ƆKƆNDƆ 73
Nkumekanga k’ɔlɔlɔ ka komelo l’Isariyɛlɛ
JOSIYA aki paka l’ɛnɔnyi enanɛi eto lam’akandayala nkumekanga ka nkumbo hiende y’Isariyɛlɛ ya la diko dia nkushi. Onto layala nkumekanga hongaka kiɛndakiɛnda ngasɔ. Ɔnkɔnɛ ntondo onto ɔmɔtshi l’opalanga akahombe mbokimanyiya dia nde nɔmbɔla wodja.
Etena kakakotsha Josiya ɛnɔnyi esambele l’olimu wa nkumekanga, nde akatatɛ nyanga Jehowa. Nde akayele ɛnyɛlɔ ka nkumi ya dikanga y’ɛlɔlɔ oko Davidi, Jɛhoshafata la Hezekiya. Ko lam’akandayala ɔlɔngɔlɔngɔ, Josiya akasale dikambo dia mamba.
Aya edja, Ase Isariyɛlɛ efula wakayala anto wa kɔlɔ heyama. Vɔ wakatɛmɔlaka tozambizambi ta kashi. Vɔ wakakɛka pingo adwe. Omalɔkɔ, Josiya l’anto ande wakatatɛ nanya ɔtɛmwɛlɔ wa kashi lo wodja. Aki olimu a woke nɛ dia anto efula wakatɛmɔlaka tozambizambi ta kashi. Hɛnyi Josiya l’anto ande lanɛ watɛtshatɛtsha pingo.
L’ɔkɔngɔ diko, Josiya akasha apami asato ɔkɛndɛ wa nɔngɔsɔla tɛmpɛlɔ ka Jehowa. Wakasha anto akɔ akuta wakakɔngɔla anto dia vɔ sala olimu wakahombe salema. Ko lam’akawakambaka lo tɛmpɛlɔ, ɔlɔmbɛdi a lâdiko le Helikiya akɛnyi ɛngɔ kɛmɔtshi k’ohomba efula lɔkɔ. Aki dibuku di’ɛlɛmbɛ diakatɛ Jehowa Mɔsɛ dia nde funda aya edja efula. Diɔ diakashishɔ ambeta ɛnɔnyi efula.
Wakatɔlɛ Josiya dibuku diakɔ, ko nde akawatɛ dia vɔ mbalɛdiɔ. Lam’akahokamɛka Josiya, nde akɛnyi dia anto hawoyele ɛlɛmbɛ wa Jehowa. Nde akoke kandji efula l’asolo dia dikambo sɔ, ko nde akâte ahɔndɔ ande palala, oko wɛnayɛ l’osato lanɛ. Nde akate ate: ‘Jehowa ekɔ la kɛlɛ le so nɛ dia washɛso kondjela ɛlɛmbɛ wakafundama lo dibuku nɛ.’
Josiya akasha ɔlɔmbɛdi a lâdiko le Helikiya ɔkɛndɛ wa mbishola kɛnɛ kakayange Jehowa sala lo dikambo diawɔ. Helikiya akatshu dia tombola Huluda, omvutshi wa omoto. Nde akawotɛ dui diaki oma le Jehowa dia nde totɛ Josiya ate: ‘Jerusalɛma l’anto tshɛ wayokondja dilanya nɛ dia vɔ wakatɛmɔla tozambizambi ta kashi ndo kɛtɛ kakalole l’akambo wa kɔlɔ. Koko nɛ dia wɛ, Josiya, akasale kɛnɛ kele ɔlɔlɔ, dilanya sɔ hadiotoya nshi yekeyɛ la lɔsɛnɔ.’