ƆKƆNDƆ 44

Rahaba amboshɛ atɔpi

APAMI ango wekɔ lo wâle. Naka vɔ hawolawe, kete vɔ diakema. Atɔpi wa Ase Isariyɛlɛ mbewɔ, ndo omoto lâkimanyiya lokombo lande Rahaba. Rahaba akadjasɛka lango lo luudu lele l’ehele k’osomba wa Jeriko. Tênde lande na kele apami ango lo wâle.

Ase Isariyɛlɛ waki suke la tehɔ Ɔkɛdi wa Jɔrɔdana tshalo kɛtɛ ya Kanana. Koko la ntondo ka vɔ tehɔ, Jashua akatome atɔpi ahende. Nde akawatɛ ate: ‘Nyutshu nyotende kɛtɛ ndo osomba wa Jeriko.’

Etena kakakome atɔpi la Jeriko, vɔ wakatshu lo luudu laki Rahaba. Koko anto amɔtshi wakatotɛ nkumekanga ka Jeriko vate: ‘Ase Isariyɛlɛ ahende wakaye lanɛ l’otsho dia ndjokemba kɛtɛ.’ Lam’akandoke ɔsɔku, nkumekanga akatome apami laka Rahaba, ko vɔ wakayôhangwɛ vate: ‘Tondja apami wele lo luudu layɛ!’ Koko Rahaba akashɛ atɔpi akɔ l’otala ande. Ko nde akawatɛ ate: ‘Apami amɔtshi wakaye lo luudu lami, koko haleye oma lɛnɛ akawaye. Vɔ wakatshwe la dikɔlɔ di’otsho la ntondo ka lokuke l’osomba ndihama. Naka nyu samanya, kete nyayowanda!’ Ko apami akɔ wakayelana lawɔ.

Kam’akawamɔ, Rahaba akadɛ esadi esadi l’otala. Nde akatɛ atɔpi ate: ‘Dimi mbeyaka nte Jehowa ayonyosha kɛtɛ nyɛ. Sho takoke woho wakandônya Ndjale ka Beela etena kakanyatombe oma l’Edjibito, ndo woho wakanyadiake nkumekanga ka la Sihona la Onga. Dimi lambonyosalɛ ɔlɔlɔ, ɔnkɔnɛ nyondake, lam’alanganyu, dia nyu nyayɛnya ɔlɔlɔ anyu le mi. Nyotsha mbapa la Mama ndo analengo l’akadiyɛmi.’

Atɔpi wakôlake dia wayowosalɛ ɔsɔku, koko Rahaba akahombe sala dikambo dimɔtshi. Vɔ wakawotɛ vate: ‘Ɔsa ɔkɔdi ɔnɛ wa beela kele okeleke lo didishi diayɛ, ndo tshumanya wanɛ tshɛ w’otɔ layɛ lo luudu layɛ. Etena kayotoya sho tshɛ dia ndjɔsa Jeriko, sho tayɛna ɔkɔdi ɔnɛ lo didishi diayɛ ndo hatotodiaka ndoko onto la lo luudu layɛ.’ Etena kakakalola atɔpi tsha le Jashua, vɔ wakɔ̂kɔndɔlɛ akambo tshɛ wakatombe.

Jashua 2:​1-24; Heberu 11:⁠31.