Nyetsha ananyu

Onde wɛ ekɔ la kandjema? Anango Yɔsɛfu waki la kandjema

NYƐSƆ tende elɛwɔ monga la kandjema. Onde wɛ atɛnaka diekɔ wolo nanga onto ɔmɔtshi nɛ di’anto akina mbutaka dia nde ekɔ ɔlɔlɔ, olangala kana kɔmba?a​—Kɛsɔ kakoka monga naka wɛ ekɔ la kandjema le onto ɔmɔtshi.

Kandjema koka monga lo nkumbo, naka ambutshi ndekaka nanga ɔna ɔmɔtshi. Bible tɛkɛtaka dikambo dia nkumbo kɛmɔtshi kele kandjema akatondja okakatanu ɔmɔtshi wa woke efula. Nyɛsɔ tɔsɛdingole etombelo wa kɔlɔ waki la kandjema ndo wetshelo wakokaso kondja oma lo kɛnɛ kakatombe.

Yɔsɛfu aki ɔna la dikumi l’ɔtɔi laki Jakɔbɔ ndo anango akina wakokaka Yɔsɛfu kandjema. Onde wɛ mbeyaka lande na?​—Aki nɛ dia Jakɔbɔ ya shɛwɔ akalekaka nanga Yɔsɛfu. Ɛnyɛlɔ, Jakɔbɔ akatɛlɛ Yɔsɛfu okutu ɔmɔtshi wa dimɛna efula w’awadi awadi. Jakɔbɔ akalekaka nanga Yɔsɛfu “ne dia ndi akayuwuta lu nshi yandi y’usumbi” ndo nde aki ɔnande l’enondo lakandote la Rashɛlɛ wadɛnde lakandalangaka efula.

Bible mbutaka dia “lam’akenyi anangu vati: [Shɛso] ambuleka mbuka Josefu ngandji ntuleka shu tshe, vo wakûhetsha.” Ɔnkɔnɛ, lushi lɔmɔtshi Yɔsɛfu akatɛ ase nkumbo kande dia nde akɛnyi lo dɔ vɔ tshɛ wokusamɛ mbidja ndo shɛwɔ. Bible mbutaka dia “anangu wakaleki mbuhetsha” ndo kânga she akohangwɛ l’ɔtɛ wakandate dɔ dia ngasɔ.​—Etatelu 37:1-11.

Yema tshitshɛ l’ɔkɔngɔ, etena kaki Yɔsɛfu l’ɛnɔnyi 17, anango wakatshu etale efula dia talamaka mbudi l’ɛkɔkɔ wa nkumbo kawɔ. Ɔnkɔnɛ, Jakɔbɔ akatome Yɔsɛfu dia towaenda. Onde wɛ mbeyaka kɛnɛ kakalangaka sala anango Yɔsɛfu suke la tshɛ etena kakawawɛnyi ayaye?​—Vɔ wakalange mbodiaka! Koko ahende wa l’atei awɔ, Rubɛna nde la Juda konanga.

Etena kakatetaka amundji w’okanda amɔtshi otsha lo Edjibito, Juda akate ate: “Nyeso tûsundja.” Ko vɔ wakosondja. Oma lâsɔ, vɔ wakadiake mbudi ko wakatambiya okutu waki Yɔsɛfu lo dikila. L’ɔkɔngɔ diko, etena kakawɛnya shɛwɔ okutu waki Yɔsɛfu, nde akalele ndo akate ate: ‘Nyama ka ngala akale Yɔsɛfu!’​—Etatelu 37:12-36.

Lo edjedja ka wonya, Yɔsɛfu akatohomɔka lokolo l’ɔlɔ la ntondo ka Farawɔ, owandji wa Edjibito. Awui wakasalema ngasɔ, nɛ dia oma l’ekimanyielo ka Nzambi nde aki l’akoka wa nembetshiya alɔ ahende wakɛnyi Farawɔ. Dia ntondo diakendanaka la ngɔmbɛ esambele ya wata yakayelana la ngɔmbɛ ya wɛɔndju esambele. Dia hende diakendanaka la washa esambele wele la tɔngɔ y’amɛna la washa akina esambele wele la tɔngɔ yakalongola. Yɔsɛfu akate dia alɔ akɔ ahende wakalembetshiyaka di’ayonga ɛnɔnyi esambele wayɔngɔna mbo ya ndɛ ndo ɛnɔnyi esambele wa ndjala. Farawɔ akakitsha Yɔsɛfu dia nde mombaka diangɔ dia ndɛ lo ɛnɔnyi esambele wakahombe ngɔna diangɔ dia ndjalɔngɔsɔla dia ndjala kakahombe ndjoyala.

Etena kakayoyaka ndjala, nkumbo kaki Yɔsɛfu kakasɛnaka etale kaki l’ohomba wa mbo ya ndɛ. Jakɔbɔ akatome nondo diaki Yɔsɛfu dikumi otsha l’Edjibito dia toyanga mbo ya ndɛ. Vɔ wakakome la ntondo ka Yɔsɛfu, koko vɔ kombeya. Aha la nde ndjashola, Yɔsɛfu akahembe anango ndo akɛnyi dia vɔ waki la lonyangu lo woho wakawosalɛ akambo lo yoho ya kɔlɔ. Oma lâsɔ, Yɔsɛfu akayoyashola le wɔ. Vɔ wakakumbatanɛ ndo wakangɛnangɛna!​—Etatelu, tshapita 40 polo 45.

Wetshelo akɔna wakokayɛ kondja lo kɛnɛ kendana la kandjema oma lo ɔkɔndɔ wa Bible ɔsɔ?​— Kandjema kokaka tondja akambo wa kɔlɔ wa weke efula kânga konya onto dia nyanga dia salɛ ɔnango kɔlɔ! Ɛsɔ tadia Etsha 5:17, 18 ndo Etsha 7:54-59 kele tende kɛnɛ kakasalɛ anto ambeki waki Yeso l’ɔtɛ wakiwɔ la kandjema.​—L’ɔkɔngɔ wa wadielo, onde wɛ kokaka mɛna lande na kahombaso mbewɔ monga la kandjema?​—

Yɔsɛfu akasɛnɛ ɛnɔnyi 110. Nde akote ana, akɛnyi ekana ndo tokanula. Sho kokaka monga l’eshikikelo dia tena efula Yɔsɛfu akawaetshaka dia vɔ mbokana ngandji ndo dia vɔ mbewɔ monga la kandjema.​—Etatelu 50:22, 23, 26.

[Nɔte ka l’ɛse ka dikatshi]

Ambola:

○ Kakɔna kalembetshiya monga la kandjema?

○ Kandjema akakonya anango Yɔsɛfu dia sala na?

○ Lande na kakakimwɛ Yɔsɛfu anango?

○ Wetshelo akɔna wakokaso kondja oma lo ɔkɔndɔ ɔnɛ?