ƆKƆNDƆ 19

Jakɔbɔ aya la nkumbo ka woke

OHENDA nkumbo ka woke kɛnɛ. Ana 12 waki Jakɔbɔ vɔ ango. Nde aki ndo l’ana wa amato. Onde wɛ mbeyaka nkombo y’ana amɔtshi oka? Longa mɔtshi ya l’atei awɔ.

Lea akote Rubɛna, Simɛyɔna, Lɛwi la Juda. Lam’akɛnyi Rashɛlɛ ate nde hote, nde aki l’otshutshumalo efula. Omalɔkɔ, nde akasha Jakɔbɔ okambi ande a omoto le Biliha, ko Biliha akote ana ahende w’apami Danɛ la Nɛfɛtali. Ko Lea lawɔ akasha Jakɔbɔ okambi ande a omoto le Zilipa, ko Zilipa akote Ngada la Ashɛrɛ. Ko Lea akayotaka ana ahende w’apami nto, Isakara la Zebuluna.

Ko l’ɔkɔngɔ diko, Rashɛlɛ akayonga la diɛsɛ dia mbota ɔna. Nde akawɔlɛ Yɔsɛfu. Tayeya yema l’ɔkɔngɔ awui efula w’endana la Yɔsɛfu, dikambo nde akayokomaka onto la woke efula. Wango mbele ana w’apami 11 wakote Jakɔbɔ lam’akandadjasɛka laka Labana la she Rashɛlɛ.

Jakɔbɔ aki ndo l’ana amɔtshi wa amato, koko Bible totɛka paka lokombo l’ɔtɔi oto a l’atei awɔ. Lokombo lande Dina.

Etena kakakoke kakɔsɛ Jakɔbɔ yɛdikɔ dia tshika Labana ndo kalola la Kanana. Ko nde akatshumanya nkumbo kande ka woke kâmɛ ndo nyemba yande y’ɛkɔkɔ ndo dongalonga dikina ko nde akakimɛ lɔkɛndɔ l’otale.

Kanda ya nshi yakete l’ɔkɔngɔ w’okalwelo waki Jakɔbɔ la nkumbo kande oya la Kanana, ko Rashɛlɛ akayotaka ɔna pami okina. Dikambo sɔ diakasalema etena kakiwɔ weke lo mboka. Lɔ̂nɔ lakaheke Rashɛlɛ wolo ko nde akavu la mbota. Koko ɔna ashashi aki la wolo. Ko Jakɔbɔ akawɔlɛ Bɛndjamina.

Sho nangaka nembetɛ nkombo y’ana dikumi l’ahende wa Jakɔbɔ dikambo dia wodja w’Isariyɛlɛ w’otondo ndja oma le wɔ. Omalɔkɔ, nkumbo dikumi l’ahende y’Isariyɛlɛ yakɔlamɛ nkombo y’ana dikumi w’apami waki Jakɔbɔ la y’ana ahende w’apami waki Yɔsɛfu. Isaka akasɛnɛ ɛnɔnyi efula l’ɔkɔngɔ w’eotwelo k’ana asɔ tshɛ ndo dikambo sɔ diakahombe mbɔngɛnyangɛnya mɛtɛ dia nde ndjâla l’ekana efula ngasɔ. Koko totokenda kɛnɛ kakakomela okana ande wa omoto le Dina.

Etatelu 29:​32-35; 30:​1-26; 35:​16-19; 37:⁠35.