ƆKƆNDƆ 41

Olui a nkonga

ONDE olui wɛnayɛ wodingami l’osongo ongo wekɔ olui a mɛtɛ oka? Kema. Wakasale olui ongo la nkonga. Jehowa akatɛ Mɔsɛ dia nde mbohanɛ l’otamba kele anto wawendake dia vɔ tshikala la lɔsɛnɔ. Koko elui ekina wele la kɛtɛ wekɔ wa mɛtɛ. Vɔ wekɔ lo numata anto ndo wekɔ lo mbatatsha hemɔ. Wɛ mbeyaka lande na?

Nɛ dia Ase Isariyɛlɛ wakatɛkɛtɛ Nzambi nde la Mɔsɛ nto. Vɔ wakayakiyanya vate: ‘Ɔkɔkɔ akɔna wakanyatotondja oma l’Edjibito dia sho ndjovɔ l’oswe wa shɛnga na? Lam’ahɛnɛ mbo ya ndɛ kânga ashi a nnɔ. Ndo tambohetsha mana.’

Tete le mana aki olelo wa dimɛna efula. Jehowa akawasha yɔ lo dihindo. Paka lo dihindo mbakandawashaka ndo ashi. Koko anto kondjala la lowando lo kɛnɛ tshɛ kakâsalɛka Nzambi. Oma lo lɔhɛndɛ lawɔ mbakatomi Jehowa elui wa nɛngɔ engo dia mbisha Ase Isariyɛlɛ dilanya. Elui wakâlumataka, ko efula kawɔ wakavɔka.

L’ɔkɔngɔ diko, anto wakayotɛ Mɔsɛ vate: ‘Sho takasale pɛkato nɛ dia takakɔtɛkɛtɛ wɛ la Jehowa. Kakianɛ ɔlɔmbɛ Jehowa kele atonye elui ɛnɛ.’

Ɔnkɔnɛ Mɔsɛ akalɔmbɛ lo dikambo di’anto. Ko Jehowa akatɛ Mɔsɛ dia nde sala olui ongo wa nkonga. Nde akawotɛ dia nde mbohanɛ l’otamba, kele onto tshɛ lakalumatamaka olui awendake. Mɔsɛ akasale oko akawotɛ Nzambi. Ko anto wakalumatamaka elui wakendaka olui wa nkonga ndo wakakalanganaka.

Wetshelo ɔmɔtshi wekɔ l’ɔkɔndɔ ɔsɔ. Sho tshɛ tekɔ oko Ase Isariyɛlɛ ango wakalumatama elui. Sho tshɛ tekɔ lo kongɛ nyɔi. Ohenda laleyɛ, wɛ ayɛna dia anto wekɔ lo tshunda ndo wekɔ lo mvɔ. Toko dikambo dia Adama la Eva, pami la omoto la ntondo, wakatone ndjela dui dia Jehowa, ndo sho tshɛ anawɔ. Koko Jehowa akasale yoho mɔtshi yokokiso kondja lɔsɛnɔ la pondjo.

Jehowa akatome ɔnande Yeso Kristo la kɛtɛ. Yeso Kristo akahanema l’otamba nɛ dia anto efula wakohindɛ enongo. Koko Jehowa akakimɔ Yeso dia totsha. Naka sho mbênda, mboyela, kete tayokondja lɔsɛnɔ la pondjo. Koko tayeka akambo efula w’endana la dui sɔ l’ɔkɔngɔ.

Walelu 21:​4-9; Joani 3:​14, 15.