ƆKƆNDƆ 47
Kanga ovi ɔmɔtshi l’Isariyɛlɛ
OHENDA kɛnɛ kakundɛ pami kengo lo luudu lande la dipɛma! Dihɔndɔ dia dimɛna efula, la etenyi ka paunyi ndo ekenga ɛmɔtshi wa fɛsa. Nde akadiɔsɛ oma l’osomba wa Jeriko. Ko kakɔna kakawahombe sala la diangɔ di’oma lo Jeriko na? Onde wɛ akôhɔ ondo?
Vɔ wakahombe dilanya, ndo kimɔ paunyi la fɛsa lo eombelo ka tabɛrnakɛlɛ ka Jehowa. Ɔnkɔnɛ anto anɛ wakahindola dui dia Nzambi. Vɔ wakave diangɔ dia Nzambi. Pami kakɔ lokombo lande Akana, wanɛ wele lande ango ase nkumbo kande mbewɔ. Tênde dikambo diayotomba.
L’ɔkɔngɔ wa Akana mbiva diangɔ dingo, Jashua akatome apami amɔtshi dia tɔlɔ l’osomba wa Ai. Koko vɔ wakatɔlɛmbiama. Amɔtshi wakadiakema ndo akina wakalawɔ. Jashua akanyangi efula. Nde akakɔ ekukumadi elongi lo kɛtɛ ndo akalɔmbɛ Jehowa ate: ‘Lande na akayêtawɔ dikambo dia nganɛ tokomɛ na?’
Ko Jehowa akokadimula ate: ‘Etɔ! Isariyɛlɛ akasale pɛkato. Vɔ wakɔ̂sɛ diangɔ dimɔtshi diakahombe nanyɛma kana kimɔma lo tabɛrnakɛlɛ ka Jehowa. Vɔ wakave dihɔndɔ dia dimɛna koko vɔ kombuta. Paka nyambolanya diangɔ diakɔ kâmɛ ndo ɔnɛ lakadiɔshi ko dimi nyɔtshɔkɔla.’ Ko Jehowa akate dia nde ayɛnya Jashua pami kakɔ ka kɔlɔ.
Ɔnkɔnɛ Jashua akatshumanya anto tshɛ lo dihole ɔtɔi, ko Jehowa akasɔnɔla Akana, pami kakɔ ka kɔlɔ. Akana akate ate: ‘Dimi lakasale pɛkato. Dimi lakɛnyi dihɔndɔ dia dimɛna efula, la etenyi ka paunyi ndo ekenga wa fɛsa. Dimi lakadikɔmiya efula ko lakadiɔshi. Nyayoditana kundama l’etei ka luudu lami la dipɛma.’
Lam’akawatoshola diangɔ sɔ ko diela le Jashua, nde akatɛ Akana ate: ‘Lande na kakayatela mpokoso ka nganɛ na? Kakianɛ Jehowa ayokela mpokoso!’ Ko anto tshɛ wakoke Akana la nkumbo kande ave edja ndo mbadiaka. Kema tambɛna dia hatokoke mbɔsa diangɔ diakana?
L’ɔkɔngɔ diko, Isariyɛlɛ akatshu nto la tɔlɔ la Ai. Mbala kɛsɔ Jehowa akakimanyiya anto ande ndo wakalɛmbia lo ta.