Kakɔna kata Bible lo kɛnɛ kendana la ndjalɛnga?
Okadimwelo washa Bible
Kaanga mbahatɛkɛka Bible akambo efula wendana la dui sɔ, tɔ hatone di’onto ndjalɛnga. Koko lo dihole dia mbika epole ɔsɛkɛ l’ɛnamelo ka lo demba, Bible mbutaka dia “ɛlɛngɛlɔ kahalanaki . . . ka ki ndo ka yimba ya memakana” kekɔ la nɛmɔ.—1 Petero 3:3, 4.
Bu kɔlɔ ndjalɛnga
Wamato wa kɔlamelo watɛkɛtama lo Bible wakayalɛngaka. Rɛbɛka lakatshukana la Isaka y’ɔna Abrahama akalɔtɛ zama dia paonyi dialɔtawɔ l’ɔhɛmbɛ, ɛkɔma wa paonyi ndo dɛngalɛnga dikina di’oshinga wolo diakawosha ɔnɛ lakahombe ndjonga okilo ande. (Etatelo 24:22, 30, 53) Woho akɔ waamɛ mbele, Ɛsta aketawɔ “dia vɔ mbɔlɔngɔsɔla demba” dia nde ndjɔsɔnama oko wadi aki nkumekanga ka lo diolelo dia Pɛrɛsiya. (Ɛsta 2:7, 9, 12) Ondo wakakambaka la “bisɔ” kana “dikitakita diotshikitanyi” dia nsala ɛlɔngɔswɛlɔ ɛsɔ.”—New International Version; Easy-to-Read Version.
Bɛnyɛlɔ dia lo Bible diatɛkɛta dikambo dia dɛngalɛnga lo yoho ya dimɛna. Ɛnyɛlɔ, onto lasha alako w’amɛna mbɛdikamaka la “zama dia paonyi . . . le toyi diahokamɛ.” (Tokedi 25:12) Woho akɔ waamɛ mbele Nzambi akɛdika woho wakandasalɛ wodja w’Isariyɛlɛ akambo la omi lalɛnga olonganyi ande la ɛkɔma, tɔshɛnɛtɛ ndo azama. Ɔlɛngɛlɔ ɔsɔ wakakonya wodja “olangala efula.”—Ɛzɛkiyɛlɛ 16:11-13.
Tokanyi ta kɔlɔ tele l’anto amɔtshi lo dikambo dia ndjalɛnga
Kanyi ya kɔlɔ: Lo 1 Petero 3:3, Bible tonaka “mbɛla divo ndo ndɔta dɛngalɛnga dia paonyi.”
Mɛtɛ: Avɛsa wele la ntondo ka divɛsa nɛ mɛnyaka dia Bible ndekaka mbika epole ɔsɛkɛ l’ohomba wele l’olangala wa l’etei k’otema woleki ɛnamelo ka l’andja dimɛna. (1 Petero 3:3-6) Sho tanaka wɛdikelo ɔsɔ ndo l’avɛsa akina wa lo Bible.—1 Samuɛlɛ 16:7; Tokedi 11:22; 31:30; 1 Timɔte 2:9, 10.
Kanyi ya kɔlɔ: Woho wakakite Jezabɛlɛ nkumekanga ka womoto ka kɔlɔ tile lo washo, shikikɛka dia ɔlɔtɛlɔ wa dɛngalɛnga ekɔ kɔlɔ.—2 Nkumi ya dikanga 9:30.
Mɛtɛ: Jezabɛlɛ lakasalaka awui w’alɔka ndo laki ondjakanyi akalomboshama l’ɔtɛ w’etsha ande wa kɔlɔ, koko aha l’ɔtɛ w’ɛnamelo kande.—2 Nkumi ya dikanga 9:7, 22, 36, 37.