ƆKƆNDƆ 49

Wonya Hayɔsɛkɔ

OHENDA Jashua. Nde ekɔ lo mbuta ate: ‘Wonya, emala!’ Ko wonya akemala suu. Vɔ wakatshikala l’atei w’olongo lushi l’otondo. Jehowa mbakasale dikambo sɔ! Koko tênde lande na akalange Jashua di’aha wonya mbidja.

Lam’akatatɛ nkumi ya dikanga tshanu ya kɔlɔ yaki lo Kanana ndɔsha Ase Ngibiyɔna, vɔ wakatome anto dia ndjɔlɔmba Jashua ekimanyielo. Ɔkɛndji akɔ akayowotɛ ate: ‘Nyoye esadi! Nyoyototsha! Nkumi ya dikanga tshɛ ya lo kɛtɛ y’akona wamboholɔ dia ndjotɔlɔsha sho ekambi ayɛ.’

Jashua nde l’alembe ande tshɛ wakatshu esadi. Vɔ wakakɛndakɛnda otsho w’otondo. Lam’akawakome la Ngibiyɔna, asalayi wa nkumi ya dikanga yakɔ tshanu tshɛ wokôke wɔma ndo wakatatɛ la ndawɔ lawɔ. Ko Jehowa akakɔsha mbɔkɔ ya mamba oma l’olongo, ko asalayi efula wakavu la mbɔkɔ oleki wanɛ wakadiakema oma le alembe wa Jashua.

Jashua akɛnyi dia kem’edja wonya ayodja. Ayonga wodjima, ko asalayi wa nkumi ya dikanga tshanu ya kɔlɔ nyɛ wayolawɔ. Omalɔkɔ, Jashua akalɔmbɛ Jehowa ndo akate ate: ‘Wonya emala!’ Ko etena kakatetemala wonya la ngamula, Ase Isariyɛlɛ wakakondja diaaso dia shidiya mbidja otshumba awɔ.

Nkumi ya dikanga efula ya kɔlɔ yaki lo Kanana yakahetshaka wodja a Nzambi. Jashua l’alembe ande wakahombe mbɔsa oko yɛdikɔ y’ɛnɔnyi esamalo dia nɛmbia nkumi ya dikanga 31 yaki lo wodja. Etena kakawashidiya mbalɛmbia, Jashua akakahanya kɛtɛ ka Kanana le nkumbo yaki kondjala la bɛtshi dia kɛtɛ.

Ɛnɔnyi efula wakete, ko l’ɔkɔngɔ diko Jashua akayovɔka l’ɛnɔnyi 110. Edja tshɛ kaki Jashua nde l’asekande la lumu, anto wakakitanyiyaka Jehowa. Koko etena kakavu anto w’ɛlɔlɔ asɔ, anto wakatatɛ sala akambo wa kɔlɔ ndo mpokoso yakakomɛka tena efula. L’etena kɛsɔ mbakawongaka mɛtɛ l’ohomba w’ekimanyielo ka Nzambi.

Jashua 10:​6-15; 12:​7-24; 14:​1-5; Embadi 2:​8-13.