ƆKƆNDƆ 30
Dikombo Dialombalomba
MƆSƐ akayayaka lo mboka ka dikona dia hɔrɛbɛ dia ndjolesha ɛkɔkɔ ande adiyo. Lɛkɔ nde akɛnyi dikombo diahɛta dja koko hadiolongola!
Mɔsɛ akɛnyi ate: ‘Ekɔ dikambo dia mamba. Layanga sukana lɛkɔ kele mende dimɛna.’ Etena kakandasale ɔsɔku, dui diakatombe oma lo dikombo diata ate: ‘Tosukanake lanɛ. Kolola sabata yayɛ, nɛ dia wɛ emadikɔ lo kɛtɛ y’ekila.’ Aki Nzambi mbakatɛkɛtaka l’onyɔ wa ondjelo, ko Mɔsɛ akadihe elongi kande.
Ko Nzambi akate ate: ‘Dimi lambɛna shɔkɔ ya wodja ami l’Edjibito. Omalɔkɔ, Dimi layanga mbatshungola, ndo wɛ kele onto lamomotoma dia tɔlɔmbɔla anto ami oma l’Edjibito.’ Jehowa akayange mbela anto ande oya lo kɛtɛ ya Kanana.
Koko Mɔsɛ akate ate: ‘Dimi lele onto l’anyanya. Woho akɔna wokokimi sala dikambo sɔ na? Ko naka Dimi lambotshɔ. Ase Isariyɛlɛ wayomimbola vɔate: “Okotomi na?” Kayomowatɛ na?’
Ko Nzambi akôkadimola ate: ‘Kowate ɔnkɔnɛ wate: “JEHOWA Nzambi k’Abarahama, Nzambi ka Isaka ndo Nzambi ka Jakɔbɔ mbotomi le nyu.” ’ Ko Jehowa akakotsha ate: ‘Ɔsɔ ele lokombo lami la pondjo.’
Mɔsɛ akate nto ate: ‘Ko kana vɔ hawombetawɔ etena kayomowatɛ nte wɛ kotomi.’
Nzambi akawombola ate: ‘Ele lo lonya layɛ na?’
Mɔsɛ akôkadimola ate: ‘Danga.’
Ko Nzambi akawotɛ ate: ‘Kadjadiɔ lo kɛtɛ.’ Ko lam’akasale Mɔsɛ ɔsɔku, danga diakakadimɔ olui. Jehowa akɛnya Mɔsɛ dihindo dikina. Nde akawotɛ ate: ‘Ɔtshiya lonya layɛ la tshina di’okutu ayɛ.’ Mɔsɛ akasale ɔsɔku, ko lam’akandatondja lonya lande, lɔ lakayala wɛma oko pɛmbɛ! Aya wɛ menda lonya k’oko onto lele la hemɔ ketawɔ sudi. L’ɔkɔngɔ Jehowa akasha Mɔsɛ wolo wa sala dihindo dia sato. Ko l’ɔkɔngɔ diko nde akate ate: ‘Etena kayosala ahindo anɛ, Ase Isariyɛlɛ wayetawɔ ɔnɛ: Dimi mbokotomi.’
Ko Mɔsɛ akakalola la ngelo ndo akatɛ Jetero ate: ‘Lam’alangayɛ, otshike kalole le analengo l’Edjibito towaênde woho wewɔ.’ Jetero akakombolɛ Mɔsɛ lɔkɛndɔ l’ɔlɔlɔ, ko Mɔsɛ akônɛ otsha l’Edjibito.