Woho wa monga l’ɔngɛnɔngɛnɔ ndo ngɛnangɛna la kɛnɛ kele la yɛ

Kambaka olimu l’etete

“Nde akambe efula, akambe olimu w’ɔlɔlɔ la anya ande dia nde monga la yangɔ ya nkahana l’onto lele lo dihombo.”​—ƐFƐSƆ 4:28.

Otungi aso tokeketshaka dia sho monga la nkanyi y’ɔlɔlɔ lo dikambo dia olimu. Lande na? Onto lakamba olimu la wolo mongaka l’ɔngɛnɔngɛnɔ nɛ dia nde mongaka l’akoka wa ndjaakimanyiya ndo nkimanyiya nkumbo kande. Nde koka kaanga nkimanyiya onto ɔmɔtshi lele lo dihombo. Owandji ande w’olimu ayowɔsa la nɛmɔ. Ɔnkɔnɛ, onto lakamba olimu dimɛna salaka la wolo dia nama olimu ande. Afundelo mɛnyaka hwe difuto diaya lo nkamba olimu wa wolo oko “woshasha wa Nzambi.”​—Ondaki 3:13.

Ongaka la losembwe

“Tekɔ l’eshikikelo dia tekɔ la nkum’otema k’osembwe, nɛ dia sho kombolaka monga la losembwe lo akambo tshɛ.”​—HƐBƐRU 13:18.

Naka sho monga la losembwe, kete tayoyalɛmiya, tayonga l’ɔngɛnɔngɛnɔ w’omaka tshina di’otema ndo tayolalaka djɔ ya baku l’otsho. Laadiko a laasɔ, anto akina wayoyaɛkɛ le so ndo wayotɔlɛmiya. Anto wele keema la losembwe ndjahondjaka awui w’amɛna asɔ. Ndo nto, nkum’etema yawɔ koka mbowaɛndja onongo ndo vɔ koka ndjonga la wɔma w’ɔnɛ lushi lɔmɔtshi anto akina koka ndjoshola awui waha la losembwe wasalawɔ.

Ongaka la kanyi yele la wɛdimo lo kɛnɛ kendana la falanga

“Lo lɔsɛnɔ lanyu, tanyongake la ngandji ka falanga, koko nyɔngɛnangɛnake la kɛnɛ kele la nyu.”​—HƐBƐRU 13:5.

Sho mongaka l’ohomba wa falanga dia nsomba mbo ya ndɛ ndo diangɔ dikina diele ohomba. Koko, “ngandji ka falanga” ekɔ waale efula. Tɔ koka nkonya onto dia ndeka nkamba la wenya ande efula ndo la wolo ande dia nyomoleka ntetemala nyanga falanga efula. Oyangelo wa falanga wa ngasɔ koka mfukutanya dimama dia diwala diande, mboshishɛ wenya wahombande mbetshaka l’anande ndo kaanga ndanya yooge yande. (1 Timɔte 6:9, 10) Kɛnɛ koleki tshɛ ele, onto lalanga falanga amboleka, mbeyaka mpembama diaha monga la losembwe. Pami kɛmɔtshi ka lomba akate ate: “Kanga kɔlamelo ayolongola ɛtshɔkɔ efula, koko ɔnɛ lasamanya dia nkondja ɔngɔnyi hatotshikala aha l’onongo.”​—Tokedi 28:20.

Sɔna wetshelo woleki tshɛ dimɛna

“Lama lomba l’oshika ndo dikoka di’ekanelo ka yimba.”​—TOKEDI 3:21.

Wetshelo wa dimɛna tokimanyiyaka dia sho monga anto wambotshunda wɛkɛwɔ otema ndo ambutshi w’eshika. Koko, wetshelo akɔ hawokoke tosha ekokelo kana ɔngɛnɔngɛnɔ wa pondjo. Dia ntondoya l’awui tshɛ wa lo lɔsɛnɔ, tekɔ l’ohomba wa wetshelo watosha Nzambi. Afundelo mbutaka di’onto lahokamɛ Nzambi: “Kɛnɛ tshɛ kasalande kayolowana.”​—Osambo 1:1-3.