TSHAPITA 41

Ana Wangɛnyangɛnya Nzambi

ƆNA akɔna la lanɛ la nkɛtɛ lafɔnyayɛ lakaleke ngɛnyangɛnya Jehowa?. . . Aki Ɔnande Yeso. Tende awui wakasale Yeso dia ngɛnyangɛnya She lele l’olongo.

Nkumbo kaki Yeso wakadjasɛka lo ngelo kɛmɔtshi kele oma lawɔ otsha la Jerusalɛma mbɔsaka lɔkɛndɔ lele oko nshi shato. Tɛmpɛlɔ ka dimɛna efula kaki la Jerusalɛma. Yeso aketaka tɛmpɛlɔ kɛsɔ ate: ‘Luudu la Papa.’ Yeso la nkumbo kande wakatshɔka lɛkɔ ɔnɔnyi tshɛ dia tosala fɛtɛ ka Pasaka.

Ɔnɔnyi ɔmɔtshi, lam’aki Yeso l’ɛnɔnyi 12, ase nkumbo kande wakatatɛ la kawola oya la ngelo kawɔ lam’akashile Pasaka. Lam’akawemala lo dihole diakawahombe mumuya yema l’otsho, vɔ wakɛnyi dia Yeso komonga l’atei awɔ ndo l’atei w’ewotɔ l’angɛnyi awɔ. Ko wonya akɔ, Mariya nde la Yɔsɛfu wakakawola otsha la Jerusalɛma dia toyanga Yeso. Lende afɔnyayɛ aki Yeso na?. . .

Vɔ wakatotana Yeso lo tɛmpɛlɔ. Nde akahokamɛka embetsha ndo akawaokaka wembola. Ndo lam’akawokaka embetsha ɛsɔ wembola Yeso kopombaka okadimwelo wa mbisha. Vɔ wakambe efula lo mboka ekadimwelo w’amɛna wakandashaka. Onde wɛ koka shihodia lande na kakangɛnangɛnaka Nzambi Ɔnande?. . .

Lo mɛtɛ, lam’akayoshola Mariya nde la Yɔsɛfu Yeso, asolo awɔ wakakitakita. Koko Yeso kondjakiyanyaka. Nde akeyaka dia tɛmpɛlɔ aki dihole dia dimɛna dia monga lɔkɔ. Diakɔ diakandawambola ate: ‘Onde nyu hanyeyi dia dimi pombaka monga lo luudu la Papa?’ Nde akeyaka dia tɛmpɛlɔ aki luudu laki Nzambi ndo nde akalangaka monga lɔkɔ.

L’ɔkɔngɔ wa lâsɔ, Mariya nde la Yɔsɛfu wakɔshi Yeso, lâsɔ ko nde eke l’ɛnɔnyi 12 ko wakakawola la nde otsha la Nazarɛta. Oko le yɛ, ngande waki dionga diaki Yeso otsha le ambutshi ande na?. . . Bible mbutaka dia nde ‘akatetemala la kitanyiya awui awɔ.’ Dikambo sɔ alangadiɔ mbuta na?. . . Dikambo sɔ nangaka mbuta dia Yeso aki l’okitanyiya otsha le wɔ. Eelo, nde akasalaka kɛnɛ kakɔlɔmbaka ambutshi ande dia nde sala, oyadi ntshɔ dia totahola ashi.​—⁠Luka 2:​41-52.

Ohokanyiya yema lo dikambo nɛ: Kânga mbaki Yeso onto la kokele, nde aki l’okitanyiya otsha le ambutshi ande waki komonga anto wa kokele. Onde dikambo sɔ diakangɛnyangɛnya Nzambi?. . . Eelo, nɛ di’Ɔtɛkɛta wa Nzambi mbutɛka ana ɔnɛ: “Ana, nyukitanyia ambutshi anyu.” (Efeso 6:⁠1) Wɛ lawɔ ayɔngɛnyangɛnya Nzambi naka wɛ monga l’okitanyiya otsha le ambutshi ayɛ oko wakasale Yeso.

Yoho kina yakokayɛ ngɛnyangɛnya Nzambi ele lo mbewoya anto akina awui wendana la nde. Anto amɔtshi mbeyaka mbuta ɔnɛ olimu wa sambisha anto akina hendana l’ana w’akɛnda. Koko l’etena kakone anto dia shimba ana w’akɛnda dia sala dikambo sɔ, Yeso akate ate: ‘Onde nyu nyatadiaka l’Afundelo ɔnɛ: Nzambi ayotombɔma oma l’enyɔ w’ana w’akɛnda?’ (Mateu 21:16) Lâsɔ, sho tshɛ koka mbutɛ anto akina awui wendana la Jehowa ndo woho wende Nzambi ka diambo naka sho nangaka mɛtɛ sala dikambo sɔ. Ndo naka sho sala ngasɔ, kete tayɔngɛnyangɛnya Nzambi.

Oma lende ekaso awui waki Nzambi wakokaso mbewoya anto akina na?. . . Oma lo wekelo aso wa Bible wa la ngelo. Koko sho mbekaka awui efula lo dihole diasangana ekambi waki Nzambi dia mbeka. Ko ngande wakokaso mbeya ekambi waki Nzambi na?. . .

Kakɔna kasala anto asɔ lo nsanganya yawɔ na? Onde vɔ mɛtɛ mbetshaka kɛnɛ kele lo Bible? Onde vɔ mbadiaka ndo nembetshiyaka Bible? Shi ngasɔ mbahokamɛso kɛnɛ katotɛ Nzambi?. . . Kema lo nsanganya y’Akristo, sho ngɛnangɛnaka dia mpokamɛ kɛnɛ kata Nzambi?. . . Ko ayoyosala naka anto wambokotɛ ɔnɛ wɛ hahombe nsɛna lo ndjela kɛnɛ kata Bible? Onde wɛ ayota ɔnɛ vɔ wekɔ ekambi waki Nzambi?. . .

Dikambo dikina dia kana yimba diɔ nɛ. Bible mbutaka di’ekambi waki Nzambi pombaka monga ‘wodja wele la lokombo lande.’ (Etsha 15:14) Lam’ele Jehowa mbele lokombo laki Nzambi, sho koka mumbola anto kana Jehowa mbele Nzambi kawɔ. Naka wambota vate aha Jehowa mbele Nzambi kawɔ, kete lâsɔ tambeya dia vɔ bu ekambi wakinde. Ekambi waki Nzambi pombaka nto mbewoya anto akina awui wendana la Diolelo diaki Nzambi. Ndo vɔ pombaka mɛnya ngandji kawɔ otsha le Nzambi lo ndjelaka wadjango ande.​—⁠1 Joani 5:⁠3.

Naka wɛ mbeyaka anto wasala awui asɔ tshɛ, kete wɛ pombaka sangana kâmɛ la wɔ dia tɛmɔla Nzambi. Wɛ pombaka mpokamɛka la yambalo tshɛ awui watama lo nsanganya shɔ ndo kadimolaka lo wembola lam’ambɔmawɔ. Kɛsɔ mbakasale Yeso lam’akinde lo luudu laki Nzambi. Ndo naka wɛ sala awui asɔ, kete wɛ ayɔngɛnyangɛnya Nzambi paka oko wakasale Yeso.

Onde wɛ koka mbeya ana akina watɛkɛtawɔ dikambo diawɔ lo Bible wakangɛnyangɛnya Nzambi?. . . Timɔtɛ ekɔ ɛnyɛlɔ ka dimɛna efula. She kɔtɛmɔlaka Jehowa. Koko Eyunikɛ wa nyango la Lɔyi ka tshɛnde waki atɛmɔdi waki Jehowa. Timɔtɛ akahokamɛka awui awɔ ndo akeke awui wendana la Jehowa.

Lam’akole Timɔtɛ, ɔpɔstɔlɔ Paulo akatshu dia tenda anto wa l’osomba wakadjasɛka Timɔtɛ. Nde akɛnyi dia Timɔtɛ akalangaka kambɛ Jehowa efula. Ɔnkɔnɛ, nde akalɔmbɛ Timɔtɛ dia mbotshindɛ l’olimu waki Nzambi woho wa nde mbeya pamia olimu ande. Dihole tshɛ diakawatshu, vɔ wakewoya anto awui wendana la Diolelo diaki Nzambi ndo la Yeso.​—⁠Etsha 16:​1-5; 2Timote 1:5; 3:​14, 15.

Onde Bible ekɔ paka la bɛnyɛlɔ di’ana w’apami wakangɛnyangɛnya Nzambi?. . . Ndooko. Tɔshi ɛnyɛlɔ ka dikɛnda dia womoto di’ose Isariyɛlɛ ɔmɔtshi lakangɛnyangɛnya Nzambi. Lo nshi yakandasɛnaka, wodja wa Suriya waki atunyi wa wodja w’Isariyɛlɛ. Lushi lɔmɔtshi, ase Suriya wakalɔsha ase Isariyɛlɛ ndo wakande dikɛnda dia womoto sɔ lo fumbe. Wakɔtɔlɛ lo luudu laki owandji w’asɔlayi wakawelɛka Namana. Lɛkɔ, nde akatonga ose olimu waki wadi aki Namana.

Namana aki la hemɔ ka sudi. Ndoko dɔkɔtɛlɛ diakakoke kɔnɔla Namana. Koko dikɛnda dia womoto di’oma l’Isariyɛlɛ aki la mbetawɔ di’okambi ɔmɔtshi wa woke waki Nzambi, mbut’ate omvutshi akakoke kɔnɔla Namana. Namana nde la wadɛnde kɔtɛmɔlaka Jehowa. Onde dikɛnda dia womoto sɔ akahombe mbatɛ kɛnɛ kakandeyaka? Otoyosala otondonga wɛ mbaki lo dihole diande?. . .

Dikɛnda dia womoto sɔ akate ate: ‘Naka Namana ntshɔ otsha le omvutshi waki Jehowa wa l’Isariyɛlɛ, kete nde ayɔkɔnɔ oma lo hemɔ kande ka sudi.’ Namana akakitanyiya kɛnɛ kakate dikɛnda dia womoto sɔ ndo akatshu otsha le omvutshi waki Jehowa. Lam’akandasale kɛnɛ kakawotɛ omvutshi ɔsɔ dia sala nde akakɔnɔ. Dikambo sɔ diakatshutshuya Namana dia nde koma ɔtɛmɔdi waki Nzambi ka mɛtɛ.​—⁠2 Khumi ya Dikanga 5:​1-15.

Onde wɛ nangaka kimanyiya onto ɔmɔtshi dia nde mbeya awui wa Jehowa ndo mbeya kɛnɛ kakokande sala, oko wakasale dikɛnda dia womoto sɔ?. . . Anto akɔna wakokayɛ kimanyiya na?. . . Mɛtɛ, ntondotondo, ondo anto akɔ koka fɔnya dia vɔ bu l’ohomba w’ekimanyielo. Koko wɛ koka mbatɛ awui w’amɛna wasala Jehowa. Vɔ mbeyaka mpokamɛ. Wɛ koka monga l’eshikikelo dia dikambo sɔ diayɔngɛnyangɛnya Nzambi.

Awui akina wakeketsha akɛnda dia ngɛnangɛna kambɛ Nzambi koka tanema l’Osambu 122:1; 148:​12,13; Undaki 12:1; 1 Timote 4:12; ndo lo Heberu 10:​23-25.

[Esato wa lo lɛkɛ 213]

Ngande wakangɛnyangɛnya Yeso Nzambi lam’akinde eke dikɛnda?

[Osato wa lo lɛkɛ 215]

Kanga mbaki she komonga ombetawudi, kakɔna kakalange Timɔtɛ sala?

[Osato wa lo lɛkɛ 216]

Ngande wakangɛnyangɛnya dikɛnda dia womoto di’ose Isariyɛlɛ nɛ Nzambi?