1. Onde Nzambi mbele lo kiɔkɔ y’asui aso?

Ohomba wa dimbola sɔ

Anto efula tonaka dia ntɛmɔla Nzambi l’ɔtɛ womamawɔ ɔnɛ nde mbele lo kiɔkɔ y’asui aso.

Dui dia kana la diɔ yimba

Lo yoho yɛnama kana yahɛnama, ewandji w’ɛtɛmwɛlɔ efula mbetshaka dia Nzambi mbele lo kiɔkɔ y’asui aso. Ɛnyɛlɔ, amɔtshi mbutaka awui wayela anɛ:

• Mpokoso y’oma lo diangɔ diakatongama ekɔ dilanya di’oma le Nzambi.

• Ana mvɔka nɛ dia Nzambi ekɔ l’ohomba w’andjelo efula l’olongo.

• Nzambi mbetaka lo wedi wa ata, mbuta ate nde mbele lo kiɔkɔ y’asui efula.

Ko onde kɛnɛ ketsha ewandji w’ɛtɛmwɛlɔ ɛsɔ lo dikambo dia Nzambi kekɔ mɛtɛ? Ko onde sho koka mbetawɔ kɛnɛ kata ewandji w’ɛtɛmwɛlɔ ɛsɔ etena katawɔ ɔnɛ Nzambi mbele lo kiɔkɔ y’asui aso?

Kɛnɛ kata Bible

Nzambi bu lo kiɔkɔ y’asui aso.

Otondonga nde mbele lo kiɔkɔ y’asui aso, tshike dui sɔ totodiɔtɔnɛ la waonga ande watosholɛnde lo Bible. Ɛnyɛlɔ:

“Mboka ya [Nzambi] tshɛ yekɔ losembwe. . . . Nde ekɔ ɔlɔlɔ ndo osembɔki.”​—EOHWELO K’ƐLƐMBƐ 32:4.

“Nzambi ka mɛtɛ bu la kanyi ya nsala akambo lo yoho ya kɔlɔ!”​—JƆBƆ 34:10.

“Kanga-Wolo-Tshɛ bu la kanyi ya nsala kɔlɔ.”​—JƆBƆ 34:12.

Nzambi tonaka ɔtɛmwɛlɔ wa ta kashi lo dikambo dia nde.

Dui sɔ mendanaka ndo l’ɛtɛmwɛlɔ wetsha ɔnɛ Nzambi mbele lo kiɔkɔ y’asui aso, ndo l’ɛtɛmwɛlɔ wayasha l’ata ndo l’awui wa ngala.

“Amvutshi wekɔ lo mbuta prɔfɛsiya ya kashi lo lokombo la [Nzambi]. Dimi kombatoma kombadjangɛ kana ntɛkɛta la wɔ. Vɔ wekɔ lo nyotɛ ɛnɛlɔ ka kashi . . . Lokeso l’oma l’etema awɔ hita.”​—JƐRƐMIYA 14:14.

Yeso akaanya lɔkɛwɔ la dungi pende l’ase ɛtɛmwɛlɔ.

“Aha onto tshɛ latombelɛka ate, Nkumadiɔndjɔ, Nkumadingɔ, mbayɔtɔ lo Diolelo dia l’olongo, koko paka ɔnɛ latosalaka lolango la Papa lele l’olongo mbayɔtɔ. Lushi lɔsɔ anto efula wayombutɛ vate: ‘Nkumadiɔndjɔ, Nkumadindjɔ, sho kombutaka prɔfɛsiya lo lokombo layɛ ndo sho kosalaka akambo wa diambo efula lo lokombo layɛ?’ Ko dimi layowatɛ nte: ‘Dimi haanyeye kaanga yema! Nyomangane nyu atshi w’akambo wa kɔlɔ!’”​—MATEO 7:21-23.