WEKELO 4
Woho wa nkamba la falanga
“Sangweyu tshe diatushikikalaka uma le ului w’andaki a yimba.”—Tukedi 20:18
Sho tshɛ tekɔ l’ohomba wa falanga dia nkotsha ehomba w’ase nkumbo yaso. (Tukedi 30:8) Ndo nto, ‘falanga mbishaka ekokelo.’ (Undaki 7:12) Oko wenyu atshukanyi, nyu koka monga l’okakatanu dia nkɛtshanya awui wendana la falanga, koko tanyetawɔke pondjo dia falanga ntondja ekakatanu lo diwala dianyu. (Ɛfɛsɔ 4:32) Atshukanyi pombaka mbɛkanɛ etema ndo nkamba kaamɛ etena kɔsawɔ yɛdikɔ yendana la woho wa nkamba la falanga yawɔ.
1 NYOKONGƐ AKAMBO DIMƐNA
KƐNƐ KETSHA BIBLE: “Onto akɔna l’atei anyu lalanga mbika luudu lotangakadi ko nde hatadjashi ntondo dia nkamba akumi ndo menda kana nde ayonga l’akoka wa lishidiya?” (Luka 14:28) Ekɔ ohomba efula nyu mbɔsa yɛdikɔ kaamɛ lo woho wahombanyu nkamba la falanga yanyu. (Amose 3:3) Nyoshikikɛ kɛnɛ kenyu l’ohomba dia nsomba ndo lofulo la falanga layokamba la nyu. (Tukedi 31:16) Aha ɔnɛ nyekɔ la falanga ya nsomba ɛngɔ kɛmɔtshi, kete laasɔ ɔnɛ nyu pombaka kisomba. Nyewɔ abasa ndo nyokambe paka la falanga yele la nyu.—Tukedi 21:5; 22:7.
KƐNƐ KAKOKANYU NSALA:
Naka nyambokondja dikuta dia laadiko l’ekomelo ka ngɔndɔ, kete nyu pombaka mbɔsa yɛdikɔ lo woho wahombanyu nkamba la diɔ
Naka hanyokondjisha dikuta dia kambe l’ekomelo ka ngɔndɔ, kete nyu pombaka nsala ekongelo dia nkitshakitsha adepasɛ. Ɛnyɛlɔ, nyu mbeyaka ndjakongɛ dia ndɛka akatshikatshi, lo dihole dia ndɛka nyama lushi tshɛ
2 NYODIHWANE ETEMA NDO NYONGE LA WƐDIMO
KƐNƐ KETSHA BIBLE: “Tekɔ lo mbidja welo dia nsala akambo tshɛ la losembwe, aha tsho lo washo wa Jehowa, koko ndo lo washo w’anto.” (2 Kɔrɛtɔ 8:21) Tɛ olonganyi ayɛ mɛtɛ lo kɛnɛ kendana la dikuta diafutamayɛ ndo diakamba la yɛ.
Kɛtshanyaka kaamɛ l’olonganyi ayɛ mbala tshɛ la ntondo ka mbɔsa yɛdikɔ ya woke yendana la falanga. (Tukedi 13:10) Sawolaka lo kɛnɛ kendana la falanga ayonyokimanyiya dia monga la wɔladi lo diwala dianyu. Ɔsa falanga yakondjayɛ, aha oko yayɛ hita, koko oko falanga ya nkumbo k’otondo.—1 Timɔte 5:8.
KƐNƐ KAKOKANYU NSALA:
Nyoshikikɛ lofulo la falanga lakoka olonganyi ɔmɔtshi nkamba la yɔ aha la mimbola osekande
Tanyokongake dia paka okakatanu wambotomba, ko nyu ndjosawola akambo wa falanga