2 | “Esambelo k’oma l’Afundelo”

BIBLE MBUTAKA ƆNƐ: “Akambo tshɛ wakafundama lo nshi y’edjedja wakafundama dia tosha wetshelo, dia oma lo ekikelo kaso ndo oma lo esambelo k’oma lo Afundelo, sho monga la elongamelo.”—RƆMƆ 15:4.

Kɛnɛ kalembetshiya dui sɔ

Bible kekɔ la tokanyi efula t’esambelo takoka tosha ekeketshelo ndo ekikelo keso la tɔ ohomba dia ndɔshana la tokanyi ta kɔlɔ. Losango la lo Bible toshaka nto elongamelo k’ɔnɛ keem’edja paa ya lo yimba yanga nshila.

Woho wakoka dui sɔ tokimanyiya

Sho tshɛ diɛnɛka l’awui wa sha paa efula lo ntena dimɔtshi; koko wanɛ wasowa la hemɔ k’ɔkɔmwɛlɔ kana ekiyanu mbeyaka monga ko wekɔ lo ndɔshana l’ɔkɔmwɛlɔ wa lo yimba kana ekiyanu lushi tshɛ. Ngande wakoka Bible kokimanyiya?

Bible mbishaka tokanyi efula t’amɛna takoka pɛnyama la tokanyi ta kɔlɔ. (Filipɛ 4:8) Tɔ koka ndodia yimba yaso la tokanyi takeketsha ndo tatutadia asolo takoka tokimanyiya dia mbahemɛ nsaki yaso.—Osambo 94:18, 19.
Bible koka tokimanyiya dia ntshika nkanyiya ɔnɛ sho bu ohomba.—Luka 12:6, 7.
Avɛsa efula wa lo Bible toshikikɛka dia sho bu ekalema ndo ɔnɛ Nzambi, Otungi aso shihodiaka tshɛ lo tshɛ woho wayaokaso.—Osambo 34:18; 1 Joani 3:19, 20.
Bible tolakaka dia Nzambi ayanga nkomiya awui tshɛ watosha paa lo yimba. (Isaya 65:17; Ɛnyɛlɔ 21:4) Etena kadiɛnɛso la tokanyi tasha paa, sho koka mɛna dia daka sɔ koka tosha wolo wa mbikikɛ.

Woho wakimanyiya Bible Jessica

Woho waki ɔkɔmwɛlɔ la shɛngiya le mi

“Etena kakimi l’ɛnɔnyi 25, laki l’ɔkɔmwɛlɔ w’efula ndo wakayombisholaka la hemɔ k’ɔkɔmwɛlɔ ka wolo efula. Lakadiɛnɛka l’awui wakete lo lɔsɛnɔ lami wakandjelɛka lo yimba. Adɔkɔtɛlɛ wakakimanyiya dia nshihodia dia hemɔ kami k’ɔkɔmwɛlɔ ndja oma lo tokanyi ta kɔlɔ takamakanyiyaka l’ɔtɛ w’awui washa paa wakakomɛ lo lɔsɛnɔ. Laadiko w’ekanga w’amɛna wakawambishaka, laki nto l’ohomba wa nsawola la dɔkɔtɛlɛ dia nde nkimanyiyami dia dimi nɔngɔsɔla ekanelo kami ka yimba.”

Woho wakimanyiya Bible

“Etena kakimi l’ɔkɔmwɛlɔ w’efula, lakaatɛka asolo, laki l’okiyanu w’efula ndo lakashishaka djɔ. Mbala efula l’otsho, tokanyi tatshinga wɔɔngɔ takalolaka tɔɔ lo yimba yami. Oko wadita Osambo 94:19, Nzambi koka tosamba ndo tɔladia naka tambɔmɛnama la ekiyanu. Ɔnkɔnɛ, lakakitshaka Bible ndo kalupɛ yami yele l’avɛsa wa nkeketsha suke la mbeto kami. Etena kakamashishaka djɔ, lakadiaka avɛsa amɔtshi wa lo Bible ndo lakatshikaka dia tokanyi ta Nzambi nkeketshami.

“Bible tokeketshaka dia minya tokanyi talɔshana la kɛnɛ keyaso lo dikambo dia Nzambi. Lo nshi yakete, lakayashikikɛka dia dimi komonga la nɛmɔ, kombokamaka ngandji ndo takimi ohomba. Koko lakayekaka dia tokanyi tɔsɔ hatɔtɔnɛ la Bible, nɛ dia tɔ mɛnyaka dia Nzambi ekɔ Shɛso ka ngandji ndo ka kɛtshi ɔnɛ layakiyanya lo dikambo dia ɔmɔmɔ la l’atei aso. Yema yema lakayotatɛka mbahemɛ tokanyi tɔsɔ lo dihole dia tɔ mbahemɛmi. Lakayekaka dia ndjaɔsa woho wa mbɔsa Nzambi. Ɔsɔ aki nna di’ohomba efula diakakimanyiya dia minya tokanyi ta kɔlɔ taki lami lo dikambo diami.

“Lekɔ lo kongɛɛ l’asolo wa lomɔlomɔ, etena kayoshila tokanyi tshɛ tasha paa. Mbeya dia ofukutanu wa lo yimba wayoshila lushi lɔmɔtshi, dui sɔ mbishakami wolo wa dimi ndɔshana l’elelo ami, oma ko kakianɛ ndo dui sɔ kimanyiyakami dia mbikikɛ ndo dia nkongɛɛ nshi yayaye yele dimi hatonga l’ɔkɔmwɛlɔ nto.”