Okiyanu kɛdikɛdi na?

Okiyanu ekɔ kɛnɛ kasala demba diayɛ etena kediɔ la ntondo ka dikambo dimɔtshi dia wolo. Wɔɔngɔ ayɛ tondjaka waa ɔrmɔnɛ efula lo demba diayɛ tshɛ. Waa ɔrmɔnɛ ɛsɔ konyaka di’onto mpɛnga esadi esadi, mendaka woho wakɛndakɛnda dikila, nunyaka kana mɔndjaka asasa ndo kakatadjaka emunyi. La ntondo ka wɛ ndjeya dimɛna kɛnɛ keeta, demba diayɛ mongaka suke dia nsala dikambo. Kam’ashila dui diakosha okiyanu, kete demba diayɛ diambokalola woho wakidiɔ.

OKIYANU WA DIMƐNA NDO WA KƆLƆ

Okiyanu ekɔ kɛnɛ katosalaka onto tshɛ dia ndɔshana l’ekakatanu kana la waale ɛmɔtshi. Wɔɔngɔ ayɛ mbatatɛ nkandola okiyanu wele layɛ. Okiyanu wa dimɛna kokimanyiyaka dia nsala dui dimɔtshi kana mbekama lo dui dimɔtshi esadi esadi. Ekiyanu ɛmɔtshi koka nto kokimanyiya dia nkotsha eyango ayɛ kana ndjalowanya dimɛna, ondo l’etena ka ɛgzamɛ, kana kakɔkɔnyawɔ ambola la ntondo ka kɔɔsa l’olimu kana lo kɛnyɔ mɔtshi.

Koko, okiyanu wamboviya, wa tshambandeko kana wahashile koka kosalɛ kɔlɔ. Etena katetemala demba diayɛ monga l’Okiyanu, wɛ koka ntatɛ nsowa lo demba, kana lo yimba. Dionga diayɛ ndo yoho yasalɛyɛ anto akina akambo koka ntshikitana. Okiyanu wahakomɛ koka nkonya nto onto dia monga mfumbe ka nnɔ dinɔnɔ dia wolo ndo ka toho tɔmɔ ta kɔlɔ dia ndɔshana l’okiyanu. Okiyanu mbeyaka kaanga ndjokonya onto lo ɔkɔmwɛlɔ, l’ɔlɛmbɛlɔ kana lo monga la tokanyi ta ndjadiaka.

Lam’ele okiyanu bu la shɛngiya ya woho waamɛ le anto tshɛ, vɔ koka nkonya lo weho wa hemɔ efula. Ndo vɔ kokaka monga la shɛngiya le suke la etenyi tshɛ ka demba.