WEKELO 8
Abrahama nde la Sara wakakitanyiya Nzambi
Komangana etale la Babɛlɛ mbaki osomba wa Ura, lɛnɛ akatɛmɔlaka anto tozambizambi efula lo dihole dia Jehowa. Koko, aki onto ɔmɔtshi laki la Ura lakatɛmɔlaka paka Jehowa oto. Lokombo lande Abrahama.
Jehowa akatɛ Abrahama ate: ‘Mɔ oma lo ngelo kayɛ ndo ntshika ewotɔ ayɛ kele tshɔka lo wodja wayomokɛnya.’ Oma laasɔ, Nzambi akalake ate: ‘Wɛ ayoyala wodja wa woke ndo dimi layosalɛ anto efula wa la nkɛtɛ akambo w’amɛna l’ɔtɛ ayɛ.’
Abrahama kombeyaka lɛnɛ akootome Jehowa, koko nde akayaɛkɛ le Jehowa. Ɔnkɔnɛ, Abrahama, wadɛnde Sara, papa kande Tɛra ndo Lɔta laki ɔna aki ɔnango, wakalɔngɛ diangɔ diawɔ ndo wakatatɛ lɔkɛndɔ lawɔ l’otale l’okitanyiya tshɛ.
Abrahama aki l’ɛnɔnyi 75 etena kakandakome nde la nkumbo kande lo wodja wakalange Jehowa mbowaɛnya. Wodja akɔ wakelamɛka Kanana. Lɛkɔ mbakatɛkɛta Nzambi la Abrahama ndo mbakandasha daka nɛ: ‘Layosha ana ayɛ wodja w’otondo wɛnayɛ ongo.’ Koko, laasɔ ko Abrahama nde la Sara waya esombe koko watote. Ko ngande wakakoke Jehowa nkotsha daka diande sɔ?
“Oma lo mbetawɔ, Abrahama . . . akakitanyiya lo mimɔ oma lɛnɛ akinde ko ntshɔ lo dihole diakandahombe nongola oko etenyi k’okitɔ; nde akatshu kaanga mbakinde kombeyaka lɛnɛ akandatatshɔka.”—Hɛbɛru 11:8