ƆKƆNDƆ 69
Ɔna omoto ambokimanyiya onto la woke
ONDE wɛ mbeyaka kakɔna kata yana ya yimato ndjo? Nde ekɔ lo kɔndɔlɛ mama kengo awui w’Elisha, omvutshi wa Jehowa ndo akambo wa diambo wasalande l’ekimanyielo ka Jehowa. Omoto ɔnɛ heye Jehowa nɛ dia nde kema Ose Isariyɛlɛ. Ɛsɔ tênde bonde kele ɔna omoto ɔnɛ lo luudu la mama kɛnɛ.
Mama kengo aki Ose Suriya. Omɛnde lokombo lande Namana, owandji w’alembe w’Ase Suriya. Ase Suriya wakatondaka dikɛnda dia omoto di’Ose Isariyɛlɛ nɛ lo lɔhɔmbɔ ko vɔ wakatowoshaka wadi a Namana dia nde ndjâla okambi ande.
Namana aki la hemɔ ka kɔlɔ kelɛwɔ sudi. Hemɔ kakɔ tɔnyatɔnyaka emunyi w’onto tshɛ. Ɔna omoto akɔ ekɔ lo mbutɛ wadi a Namana ate: ‘Dimi kombolaka dia nkumɛmi ntshɔ otsha le omvutshi wa Jehowa l’Isariyɛlɛ. Nde ayotɔkɔnɔya sudi kande.’ L’ɔkɔngɔ diko, wakatotɛka om’aki omoto akɔ akambo asɔ.
Namana akalangaka kɔnɔ mɛtɛ, ɔnkɔnɛ nde akɔ̂shi yɛdikɔ dia ntshɔ l’Isariyɛlɛ. Lam’akandakome lɛkɔ, nde akatshu laka Elisha. Elisha akatɛ okambi ande dia nde tomba dia totɛ Namana ɔnɛ: ntshɔka tombe mbala esambele l’Ɔkɛdi wa Jɔrɔdana. Dikambo sɔ diakômadja Namana efula ko nde akate ate: ‘Ɛkɛdi wotshikadi lakaso hawoleki ɛkɛdi tshɛ wa l’Isariyɛlɛ amɛna!’ L’ɔkɔngɔ a nde mbuta ɔsɔku, nde akakɔ la kɛlɛ.
Koko okambi ande ɔmɔtshi akawotɛ ate: ‘Otondoyala Elisha akakotɛ dia sala dikambo dimɔtshi dia wolo, wɛ otosala. Ko lande na keyɛ halange mbɔka oko wotshinde na?’ Namana akokɛ okambi ande ndo akatshu a tombɛ mbala esambele l’Ɔkɛdi wa Jɔrɔdana. Lam’akandasale ɔsɔku, demba diande diakayala pɛsɔɔ ndo nde akakɔnɔ!
Namana akangɛnangɛna efula. Nde akakalola le Elisha ndo akatowotɛ ate: ‘Lambɛna kakianɛ dia Nzambi k’Isariyɛlɛ mbele Nzambi ɔtɔi ka mɛtɛ l’andja w’otondo. Ɔnkɔnɛ lambokɔsɛngasɛnga dia wɛ mbɔsa oshasha ɔnɛ oma le mi.’ Koko Elisha akakadimola ate: ‘Kema, dimi halongola.’ Elisha akeyaka dia ekɔ kɔlɔ nde nongola oshasha, nɛ dia Jehowa mbakakɔnɔla Namana. Koko okambi w’Elisha le Ngehazi akayange oshasha lo woho ande.
Ɔnkɔnɛ, enda kɛnɛ kakasale Ngehazi. L’ɔkɔngɔ a Namana ntshɔ, Ngehazi akayelana lande. Nde akatowotɛka ate: ‘Elisha ambotoma le yɛ dia ndjokotɛ ɔnɛ: nde ekɔ l’ohomba wa oshasha ɔmɔtshi oma le yɛ dikambo di’angɛnyi wamboya la ndjowenda.’ Aki kashi ka mamba. Koko Namana kombeya ɔnɛ kashi; ɔnkɔnɛ nde akasha Ngehazi diangɔ dimɔtshi.
Lam’akakalola Ngehazi la ngelo, Elisha akeye kɛnɛ kakandasale. Jehowa akawewoya. Ko nde akate ate: ‘Nɛ dia wɛ akasale dikambo dia kɔlɔ sɔ, sudi ka Namana kayônga le yɛ.’ Kem’edja dui sɔ diakasalema!
Wetshelo akɔna wambotokondja l’akambo asɔ tshɛ na? Ka ntondo, sho pombaka ndjâla oko dikɛnda dia omoto nɛ ndo tɛkɛta awui wa Jehowa. Ayoyala dimɛna efula. Ka hende, aha sho ndjâla otako oko aki Namana ntondo, koko sho pombaka nɛmiya awui w’ekambi wa Jehowa. Ndo ka sato, aha sho ndjâla akanga a kashi oko Ngehazi. Onde hatokoke mbeka awui efula oma lo walelo wa Bible?