Woho wakoka dɔmbɛlɔ kokimanyiya

Pamela mbutaka ate: “Etena kakamalongolaka esakelo wendana la hemɔ kami ka kansɛrɛ, mbala efula lakokaka wɔma wa mamba, koko etena kakamalɔmbaka Jehowa Nzambi, lakoke dia asolo ami wambotutala ndo lakakikɛ paa kakimi la tɔ aha la mboka wɔma. Koko, leke paka la paa k’efula ndo dɔmbɛlɔ diakakimanyiya dia mɛna akambo la sso di’ɔlɔlɔ. ‘Etena kamimbola anto woho wayaokami dimi mbatɛka nte, hayaoke dimɛna, koko lekɔ l’ɔngɛnɔngɛnɔ!’”

Eelo, hatokoke nkonga polo paka tambondama la hemɔ ka wolo, ko sho ndjɔlɔmba. Sho tshɛ pomanaka l’ekakatanu, wa weke kana wa totshitshɛ ndo mbala efula sho mbokaka dia tekɔ l’ohomba wa ekimanyielo dia ndɔshana la wɔ. Onde dɔmbɛlɔ koka nkimanyiya?

Bible mbuta ɔnɛ: “Kitsha wotsho ayɛ le Jehowa, ko nde ayokosukɛ. Nde hetawɔki pondjo dia onto ɔlɔlɔ nkɔ.” (Osambo 55:22) Ande esambelo kakondjaso oma l’ɛtɛkɛta ɛsɔ lee! Ko ngande wakoka dɔmbɛlɔ kokimanyiya? Etena kalɔmbayɛ Nzambi lo yoho ya dimɛna, nde ayokosha kɛnɛ keyɛ l’ohomba dia wɛ ndɔshana l’ekakatanu ayɛ.​—Enda kiombo yele l’ɔtɛ a dui ɔnɛ: “Wahɔ wakokayɛ nkondja oma lo dɔmbɛlɔ.”