ƆKƆNDƆ 4

Lande na kakawashisha edjaselo kakiwɔ

ENDA kɛnɛ kambotomba kakianɛ. Adama la Eva wambotshanyema oma l’ekambɔ k’Ɛdɛna ka dimɛna efula. Onde wɛ mbeyaka lande na?

Nɛ dia vɔ wakasale dikambo dimɔtshi dia kɔlɔ efula. Diɔ diakɔ diambowasha Jehowa dilanya. Onde wɛ mbeyaka dikambo diakɔ dia kɔlɔ diakatshe Adama la Eva oka?

Vɔ wakatshe dikambo dimɔtshi diakâshimbe Nzambi. Nzambi akawasha dikimɔ dia vɔ ndɛ elowa w’etamba wa l’ekambɔ. Koko, di’otamba ɔmɔtshi, Nzambi akawatela di’aha vɔ ndɛ elowa w’oma lɔkɔ, watokovɔ. Otamba akɔ aki ekola kaki Nzambi ndamɛmɛ. Ndo sho mbeyaka dia hatohombe mbɔsa ɛngɔ kakana, shi mɛtɛ? Ko kakɔna kakatombe na?

Lushi lɔmɔtshi lam’aki Eva ndamɛmɛ l’ekambɔ, olui akɔ̂tɛkɛtɛ. Ohotokokanyiya dia dikambo sɔ! Nde akatela Eva dia ndɛ olowa w’otamba wakâsekɛ Nzambi. Lam’akatonge Nzambi elui, nde kombasha akoka wa vɔ tɛkɛta. Diakɔ mbele, ekɔ paka onto ɔmɔtshi mbakatɛkɛtsha olui. Onto akɔna ɔsɔ na?

Komonga Adama. Omalɔkɔ, akahombe monga ɔmɔtshi a l’atei w’anto wakatonge Nzambi edja la ntondo ka nde tonga kɛtɛ. Anto akɔ asɔ, andjelo mbewɔ ndo hatokoke mbaɛna. Ondjelo ɔmɔtshi akayokomaka kanga lotamanya l’efula. Nde akayotatɛka la kanyiya ɔnɛ nde kokaka monga nkumekanga oko Nzambi. Ndo nde akalange di’anto mbokitanyiyaka lo dihole dia kitanyiya Jehowa. Nde mbaki ondjelo akɔ wakatɛkɛtsha olui.

Ondjelo akɔ aki l’akoka wa kesa Eva. Etena kakandawotela dia nde ayokoma oko Nzambi naka nde ndɛ olowa akɔ, Eva akawetawɔ. Omalɔkɔ mbakandale ndo Adama nde lawɔ nto. Adama la Eva wakahindolɛ Nzambi, ndo diɔ diakɔ diakawashisha edjaselo kawɔ ka l’ekambɔ ka dimɛna.

Koko lushi lɔmɔtshi, Nzambi ayolanga mɛna dia kɛtɛ k’otondo kaya dimɛna efula oko ekambɔ k’Ɛdɛna. Wɛ ayeya l’ɔkɔngɔ woho akɔna wayoyokoka mbisha lonya dia kikonya ɔsɔku. Koko, kakianɛ, tênde yema kakɔna kakakomela Adama la Eva.

Etatelu 2:​16, 17; 3:​1-13, 24; Enyelo 12:⁠9.