ƆKƆNDƆ 46
Dihele dia Jeriko
KAKƆNA kambonyukola dihele dia Jeriko nɛ na? W’ate kana bɔmbɛ kɛmɔtshi ka woke mbotondwe. Koko lo nshi ndjo vɔ kondjâlaka la wa bɔmbɛ; vɔ kondjâlaka kânga l’ekoma. Aki dihindo dikina dia Jehowa! Tênde woho wosadimidiɔ.
Longa kɛnɛ kakatɛ Jehowa Jashua ate: ‘Wɛ l’apami ayɛ wa ta nyotshimbe osomba mbala ɔtɔi. Kanyotshimbe ɔsɔku nshi shamalo. Nyɛmbɛ ndo ɔshɛtɛ wa sheke kamɛ lanyu. Ɛlɔmbɛdi esambele wayeta la ntondo k’ɔshɛtɛ akɔ watade amama awɔ.
‘Lo lushi l’esambele kanyotshimbe osomba mbala esambele. Ko l’ɔkɔngɔ kanyode amama la wolo ndo anto tshɛ kawode koko ya ta. Dihele diayonyukɔ mbala kakɔ ɔtɔi!’
Jashua l’anto tshɛ wakasale oko akate Jehowa. Lam’akawatatshimbaka osomba, anto tshɛ waki ki. Ndoko onto lakatɛkɛta kânga dui. Londjo l’amama loto la kindo y’ekolo mbakokɛka. Atunyi wa wodja a Nzambi wele lo Jeriko wakahombe mboka wɔma. Wɛ ɛnakɔ ɔkɔdi wa beela walɛndalɛnda lo didishi ongo? Akanga didishi dingo na? Eelo, Rahaba akasale oko akawotɛ atɔpi ahende dia sala. Nkumbo kande k’otondo kekɔ lalende wakongɛ.
L’ɔkɔngɔ diko, lo lushi l’esambele, kam’akawashidiya la tshimba osomba mbala k’esambele, vɔ wakade amama la wolo, ndo apami wa ta wakade tokoko la wolo ko dihele diakakongotɔnɛ. Ko Jashua akate ate: ‘Nyodiake oseka onto tshɛ lele l’osomba ndo nyotshumbe osomba akɔ. Nyotshumbe oseka ɛngɔ tshɛ. Nyonya paka fɛsa, paunyi, nkonga la diangɔ dia mbolo ndo nyoyidje lo eombelo ka luudu la dipɛma la Jehowa.’
Jashua akatɛ atɔpi akɔ ahende ate: ‘Nyutshu lo luudu la Rahaba, nyôtondja nde la nkumbo kande.’ Rahaba nde la nkumbo kande wakake, oko akawolake atɔpi.