ƆKƆNDƆ 14
Nzambi ambohemba mbetawɔ k’Abarahama
ONDE wɛ ekɔ lo mɛna kɛnɛ kasala Abarahama lanɛ? Nde ekɔ la lokuwa ndo mɛnamaka oko, nde ekɔ lo nanga ndjaka ɔnande. Lande na, kahombande sala ngasɔ na? Ntondo, tênde woho wakakondja Abarahama nde la Sara ɔnawɔ.
Ohɔ di’ɔnɛ, Nzambi akâlake dia vɔ pombaka mbota ɔna. Koko, akɛnamaka oko hakoke salema, dikambo Abarahama la Sara wakakome esombe. Koko Abarahama aketawɔka dia Nzambi koka sala dikambo diakɛnamaka oko hakoke salema. Ko kakɔna kakatombe na?
L’ɔkɔngɔ a Nzambi mbisha daka diande, ɔnɔnyi w’otondo wakete. Ko, etena kakakotsha Abarahama ɛnɔnyi 100 ko Sara ɛnɔnyi 90, vɔ wakote ɔna pami lakawɔlɛ Isaka. Nzambi akakotsha daka diande!
Koko lam’akole Isaka, Jehowa akahembe mbetawɔ k’Abarahama. Nde akawelɛ ate: ‘Abarahama!’ Ko Abarahama akakadimola ate: ‘Dim’ɔnɛ!’ Ko Nzambi akate ate: ‘Ɔsa ɔnayɛ, tshɔi yayɛ y’ɔna, Isaka, kele ntshɔka lo dikona diayomokɛnya. Kodiake ɔnayɛ lɛkɔ kele konambolende oko olambo.’
Ɛtɛkɛta ɛsɔ akanyangiya Abarahama efula, dikambo nde akalangaka ɔnande hakoke. Ndo ohɔ dia Nzambi akâlake ɔnɛ anawɔ pombaka mbidjasɛ lo kɛtɛ ya Kanana. Ko woho akɔna wotokoka salema dikambo sɔ naka Isaka ambovɔ na? Yimba y’Abarahama yakahandjɔ vua, koko nde akakitanyiya Nzambi nto.
Lam’akakome Abarahama lo dikona, nde akakeleka Isaka ɛkɔdi ko nde mbâhɛ lâdiko di’ediakelo kakandalɔngɔsɔla. Ko nde sɔmɔla lokuwa dia ndjaka ɔnande. Koko, ko wonya akɔ, ondjelo a Nzambi akawelɛ ate: ‘Abarahama, Abarahama!’ Ko Abarahama akakadimola ate: ‘Dim’ɔnɛ!’
Nzambi akate ate: ‘Tosalɛke ɔna ndoko dui ɔtɔi dia kɔlɔ. Kakianɛ lambeya dia wɛ ekɔ la mbetawɔ le mi, nɛ dia wɛ hatunyi mbishami ɔnayɛ, tshɔi yakɔ.’
Ande mbetawɔ kaki l’Abarahama le Nzambi lee! Nde aki la mbetawɔ dia ndoko dikambo ɔtɔi diahakoke Nzambi sala, ndo ɔnɛ Jehowa kokaka mbetola Isaka oma lo nyɔi. Koko lo mɛtɛ lolango la Nzambi kondjala ɔnɛ Abarahama adiake Isaka. Diɔ diakɔ diakasale Nzambi woho wa ɔkɔkɔ ɔmɔtshi ndjokakatɛ suke la lâwɔ, ko nde mbutɛ Abarahama dia mbolambolawɔ lo dihole di’ɔnande.