɛmɔtshi k’Ɔtɛkɛta wa Nzambi lushi la lushi. Ɛnyande ekongelo ka wadielo wa Bible lo sitɛ kaso ka jw.org, kɛɛnya woho wakokande nsala dui sɔ. Dia monga la mbekelo ka mbadiaka Bible wa lushi la lushi nɔmbaka ndjashikikɛ, koko kɛsɔ nɔmbaka mbidja welo.—Osam. 1:2, 3.
Ɛnya ombeki ayɛ wa Bible woho wakokande nkondja ekadimwelo lo ambola w’oma lo Bible lo nkamba la Watchtower Library kana BIBLIOTHÈQUE EN LIGNE Watchtower. Kimanyiyande dia nde mbeya tolembetelo ta woho wakangema ekanda aso, djekoleko wɛnɛ wakamba la so lo nsanganya ya l’etshumanelo.

Hemba nsala nganɛ lo ngɔndɔ kɛnɛ:

L’ekomelo ka ɔtɛ a dui kana ka tshapita, lɔmba ombeki ayɛ wa Bible dia nde mbuta lo tshena pe lo ditelo dingana to kɛnɛ komande la mbeka. Naka wɛ bu l’ombeki, ta lo tshena pe divɛsa dimɔtshi di’oma lo Bible kana odingɔ ɔmɔtshi w’oma lo Tshoto y’Etangelo lo ditelo dingana to dia mpamia eokelo kayɛ ka wadielo.