Dimbola dia wɔdu diakoka onto tshɛ mimbola

Mary nde l’omɛnde John,a wekɔ lo mbidjasɛ lo wodja wele anto efula wakaye oma la Philippines dia ndjodjasɛ ndo ndjokamba elimu ndo vɔ wekɔ l’ɔngɛnɔngɛnɔ dia nsambisha anto asɔ. L’etena ka hemɔ ka COVID-19, Mary akatatɛ mbeka aha tsho l’anto wa lo wodja wakawadjasɛka koko ndo l’anto w’oma lo wedja ekina. Ngande wakandasale dui sɔ?

Mary akambolaka ombeki ande wa Bible tshɛ ate: “Onde wɛ mbeyaka onto okina lalanga mbeka Bible?” Naka nde mbuta ate eelo, nde akawɔlɔmbaka dia nde mbɛnyanya l’onto akɔ. Mboka dimbola dia wɔdu sɔ, akongaka l’etombelo w’amɛna efula. Lande na? Nɛ dia anto efula wakekaka Ɔtɛkɛta wa Nzambi wakalangaka nkahana l’ase nkumbo ndo l’angɛnyi awɔ awui wakawekaka. Etombelo akɔna wakonge la dimbola sɔ?

Jasmin ombeki wa Bible waki Mary, akɔtɔlɛ dia nde teka Bible l’anto anɛi w’eyoyo. Kristine lele ɔmɔtshi la l’atei awɔ akangɛnangɛna la wekelo wa Bible efula ndo akalɔmbɛ Mary dia vɔ mbekaka mbala hiende lo lomingu. Etena kakambola Mary Kristine dia kana nde akeyaka onto okina lalanga mbeka Bible, Kristine akokadimola ate: “Eelo, layanga kɛnya angɛnyi ami akina nto.” Lo mingu ngana tsho, Kristine akɛnya Mary anto anɛi wakalangaka mbeka Bible. L’ɔkɔngɔ diko, Kristine akayɔtɔlaka Mary otsha le anto akina wanɛ wakayɔɔtɔlaka vɔ lawɔ nto le anto akina.

Kristine akalangaka nto dia nkumbo kande ka la Philippines mbeka vɔ lawɔ Bible. Ɔnkɔnɛ, nde akasawola l’ɔnande la womoto lakawelɛka Andrea. L’etatelo, Andrea akafɔnyaka dia ‘Ɛmɛnyi wa Jehowa wekɔ yaato y’ɔtɛmwɛlɔ yele bu la mbetawɔ le Yeso ndo vɔ kambaka paka la Daka di’Edjedja.’ Koko, l’ɔkɔngɔ wa vɔ mbeka mbala ɔtɔi keto, nde akayotshikitanyaka ekanelo kande kɛsɔ. Lam’akawekaka nde akate la diambo ate: “Lam’ele Bible mbata ngasɔ, dui sɔ pombaka monga mɛtɛ!”

L’ɔkɔngɔ w’etena kɛmɔtshi, Andrea akatɛnya Mary angɛnyi ande ahende ndo osekande la l’olimu dia ntatɛ mbeka Bible. Andrea aki nto la kose aki she la womoto lelɛwɔ Angela laki tshungu, lakahokamɛka etena kaketshaka Mary Andrea koko Mary kombeyaka dikambo sɔ. Lushi lɔmɔtshi, Angela akalɔmbɛ Andrea dia mbohomanya la Mary dia mbɔlɔmba dia vɔ mbeka Bible. Angela akalangaka awui wakandekaka. L’edja ka ngɔndɔ ɔtɔi, nde akakimɛ avɛsa efula l’ɔtɛ ndo akakombola dia vɔ mbekaka mbala nyɛi lo lomingu! L’ekimanyielo ka Andrea, Angela akatatɛ mbɔtɔ nsanganya mbala la mbala lo tshimbo ya vidɛo kɔfɛransɛ.

Lam’akɛnyi Mary dia Joshua y’omaki Kristine ekɔ lo ntshimbatshimba l’omamu etena kakawekaka Bible, Mary akɔlɔmbɛ dia kana nde kokaka mbeka kaamɛ la wɔ. Joshua akate ate: “Layohokamɛka tsho koko tombokake ndooko dimbola, naka wɛ nsala ngasɔ, kete layonyotshika.” Lo minitɛ tshanu y’etatelo ya wekelo awɔ, nde akambola ambola ndeka ndo Kristine ndo nde akakombola mbeka Bible.

Dimbola dia wɔdu diaki Mary akokonya dia monga l’ambeki wa Bible efula. Nde akɔshi yɛdikɔ ya ambeki ande amɔtshi mbekaka l’asekande Ɛmɛnyi ekina. Lo tshɛ, Mary akatatɛ mbeka l’ambeki 28 Bible w’oma lo wedja ɛnɛi wotshikitanyi.

Jasmin, ombeki ande wa ntondo wakatatɛkɛtshi l’etatelo ka sawo nɛ, akabatizama lo Ngɔndɔ ka nɛi 2021. Kristine akabatizama lo Ngɔndɔ ka tanu 2022 ndo akakalola la Philippines dia tonga kaamɛ la nkumbo kande. Ambeki akina ahende wakɛnyanya Kristine la Mary wakabatizama vɔ lawɔ. Angela akabatizama ngɔndɔ ngana l’ɔkɔngɔ ndo ekɔ lo nkamba kakianɛ oko ombatshi mboka wa pondjo. Joshua y’omaki Kristine l’ɔnawɔ la womoto Andrea ndo ambeki akina wa Bible wekɔ lo ntetemala mpama.

Lo ntambe ka ntondo, lokumu l’ɔlɔlɔ lakahandjɔnɛ esadi esadi lam’asa ase nkumbo ndo angɛnyi. (Jni. 1:​41, 42a; Ets. 10:​24, 27, 48; 16:​25-33) Lande na kahayambola ambeki ayɛ wa Bible ndo angɛnyi wa lo mɛtɛ dimbola dia wɔdu nɛ: “Onde wɛ mbeyaka onto okina lalanga mbeka Bible?” Naka ndo wɛ mimbola dimbola dia wɔdu nɛ, kete ondo wɛ mbeyaka ntana anto efula walanga dia mbeka Bible.