SAWO DIA WEKELO 38
Ɛlɔngɔlɔngɔ l’esekaseka le, naa yoho ya lɔsɛnɔ yalanganyu monga la lɔ?
“Shɛnɔdi yayokokokɛ.”—TOK. 2:11.
OSAMBO 135 Jehowa ate: “Ɔnami, oyale kanga lomba”
AWUI WAYƆTƐKƐTAMAa
1. Ekakatanu akɔna wakahomana la Jɛhɔashi, Uziya ndo Jɔsiya?
OHƆSA dia wɛ ambokoma nkumekanga k’ekambi wa Nzambi etena kekeyɛ dikɛnda kana l’ɛnɔnyi dikumi l’ɛmɔtshi eto! Ngande wayoyokamba la lowandji layɛ? Bible totɛka di’ɛlɔngɔlɔngɔ efula wakakome nkumekanga la Juda. Ɛnyɛlɔ, Jɛhɔashi aki l’ɛnɔnyi 7, Uziya aki l’ɛnɔnyi 16 ndo Jɔsiya aki l’ɛnɔnyi 8. Dui sɔ diakahombe monga wolo efula le wɔ! Ohokanyiya wotsho waki l’ahɛka awɔ. Koko kaanga mbele dui sɔ komonga wɔdu le wɔ, Jehowa ndo anto akina wakaakimanyiya dia vɔ nsala awui efula w’amɛna.
2. Lande na kele ekɔ dui dia dimɛna mbeka akambo wendana la Jɛhɔashi, Uziya ndo Jɔsiya?
2 Sho keema nkumi ya dikanga y’apami kana ya wamato, koko sho koka nkondja wetshelo w’ohomba efula oma le anto asɔ wele Bible tɛkɛtaka dikambo diawɔ. Vɔ wakɔshi tɛdikɔ t’amɛna, koko vɔ wakɔshi ndo nto tɛdikɔ ta kɔlɔ. Lo nkamba la bɛnyɛlɔ diawɔ, tayɛna lande na kahombaso nsɔna angɛnyi w’amɛna, lande na kahombaso ntetemala monga l’okitshakitsha ndo ntetemala nyanga Jehowa.
SƆNA ANGƐNYI W’AMƐNA
Ɛlɔ kɛnɛ sho koka ndjela ɛnyɛlɔ ka Jɛhɔashi lo mpokamɛ angɛnyi w’amɛna (Enda odingɔ 3, 7)c
3. Ngande wakakimanyiya Jɛhɔyada nkumekanga Jɛhɔashi dia nde mbɔsa tɛdikɔ ta lomba?
3 Okoya Jɛhɔashi lo mbɔsa tɛdikɔ ta lomba. Etena kakinde dikɛnda, nkumekanga Jɛhɔashi akɔshi yɛdikɔ mɔtshi ya lomba. Kaanga mbakinde komonga la she, nde akayele ɛlɔmbwɛlɔ k’ɔlɔmbɛdi wa laadiko wa kɔlamelo, Jɛhɔyada. Ɔlɔmbɛdi ɔsɔ aketsha Jɛhɔashi lo mbɔɔsa oko ɔnande hita. Diɛsɛ la ekimanyielo ka Jɛhɔyada, Jɛhɔashi akɔshi yɛdikɔ ya kambɛ Jehowa ndo nde akakimanyiya anto akina dia vɔ lawɔ kambɛ Jehowa. Jɛhɔashi akɔshi nto yɛdikɔ ya nɔngɔsɔla tɛmpɛlɔ ka Jehowa.—2 Ɛk. 24:1, 2, 4, 13, 14.
4. Wahɔ akɔna wakondjaso etena kalangaso ndo kakitanyiyaso ɛlɛmbɛ wa Jehowa? (Tokedi 2:1, 10-12)
4 Naka wekɔ lo keetsha dia mboka Jehowa ngandji ndo dia nsɛna lo yoho yɔtɔnɛ l’ɛlɛmbɛ ande, kete wekɔ lo kosha woshasha ɔmɔtshi wa nɛmɔ. (Adia Tokedi 2:1, 10-12.) Ambutshi koka mbetsha anawɔ lo toho efula. Tende woho wakakimanyiyama Katya oma le she dia nde mbɔsa tɛdikɔ t’amɛna. She akakɛtshanyaka la nde divɛsa dia lushi la lushi etena kakandatshɔka la nde la kalasa. Nde mbutaka ate: “Ɔkɛtshanyelo ɔsɔ wakokimanyiya dia nkandola awui amɔtshi wa wolo wakokomɛka lo lushi.” Ko kayotota naka wɛ mɛnaka di’ɛlɔmbwɛlɔ k’oma lo Bible kakosha ambutshi kamboleka kodja lo shasa? Kakɔna kakoka kokimanyiya dia mbetawɔ ɛlɔmbwɛlɔ kawɔ? Kadiyɛso kɛmɔtshi kelɛwɔ Anastasia mbohɔka dia ambutshi ande wakɔshi etena ka mboolembetshiya lande na kakawadje ɛlɛmbɛ ɛmɔtshi la ngelo. Nde mbutaka ate: “Dui sɔ diakakimanyiya dia mbetawɔ elelo wakawambidjɛ, lo mbaɔsa oko ekokelo ka la ngandji, koko aha oko dui dia mbidja lo shasa.”
5. Shɛngiya yakɔna yele la etsha aso le ambutshi aso ndo le Jehowa? (Tokedi 22:6; 23:15, 24, 25)
5 Naka wɛ nkamba l’alako wa lo Bible walongolayɛ, kete wɛ ayɔngɛnyangɛnya ambutshi ayɛ. Ndo kɛnɛ koleki ohomba ele, wɛ ayɔngɛnyangɛnya Nzambi ndo wɛ ayonga ɔngɛnyi ande wa pondjo. (Adia Tokedi 22:6; 23:15, 24, 25.) Shi dui sɔ koshaka ɔkɔkɔ w’oshika wa mbokoya ɛnyɛlɔ ka Jɛhɔashi etena kakinde ɔlɔngɔlɔngɔ?
6. Jɛhɔashi akayotatɛ mpokamɛ alako waki waa na ndo dui sɔ diaki l’etombelo akɔna? (2 Ɛkɔndɔ 24:17, 18)
6 Nyokondja wetshelo oma lo tɛdikɔ ta kɔlɔ takɔshi Jɛhɔashi. L’ɔkɔngɔ wa nyɔi ka Jɛhɔyada, Jɛhɔashi akasɔnɛ angɛnyi wa kɔlɔ. (Adia 2 Ɛkɔndɔ 24:17, 18.) Nde akɔshi yɛdikɔ ya mpokamɛ ana wa nkumi ya dikanga ya la Juda wanɛ waki konangaka Jehowa. Ondo nyu mbetawɔka dia Jɛhɔashi akakoke mbewɔ waa efundja tɛkɔ asɔ, ambidji wa lofunge asɔ wanɛ wakasalaka awui wa kɔlɔ. (Tok. 1:10) Koko lo dihole dia nde nsala ngasɔ, nde akahokamɛ alako awɔ wa kɔlɔ. Ɔnkɔnɛ, lam’akayange Zɛkariya k’ɔnango mongola, nde akodiakisha. (2 Ɛk. 24:20, 21; Mat. 23:35) Ande dui dia kɔlɔ ndo di’enginya lee! Jɛhɔashi akatatɛ lɔsɛnɔ lande dimɛna, koko lonyangu ko nde akakome esadi eto ɔpɔsta ndo ondjakanyi. L’ekomelo, ekambi ande hita, wakayodiaka. (2 Ɛk. 24:22-25) Lɔsɛnɔ lande lotonga woho okina otondongaka nde akatetemala mpokamɛ Jehowa ndo wanɛ wakawokaka ngandji. Naa wetshelo wakokanyu nkondja oma l’ɛnyɛlɔ kɛsɔ?
7. Anto akɔna wahombayɛ nsɔna oko angɛnyi? (Enda ndo osato.)
7 Wetshelo ɔmɔtshi wakokaso nkondja oma lo yɛdikɔ ya kɔlɔ yakɔshi Jɛhɔashi ele sho pombaka nsɔna angɛnyi wayonga la shɛngiya ya dimɛna le so, mbuta ate angɛnyi woka Jehowa ngandji ndo walanga mbɔɔngɛnyangɛnya. Tatokomɛke lo mbɔtɔ ɔngɛnyi l’anto wele laso lɔlɔnga ɔtɔi. Tohɔ dia Jɛhɔashi aki dikɛnda efula lo mbɛdika l’ɔngɛnyi ande Jɛhɔyada. Lo kɛnɛ kendana la ɔsɔnwɛlɔ ayɛ w’angɛnyi, yambola ɔnɛ: ‘Onde vɔ kimanyiyakami dia nkeketsha mbetawɔ kami le Jehowa? Onde vɔ keketshakami dia nsɛna lo yoho yɔtɔnɛ l’ɛlɛmbɛ wa Nzambi? Onde vɔ mbutɛka anto awui wendana la Jehowa ndo l’akambo ande wa mɛtɛ wa nɛmɔ? Onde vɔ nɛmiyaka ɛlɛmbɛ wa Nzambi? Onde vɔ mbutɛkami awui walangami mboka, ko kana vɔ mingolakami la dihonga tshɛ naka lambotakɔ mboka?’ (Tok. 27:5, 6, 17) Lo mbuta mɛtɛ, naka angɛnyi ayɛ hawoke Jehowa ngandji, kete wɛ bu l’ohomba awɔ. Koko naka wɛ ekɔ l’angɛnyi woka Jehowa ngandji, kete kukutɛ angɛnyi asɔ nɛ dia vɔ wayonga la shɛngiya y’ɔlɔlɔ le yɛ!—Tok. 13:20.
8. Naka tekɔ lo nkamba la rɛzo sɔsio, kakɔna kahombaso namaka lo yimba?
8 Rɛzo sɔsio koka tokimanyiya dia nsawola l’ase nkumbo ndo l’angɛnyi. Koko, anto efula kambaka la ehomɔ kɛsɔ dia mambiya anto akina, lo mbidja waa foto ndo tovidɛo tɛɛnya kɛnɛ kambowosala kana kɛnɛ kambowokondja. Naka wɛ ekɔ lo nkamba la rɛzo sɔsio, kete yambola wate: “Onde oyango ami ekɔ wa mambiya anto akina? Onde oyango ami ekɔ wa nkeketsha anto akina ko kana ekɔ wa mbaakonya dia vɔ tɛtɛmɔlami? Onde dimi mbetawɔka di’anto wakamba la ehomɔ kɛsɔ sɛngiyaka tokanyi tami, ɛtɛkɛta ami ndo etsha ami lo yoho ya kɔlɔ?’ Ɔnangɛso Nathan Knorr, laki ose Olui-walɔmbɔla akasha dako nɛ: “Toyangake dia ngɛnyangɛnya anto, nɛ dia wɛ ayoyokoma ko hayɔngɛnyangɛnya ndooko onto. Ngɛnyangɛnya Jehowa, ko wɛ ayɔngɛnyangɛnya wanɛ tshɛ woka Jehowa ngandji.”
SHO POMBAKA NTETEMALA MONGA L’OKITSHAKITSHA
9. Kakɔna kakakimanyiya Jehowa Uziya dia nsala? (2 Ɛkɔndɔ 26:1-5)
9 Okoya Uziya lo mbɔsa tɛdikɔ t’amɛna. Etena kakinde ɔlɔngɔlɔngɔ, nkumekanga Uziya aki l’okitshakitsha. Nde akeke dia “mboka Nzambi ka mɛtɛ wɔma.” Nde akasɛnɛ ɛnɔnyi 68 ndo l’etena koleki otale ka lɔsɛnɔ lande, Jehowa akɔtshɔkɔla. (Adia 2 Ɛkɔndɔ 26:1-5.) Uziya akalɛndja wedja efula w’atunyi ande ndo nde akasale tshɛ dia Jɛrusalɛma kokamamɛ dimɛna. (2 Ɛk. 26:6-15) Uziya aki mɛtɛ l’ɔngɛnɔngɛnɔ lo kɛnɛ tshɛ kakokimanyiya Nzambi dia nsala.—Ond. 3:12, 13.
10. Kakɔna kakakomɛ Uziya?
10 Kondja wetshelo oma lo tɛdikɔ ta kɔlɔ takɔshi Uziya. Nkumekanga Uziya aki la mbekelo ka mbitɛka anto akina kɛnɛ kakawahombaka nsala. Ko onde dui sɔ diakahombe mbookonya dia mfɔnya dia nde kokaka nsala tshɛ kakandalangaka? Lushi lɔmɔtshi, Uziya akɔshi yɛdikɔ ya mbɔtɔ lo tɛmpɛlɔ ka Jehowa. L’otako tshɛ, nde akɔshi yɛdikɔ ya ntshumba tshɔ lo elambwelo, dui diele nkumi ya dikanga komonga la lotshungɔ la nsala. (2 Ɛk. 26:16-18) Ɔlɔmbɛdi a laadiko, Azariya akahembe dia mbongola, koko Uziya akadunganɛ la nkɛtɛ. Lonyangu ko, Uziya akayoshisha kɔlamelo yande ndo Jehowa akawosha dilanya lo mbooka hemɔ ka sudi. (2 Ɛk. 26:19-21) Ande woho wotonga lɔsɛnɔ lande dimɛna efula otondotetemala monga l’okitshakitsha lee!
Lo dihole dia ndjatombola lo kɛnɛ tshɛ kambotosala, sho pombaka mbisha Jehowa lotombo lo kɛnɛ keso l’akoka wa nsala (Enda odingɔ 11)d
11. Etsha akɔna wakoka mɛnya dia tekɔ l’okitshakitsha? (Enda ndo osato.)
11 Lam’akakome Uziya la wolo w’efula, nde akohɛ dia Jehowa mbaki Kiɔkɔ ya wolo ndo y’ɔngɔnyi ande. Naa wetshelo? Sho pombaka mbohɔka di’ɛtshɔkɔ ndo waɛsɛ aso ndja oma le Jehowa. Lo dihole dia monga l’ofunu l’ɔtɛ w’awui wambotosala, Jehowa mbahombaso mbisha lotombo lo kɛnɛ tshɛ keso l’akoka wa nsala.b (1 Kɔ. 4:7) Sho pombaka mbeya l’okitshakitsha tshɛ dia sho keema kokele ndo tekɔ l’ohomba w’ohokwelo. Ɔnangɛso ɔmɔtshi lele l’ɛnɔnyi oko 60 akafunde ate: “Lakeke dia dimi halohombe nkɔmɔ etena kɛna anto akina munga yami. Etena kalongolami ohokwelo l’ɔtɛ wa munga yasalami, dimi tetemalaka nsala la wolo dia ndjalowanya ndo mbisha Jehowa kɛnɛ koleki ɔlɔlɔ le mi.” Kɛnɛ kele mɛtɛ ele, etena kokaso Jehowa wɔma ndo katetemalaso monga l’okitshakitsha, sho mongaka mɛtɛ la lɔsɛnɔ l’ɔngɛnɔngɛnɔ.—Tok. 22:4.
TETEMALA NYANGA JEHOWA
12. Etena kakinde ɔlɔngɔlɔngɔ, ngande wakayange Jɔsiya Jehowa? (2 Ɛkɔndɔ 34:1-3)
12 Okoya Jɔsiya lo mbɔsaka tɛdikɔ t’amɛna. Jɔsiya akatatɛ nyanga Jehowa etena kakinde l’ɛnɔnyi 16. Nde akalangaka mbeka awui wendana la Jehowa ndo nsala lolango Lande. Koko, lɔsɛnɔ komonga wɔdu le nkumekanga ka dikɛnda kɛsɔ. Nde akahombe mamɛ ɔtɛmwɛlɔ wa pudipudi etena kakadiangana ɔtɛmwɛlɔ wa kashi. Ndo kɛsɔ akalɔmbaka dia nde monga la dihonga. La ntondo ka Jɔsiya nkotsha ɛnɔnyi 20, nde akatatɛ minya ɔtɛmwɛlɔ wa kashi oma lo wodja.—Adia 2 Ɛkɔndɔ 34:1-3.
13. Le yɛ, kakɔna kalembetshiya ndjakimɔ le Jehowa?
13 Oyadi wɛ eke dikɛnda di’efula, wɛ koka mbɔsa yɛdikɔ ya mbokoya Jɔsiya lo nyanga Jehowa ndo mbeka waonga ande wa diambo. Etena kayoyosala awui asɔ, wɛ ayɔngɛnangɛna dia ndjakimɔ le nde. Ko shɛngiya yakɔna yayonga la dui sɔ lo lɔsɛnɔ layɛ la lushi la lushi? Luke, lakabatizama l’ɛnɔnyi 14 mbutaka ate: “Oma l’etena kɛnɛ, dimi letsha olimu wa Jehowa lo dihole dia ntondo lo lɔsɛnɔ lami ndo losala la wolo dia mbɔɔngɛnyangɛnya.” (Makɔ 12:30) Ande ɛtshɔkɔ wayoyokondja naka wɛ monga la nsaki ka nsala woho akɔ waamɛ lee!
14. Sha bɛnyɛlɔ diɛnya woho wokoya ɛlɔngɔlɔngɔ l’esekaseka ɛmɔtshi ɛnyɛlɔ ka nkumekanga Jɔsiya.
14 Naa ekakatanu wakoka mpomana la nyu, nyu ɛlɔngɔlɔngɔ wakambɛ Jehowa? Johan, lakabatizama l’ɛnɔnyi 12, mbutaka di’asekande wa la kalasa wakotshutshuyaka dia nnɔ mfɔka ka la dja y’atɔtɔ. Dia nkondja wolo wa nshika tanga la ntondo ka shɛngiya shɔ, Johan akohɔ dia woho w’ɔnwɛlɔ wa mfɔka ɔsɔ wakakoke monga la shɛngiya ya kɔlɔ lo yoonge yande ndo lo lɔngɛnyi lele lam’asande la Jehowa. Rachel, lakabatizama l’ɛnɔnyi 14, nembetshiyaka kɛnɛ kakokimanyiya dia ndɔshana l’ekakatanu wakahomanaka la nde la kalasa. Nde mbutaka ate: “Dimi salaka la wolo dia nyanga akambo wakoka mboholami awui wendana la Bible ndo la Jehowa. Ɛnyɛlɔ, wetshelo wendana l’ɛkɔndɔ koka mboholami ɔkɔndɔ kana prɔfɛsiya kɛmɔtshi ka lo Bible. Kana sawo dimɔtshi koka mboholami divɛsa dimɔtshi di’ohomba diakokami nkahana l’onto ɔmɔtshi.” Ekakatanu wahomana la nyu mbeyaka ntshikitana la wɛnɛ wakahomana la nkumekanga Jɔsiya, koko nyu kokaka monga akanga wa tomba ndo wa kɔlamelo oko nde. Ndɔshana l’ekakatanu wahomana la nyu etena kekenyu akɛnda, nyɔlɔngɔsɔlaka l’ekakatanu ekina wayohomana la nyu l’ɛnɔnyi wayaye.
15. Kakɔna kakakimanyiya Jɔsiya dia kambɛ Jehowa la kɔlamelo tshɛ? (2 Ɛkɔndɔ 34:14, 18-21)
15 Lam’akandakome l’ɛnɔnyi 26, nkumekanga Jɔsiya akatatɛ nɔngɔsɔla tɛmplɛlɔ. L’etena kakasalemaka olimu ɔsɔ, wakashola “dibuku dia Ɛlɛmbɛ wa Jehowa wakandawasha lo tshimbo ya Mɔsɛ.” Lam’akoke nkumekanga kɛnɛ kakataka dibuku sɔ, mbala kakɔ ɔtɔi nde akasale etshikitanu dia nkitanyiya kɛnɛ kakafundama lɔkɔ. (Adia 2 Ɛkɔndɔ 34:14, 18-21.) Onde wɛ ayolangaka mbadiaka Bible mbala la mbala? Naka wɛ mpemba nsala dui sɔ, onde wɛ ayotondoya? Onde wɛ mbekɛka eshidi l’avɛsa wakoka kokimanyiya? Luke, lakatatɛkɛtshi dikambo diande l’etatelo fundaka lo kalupɛ yande awui w’ohomba washolande lo wadielo ande. Naka wɛ nsala oko nde, kete dui sɔ diayokokimanyiya dia mbohɔ avɛsa wa lo Bible kana wetshelo wamboyokondja oma l’avɛsa akɔ. Lo yɛdikɔ yayoyoleka mbeya ndo nanga Bible, mbayoyoleka nkombola kambɛ Jehowa. Oko wakakimanyiya Ɔtɛkɛta wa Nzambi Nkumekanga Jɔsiya dia nsala kɛnɛ kele ɔlɔlɔ, vɔ wayokokimanyiya ndo wɛ lawɔ dia nsala kɛnɛ kele ɔlɔlɔ.
16. Lande na kakasale Jɔsiya munga ya weke ndo wetshelo akɔna wakondjaso?
16 Kondja wetshelo oma lo tɛdikɔ ta kɔlɔ takɔshi Jɔsiya. Lam’aki Jɔsiya l’ɛnɔnyi oko 39, nde akasale munga kakokonya dia nshisha lɔsɛnɔ lande. Nde akayaɛkɛ le nde ndamɛ lo dihole dia nde nɔmba Jehowa ɛlɔmbwɛlɔ. (2 Ɛk. 35:20-25) Lanɛ, sho koka nkondja wetshelo ɔmɔtshi. Oyadi ɛnɔnyi akɔna wele laso ndo edja ka ngande kamboteka Bible, sho pombaka ntetemala nyanga Jehowa. Dui sɔ nembetshiyaka nɔmbaka ɛlɔmbwɛlɔ kande mbala la mbala, mbekaka Ɔtɛkɛta ande ndo kondjaka wahɔ oma l’alako w’oma le Akristo wambotshunda lo nyuma. Awui asɔ wayotokimanyiya dia mbewɔ dia nsala munga ya weke ndo dia monga l’ɔngɛnɔngɛnɔ.—Jak. 1:25.
ƐLƆNGƆLƆNGƆ L’ESEKASEKA LE, NYU KOKA MONGA LA LƆSƐNƆ L’ƆNGƐNƆNGƐNƆ
17. Naa wetshelo w’ohomba wambotokondja oma le nkumi ya dikanga shato ya la Juda?
17 Ekɔ awui efula w’amɛna wakokanyu nsala lo nshi yanyu y’ɔlɔngɔlɔngɔ kana y’esekaseka. Ɔkɔndɔ wa Jɛhɔashi, Uziya ndo Jɔsiya mɛnyaka di’ɛlɔngɔlɔngɔ koka mbɔsa tɛdikɔ ta lomba ndo monga la lɔkɛwɔ langɛnyangɛnya Jehowa. Lo mɛtɛ, ɛlɔngɔlɔngɔ ɛsɔ wakasale munga yakaakonya dia nsala kɛnɛ kaki kɔlɔ. Koko naka nyu mbokoya awui w’ɛlɔlɔ wakawasale ndo mbewɔ munga yakawasale, kete nyayokoka monga la lɔsɛnɔ l’ɔngɛnɔngɛnɔ.
Ɔlɔngɔlɔngɔ Davidɛ akayasukanya la Jehowa. Nde akangɛnyangɛnya Nzambi ndo nde lawɔ akonge la lɔsɛnɔ l’ɔngɛnɔngɛnɔ (Enda odingɔ 18)
18. Bɛnyɛlɔ diakɔna dia l’Afundelo diɛnya dia sho koka monga la lɔsɛnɔ l’ɔngɛnɔngɛnɔ? (Enda ndo osato.)
18 Afundelo wekɔ l’ɛkɔndɔ ekina w’ɛlɔngɔlɔngɔ wakayasukanya suke suke la Jehowa, waketawɔma le nde ndo wakonge la lɔsɛnɔ l’ɔngɛnɔngɛnɔ. Davidɛ aki ɔmɔtshi l’atei awɔ. Etena kakinde ɔlɔngɔlɔngɔ, nde akasɔnɛ dia ntɛmɔla Nzambi ndo l’ɔkɔngɔ nde akayokomaka nkumekanga kaki la kɔlamelo. Nde akasale munga l’etena kɛmɔtshi, koko Nzambi akɔsaka Davidɛ oko onto laki la kɔlamelo. (1 Nku. 3:6; 9:4, 5; 14:8) Wɛ koka keketshama ndo ntshutshuyama dia mbeka awui wendana la lɔsɛnɔ ndo l’olimu wa kɔlamelo wa Davidɛ. Kana wɛ koka nyomoleka mbeka akambo efula wendana l’ɛnyɛlɔ ka Makɔ kana ka Timɔte. Nyayɛna dia vɔ wakakambɛ Jehowa oma ko akɛnda awɔ ndo vɔ wakatetemala mbookambɛ la kɔlamelo. Yɛdikɔ yawɔ ya mbookambɛ yakasha Jehowa ɔngɛnɔngɛnɔ ndo vɔ lawɔ nto waki l’ɔngɛnɔngɛnɔ.
19. Lɔsɛnɔ la ngande lakokayɛ monga la lɔ?
19 Woho wakambayɛ la lɔsɛnɔ layɛ oma ko kakianɛ ayonga la shɛngiya lo lɔsɛnɔ layɛ la lo nshi yayaye. Naka wɛ ndjaɛkɛ le Jehowa, koko aha le yɛ wɛmɛ, kete dui sɔ diayokokimanyiya dia wɛ mbɔsa tɛdikɔ ta lomba. (Tok. 20:24) Wɛ koka monga la lɔsɛnɔ l’ɔngɛnɔngɛnɔ ndo lele l’oyango. Ohɔ dia Jehowa mbɔsaka la nɛmɔ kɛnɛ kosalɛyɛ. Naa yoho yoleki dimɛna yakokayɛ nkamba la lɔsɛnɔ layɛ lo kambɛ Shɛso lele l’olongo loludi la ngandji?
OSAMBO 144 Toke washo lo difuto!
a Ɛlɔngɔlɔngɔ l’esekaseka le, Jehowa mbeyaka dia nyekɔ lo ndɔshana l’ekakatanu wakoka mbidja lɔngɛnyi lasanyu lande l’ohemba. Ngande wakokanyu mbɔsa tɛdikɔ ta lomba tayɔngɛnyangɛnya Shɛso lele l’olongo? Tayɔsɛdingola bɛnyɛlɔ di’akɛnda asato wakakome nkumi ya dikanga la Juda. Nyende wetshelo wakokanyu nkondja oma lo tɛdikɔ takawɔshi.
b Enda kiombo yele l’ɔtɛ a dui ɔnɛ: “Attention à la fausse modestie” yele lo sawo dia l’Ɛtɛrnɛtɛ diele l’ɔtɛ a dui ɔnɛ: “Être vu sur les réseaux sociaux : est-ce important?”
c ELEMBETSHIELO W’ESATO: Kadiyɛso kɛmɔtshi kambotshunda lo nyuma asha kadiyɛso kɛmɔtshi k’osekaseka dako dia lomba.
d ELEMBETSHIELO W’OSATO: Kadiyɛso kɛmɔtshi kaki la sawo lo losanganya lɔmɔtshi la woke akayaɛkɛ le Jehowa ndo akawosha lotombo lo kɛnɛ tshɛ kakinde l’akoka wa nsala.