TSHAPITA 8

Anto Akina Toleka

DIMI shikikɛka dia wɛ ayetawɔ dia dimi la yɛ hatɛdimi l’anto akina ndo vɔ toleka woke ndo wolo. Ondo wɛ koka mimbola ɔnɛ anto akɔna ɔsɔ wele sho hatɛdimi la wɔ na?. . . Onto ɔmɔtshi ko Jehowa Nzambi. Ko kayotota dikambo di’Ɔnande lele Ombetsha a Woke na? Onde nde toleka?. . . Eelo.

Yeso akasɛnaka nde la Nzambi l’olongo. Nde aki Ɔnande la lo nyuma kana ondjelo. Onde Nzambi mbakatonge andjelo, kana ana akina wa lo nyuma?. . . Eelo, nde mbakatonge miliyɔ efula ya andjelo. Dimi la yɛ hatɛdimi la andjelo asɔ ndo vɔ toleka wolo.​—⁠Osambu 104:4; Danyele 7:⁠10.

Onde wɛ akohɔ lokombo la ondjelo wakatɛkɛta la Mariya?. . . Ngabiriyɛlɛ mbele lokombo lande. Nde akatɛ Mariya ate ɔnande ayonga Ɔna Nzambi. Nzambi akadje lɔsɛnɔ l’Ɔnande la lo nyuma lo dikundju diaki Mariya dia Yeso mbotɔ oko ɔna ashashi lanɛ la nkɛtɛ.​—⁠Luka 1:​26, 27.

Onde wɛ mbetawɔka dihindo sɔ? Onde wɛ mbetawɔka dia Yeso akasɛnaka nde la Nzambi l’olongo?. . . Yeso akate dia nde akasɛnaka kâmɛ la Nzambi. Ngande wakeye Yeso awui asɔ na? Lam’akinde eke dikɛnda, ondo Mariya akawotɛ kɛnɛ kakate Ngabiriyɛlɛ. Ndo nto, ondo Yɔsɛfu akatɛ Yeso dia Nzambi mbaki She ka pɛtɛ pɛtɛ.

Lam’akabatizama Yeso, Nzambi akatɛkɛta oma l’olongo ate: ‘Ɔnɛ ekɔ Ɔnami.’ (Mateu 3:17) Ndo l’otsho wa la ntondo ka nyɔi kande, Yeso akalɔmbɛ ate: “Kakiane, Papa, untumbuli la ntundu kaye la lutumbu laki la mi kame la ye ntundu andja watatungama.” (Joani 17:⁠5) Eelo, Yeso akalɔmbɛ dia Nzambi mbokaloya nto otsha l’olongo dia vɔ tɔsɛna nto kâmɛ. Ngande wakandakoke tɔsɛna lɛkɔ na?. . . Paka naka Jehowa Nzambi ndamɛ kadimola Yeso nto dia nde monga onto la lo nyuma kana ondjelo.

Kakianɛ lekɔ lo nanga kombola dimbola dimɔtshi di’ohomba efula. Onde andjelo tshɛ mbele anto w’ɛlɔlɔ? Akanayɛ lo dikambo sɔ?. . . Eelo, l’etena kɛmɔtshi ka lo nshi yakete vɔ tshɛ waki anto w’ɛlɔlɔ. Aki ngasɔ nɛ dia Jehowa mbakatonge andjelo akɔ ndo diangɔ tshɛ diakatonge Jehowa diekɔ ɔlɔlɔ. Koko ondjelo ɔmɔtshi akayongaka onto la kɔlɔ. Ngande wakasalema dikambo sɔ na?

Dia sho kondja okadimwelo, sho pombaka kawola l’etena kakatonge Nzambi pami la womoto la ntondo, mbut’ate Adama la Eva. Anto amɔtshi mbutaka ɔnɛ ɔkɔndɔ w’anto asɔ kema mɛtɛ. Koko Ombetsha a Woke akeyaka di’ɔkɔndɔ ɔsɔ waki mɛtɛ.

Lam’akatonge Nzambi Adama la Eva, nde akâkitsha l’ekambɔ ka dimɛna efula kakawelɛka ɔnɛ Ɛdɛna. Ɔsɔ aki ekambɔ mbut’ate paradiso. Adama la Eva wakakoke mbota ana efula, monga la nkumbo ka woke ndo nsɛna lo Paradiso pondjo pondjo. Koko vɔ wakahombe kondja wetshelo ɔmɔtshi w’ohomba efula. Takashile la tɛkɛta dikambo dia wetshelo akɔ. Tende kana takohɔ wetshelo akɔ.

Jehowa akatɛ Adama la Eva dia vɔ wakakoke ndɛ oseka olowa tshɛ wakawalangaka oma l’esongo waki l’ekambɔ. Koko aki osongo ɔtɔi wele tâkawahombe ndɛ elowa w’oma lɔkɔ. Nzambi akawatɛ kɛnɛ kakahombe mbâkomɛ naka vɔ ndɛ elowa w’oma l’osongo ɔsɔ. Nde akate ate: “We ayuvo.” (Etatelu 2:17) Lâsɔ, wetshelo akɔna wakahombe Adama la Eva kondja na?. . .

Aki wetshelo wa monga l’okitanyiya. Eelo, lɔsɛnɔ nemanɛka l’okitanyiya wele l’onto otsha le Jehowa Nzambi! Adama la Eva tâkawahombe mbuta tsho ɔnɛ tayonga l’okitanyiya otsha le nde. Vɔ wakahombe mɛnya okitanyiya awɔ oma l’awui wakawahombe sala. Otowonga l’okitanyiya otsha le Nzambi, tshike wotɛnya dia vɔ mbôkaka ngandji ndo nangaka dia nde monga Omboledi awɔ. Ɔsɔku mbotowokoka nsɛna pondjo pondjo lo Paradiso. Ko naka vɔ wakale olowa w’oma l’osongo ɔsɔ, lâsɔ dikambo sɔ ɛnyadiɔ na?. . .

Diɔ mɛnyaka dia vɔ komonga mɛtɛ la lowando lo kɛnɛ kakawasha Nzambi. Onde wɛ otonga l’okitanyiya otsha le Jehowa otondonga wɛ aki l’ekambɔ kɛsɔ?. . . Ntondo, Adama la Eva waki l’okitanyiya. Koko onto ɔmɔtshi lakâleke akakese Eva. Nde akatondoya dia tshutshuya Eva dia nde pindolɛ Jehowa. Onto akɔna ɔsɔ na?. . .

Bible mbutaka dia olui ɔmɔtshi akatɛkɛta nde la Eva. Koko wɛ mbeyaka dia olui hakoke tɛkɛta. Lâsɔ ngande wakakoke olui ɔsɔ tɛkɛta na?. . . Ondjelo ɔmɔtshi akɛnya diele oko olui mbatɛkɛta. Koko tete le ondjelo ɔsɔ mɛtɛ mbakatɛkɛtaka. Ondjelo ɔsɔ akatatɛ kanyiya awui wa kɔlɔ. Nde akalange dia Adama nde la Eva mbɔtɛmɔla. Nde akalangaka dia vɔ salaka awui wakandate. Nde akalange mbɔsa dihole diaki Nzambi.

Ɔnkɔnɛ, ondjelo wa kɔlɔ ɔsɔ akadje tokanyi ta kɔlɔ lo yimba yaki Eva. Nde akawotɛ oma lo tshimbo y’olui ate: ‘Nzambi akakokese. Wɛ hatovɔ naka wɛ ndɛ olowa w’oma l’osongo ɔsɔ. Wɛ ayonga la lomba oko Nzambi.’ Onde wɛ otokoka mbetawɔ kɛnɛ kakataka ondjelo ɔsɔ?. . .

Eva akatatɛ nanga ɛngɔ kaki Nzambi kombosha. Nde akale olowa w’oma l’osongo wakawâshimbe. Oma lâsɔ, nde akayosha ndo Adama. Adama kombetawɔ kɛnɛ kakate olui. Koko mposa kande ka monga kâmɛ la Eva akaleke mposa kande ka monga kâmɛ la Nzambi wolo. Ɔnkɔnɛ, Adama nde lawɔ akale olowa w’oma l’osongo ɔsɔ.​—⁠Etatelu 3:​1-6; 1 Timote 2:⁠14.

Dui sɔ diakonge l’etombelo akɔna na?. . . Adama la Eva komonga nto anto wa kokele, vɔ wakatshunde esombe ndo wakavu. Lam’ele vɔ komonga nto kokele, anawɔ tshɛ komonga kokele vɔ lawɔ, lâsɔ vɔ tshundaka esombe ndo mvɔka. Nzambi kombuta kashi! Lɔsɛnɔ nemanɛka mɛtɛ l’okitanyiya otsha le nde. (Romo 5:12) Bible totɛka dia ondjelo ɔsɔ wakakese Eva ko Satana Diabolo, ndo andjelo akina wakatɔmbɔkɔ lande mbelamɛka ɔnɛ ɛdiɛngɛ.​—⁠Jakoba 2:19; Enyelo 12:⁠9.

Onde wɛ ambokoka mboka kakianɛ lande na kakayokomaka ondjelo w’ɔlɔlɔ waki Nzambi onto la kɔlɔ?. . . Aki nɛ dia nde akatatɛ kanyiya awui wa kɔlɔ. Nde akalange monga Lâdiko di’anto tshɛ. Nde akeyaka dia Nzambi akatɛ Adama la Eva dia mbota ana, ɔnkɔnɛ, nde akalange dia vɔ tshɛ mbɔtɛmɔlaka. Diabolo nangaka di’onto tshɛ tɔmbɔkwɛ Jehowa. Diakɔ diayangande dia mbidja tokanyi ta kɔlɔ lo wɛɔngɔ aso.​—⁠Jakoba 1:​13-15.

Diabolo mbutaka dia ndoko onto mɛtɛ loka Jehowa ngandji. Nde mbutaka ate dimi la yɛ hatoke Jehowa ngandji ndo sho hatolange mɛtɛ sala kɛnɛ kata Nzambi. Nde mbutaka ate sho mongaka l’okitanyiya otsha le Jehowa paka lam’asalema awui tshɛ woho walangaso. Onde Diabolo ekɔ lo mbuta mɛtɛ? Onde ngasɔ mbasalaso?

Ombetsha a Woke akate ate Diabolo ekɔ kanga kashi! Yeso akɛnya dia nde mɛtɛ akokaka Jehowa ngandji lo monga l’okitanyiya otsha le Nde. Ndo Yeso komonga l’okitanyiya otsha le Nzambi paka etena kaki dikambo sɔ wɔdu. Nde akasalaka dikambo sɔ tena tshɛ oyadi etena kakawodjɛka anto tolonga di’aha nde sala dikambo sɔ. Nde akatshikala la kɔlamelo otsha le Jehowa polo ndo lo nyɔi kande. Diakɔ diakawolola Nzambi oya lo lɔsɛnɔ la pondjo.

Lâsɔ onto akɔna akokayɛ mbuta ɔnɛ nde mbele otunyi aso woleki woke?. . . Eelo, ekɔ Satana Diabolo. Onde wɛ koka mbɛ̂na la washo?. . . Ndooko! Koko sho mbeyaka dia nde ekɔ ndo dia sho hatɛdimi la nde ndo nde toleka wolo. Ko onto akɔna lele Diabolo hɛdimi la nde na?. . . Jehowa Nzambi. Ɔnkɔnɛ, sho mbeyaka dia Nzambi koka tokokɛ.

Adia awui wendana l’Onto lahombaso tɛmɔlaka: Euhwelu k’Elembe 30:​19, 20; Jashua 24:​14, 15; Tukedi 27:​11, ndo Mateu 4:⁠10.

[Osato wa lo lɛkɛ 47]

Kakɔna kele ondo Mariya nde la Yɔsɛfu wakatɛ Yeso?

[Osato wa lo lɛkɛ 48, 49]

Ngande wakakoke Adama la Eva nsɛna pondjo pondjo lo Paradiso?

[Osato wa lo lɛkɛ 50]

Akɔna akasale di’olui tɛkɛta la Eva?

[Esato wa lo lɛkɛ 50]

Kakɔna kakakomɛ Adama la Eva l’ɔkɔngɔ wa vɔ pindolɛ Nzambi?