ƆKƆNDƆ 18
Jakɔbɔ ambotshɔ la Harana
ONDE wɛ mbeyaka apami ango watɛkɛta la Jakɔbɔ? L’ɔkɔngɔ wa nshi efula ya lɔkɛndɔ, Jakɔbɔ akahomana lawɔ la ɛtɛkɔ. Vɔ wekɔ lo nama ɛkɔkɔ awɔ. Jakɔbɔ akawambola ate: ‘Oma lende ayanyaye na?’
Vɔ wakate vɔate: ‘Oma la Harana.’
Jakɔbɔ akawambola ate: ‘Onde nyu mbeyaka Labana?’
Vɔ wakôkadimola vɔate: ‘Eelo. Enda, ɔnande la omoto le Rashɛlɛ ayaye l’olui w’ɛkɔkɔ ande.’ Wɛ hɛnyi Rashɛlɛ ayaye tshalola?
Jakɔbɔ lam’akandɛnyi Rashɛlɛ l’ɛkɔkɔ wa nyango pami le Labana, nde akatshu dia tongitola dive oma l’onyɔ w’ɛtɛkɔ woho w’ɛkɔkɔ nnɔ ashi. Ko Jakɔbɔ akakumbatela Rashɛlɛ ko nde mbotɛ ênde. Rashɛlɛ akangasana ndo akalawɔ otsha la ngelo dia totɛ she le Labana.
Labana akangɛnangɛna heyama dia Jakɔbɔ mbidjasɛ lakande. Ko etena kakawombola Jakɔbɔ dia tshuka Rashɛlɛ, Labana aki l’ɔngɛnɔngɛnɔ. Koko, nde akalɔmbɛ Jakɔbɔ dia nde mbokambɛ ɛnɔnyi esambele lo dikambo dia Rashɛlɛ. Jakɔbɔ akasale dikambo diakɔ nɛ dia nde akalangaka Rashɛlɛ efula. Ko lam’akakoke etena ka vɔ tshukana, wɛ mbeyaka dikambo diakatombe? Labana akasha Jakɔbɔ ɔnande l’enondo le Lea lo dihole dia Rashɛlɛ. Ko Jakɔbɔ aketawɔ kambɛ Labana ɛnɔnyi esambele ekina nto, ko Labana akawosha ndo Rashɛlɛ oko wadi. Lo nshi shɔ Nzambi aketawɔka dia apami tshuka wadi ɔtɔi kana ndekana. Koko nshi nyɛ, oko wata Bible, pami pombaka ndjâla paka la wadi ɔtɔi.