ƆKƆNDƆ 5

Lɔsɛnɔ la shɔkɔ lambotatɛ

L’ANDJA w’ekambo k’Ɛdɛna, Adama la Eva waki la pâ efula. Vɔ wakahombe kamba la wolo tshɛ dia kondja mbo ya ndɛ. Vɔ wakɛnyi dia atɛndɛ l’ahangola nkɔi wambotomba l’omamu awɔ, lo dihole dia elowa w’amɛna wa vɔ ndɛ tomba. Ɔsɔ kele akambo wakatshama etena kakatɔmbɔkwɛ Adama la Eva Nzambi ndo kakawahandjola lɔngɛnyi lasawɔ lande.

Koko, kɔlɔ koleki lâdiko di’awui asɔ tshɛ ko, Adama la Eva wakatatɛ la mvɔ. Ohɔ dia Nzambi akawaewola dia naka vɔ ndɛ olowa w’otamba wakasekɛma, kete vɔ waki la dia mvɔ. Eelo, lushi lakawale, vɔ wakatatɛ la mvɔ. Nde tolele takiwɔ dia mɔnyɔla kɛnɛ kakawatɛ Nzambi lee!

Ana waki Adama la Eva tshɛ wakayotɔka l’ɔkɔngɔ wa Nzambi mbitshanya ambutshi awɔ oma l’ekambɔ k’Ɛdɛna. Mbuta ate ndo anawɔ nto wakahombe tshunda esombe ndo mvɔ.

Otondonga Adama la Eva wakakitanyiya Jehowa, tshike vɔ l’anawɔ wotonga la lɔsɛnɔ l’ɔngɛnɔngɛnɔ. Vɔ tshɛ wotohomba monga la lɔsɛnɔ l’ɔngɛnɔngɛnɔ pondjo pondjo la kɛtɛ. Ndoko onto lototshunda osombe, mundama la hemɔ ndo mvɔ.

Lolango la Nzambi ele di’anto wonge la lɔsɛnɔ la pondjo l’ɔngɛnɔngɛnɔ, ndo Nde mbishaka daka ɔnɛ ɔsɔku mbayoyala lushi lɔmɔtshi. Aha ɔnɛ kɛtɛ keto mbayonga dimɛna, koko ndo anto tshɛ wayonga l’alemba a wolo. Ndo oseka onto tshɛ la kɛtɛ ayonga ɔngɛnyi w’ɔlɔlɔ le akina ndo ayonga ɔngɛnyi a Nzambi.

Koko lɔngɛnyi laki Eva la Nzambi kombiviya. Omalɔkɔ, lam’akandote ana, komonga dui dia wɔdu le nde. Nde akahombe mbota la pâ. Mɛtɛ, mɔnyɔla awui wa Jehowa akawela otshutshumalo w’efula, onde wɛ mbetawɔka dikambo sɔ oka?

Adama la Eva wakote ana w’apami efula ndo wa amato. Lam’akotɔ ɔn’awɔ l’enondo, vɔ wakawɔlɛ Kɛna. Ɔn’awɔ la hende wakawɔlɛ: Abɛlɛ. Kakɔna kakâkomela na? Onde wɛ mbeyaka?

Etatelu 3:​16-23; 4:​1, 2; Enyelo 21:​3, 4.