ƆKƆNDƆ 17

Wâsa waki kɔfɔnaka

ANA ahende w’apami anɛ hawofɔnɛ, shi mɛtɛ? Onde wɛ mbeyaka nkombo yawɔ? Esau kele mengenga ko ɔnɛ lokime ɔkɔkɔ lokombo lande Jakɔbɔ.

Esau nde la Jakɔbɔ waki wâsa, ana waki Isaka nde la Rɛbɛka. Shɛwɔ, le Isaka akalangaka Esau efula nɛ dia nde aki mengenga ka mamba ndo akaleshaka nkumbo k’otondo onatshi. Koko Rɛbɛka akalekaka nanga Jakɔbɔ dikambo nde aki diki, ɔna la memakana.

Tshɛwɔ, le Abarahama, ekekɔ la lumu ndo sho kokaka fɔnya woho wakalangaka Jakɔbɔ mpokamɛ akambo w’endana la Jehowa wakandawotɛka. L’ɔkɔngɔ diko, Abarahama akayovɔ aya l’ɛnɔnyi 175, lâsɔ ko ana a wâsa waya l’ɛnɔnyi 15.

Lam’akakotsha Esau ɛnɔnyi 40 nde akatshuke amato ahende w’Ase Kanana. Dikambo sɔ diakanyangiya Isaka la Rɛbɛka efula, nɛ dia amato akɔ kɔtɛmɔlaka Jehowa.

Ko lushi lɔmɔtshi, dikambo dimɔtshi diakatombe diakokiya Esau kɛlɛ k’efula otsha le Jakɔbɔ y’ɔnango. Etena kakakoke ka Isaka tshɔkɔla ɔna l’enondo. Lam’ele Esau mbaki enondo wa Jakɔbɔ, nde kakahombe nongola ɔtshɔkɔ akɔ. Koko Esau ambosondjaka lowandji lande la tshɔkɔma le Jakɔbɔ. Ndo nto, etena kakotɔ ana akɔ ahende, Nzambi akate dia Jakɔbɔ kayohomba tshɔkɔma. Ko dikambo diakɔ diakasalema, Isaka akatshɔkɔla Jakɔbɔ.

L’ɔkɔngɔ, etena kakoke Esau dikambo diakɔ, nde akomalɛ Jakɔbɔ. Nde aki la kɛlɛ mɛtɛ ko akânɛ Jakɔbɔ dia mbodiaka. Lam’akoke Rɛbɛka dikambo sɔ, nde akanyangi efula mɛtɛ. Omalɔkɔ, nde akatɛ omɛnde Isaka ate: ‘Ayonga kɔlɔ efula mɛtɛ naka ndo Jakɔbɔ tshuka amato w’Ase Kanana.’

Ko Isaka akelɛ ɔnande Jakɔbɔ ndo akawotɛ ate: ‘Totshukake omoto l’Ose Kanana. Koko tshoka lo luudu laki tshɛyɛ Betuɛlɛ la Harana. Totshuke ɔna aki Labana l’ɔnande.’

Jakɔbɔ akokɛ she ndo akakimɛ lɔkɛndɔ l’otale otsha laka wanɛ w’otɔ lande wakadjasɛka la Harana.

Etatelu 25:​5-11, 20-34; 26:​34,35; 27:​1-46; 28:​1-5; Heberu 12:​16,17.