ƆKƆNDƆ 87

Yeso eke dikɛnda lo tɛmpɛlɔ

OHENDA dikɛnda dia pami diatɛkɛta la dikumanyi dingo. Vɔ wekɔ embetsha wa lo tɛmpɛlɔ ka Jehowa la Jerusalɛma. Ndo dikɛnda dia pami dingo lokombo lande Yeso. Nde ambola yema. Nde aya l’ɛnɔnyi 12.

Embetsha wekɔ lo mamba heyama dia Yeso ekɔ lo mbeya akambo efula w’endana la Nzambi ndo awui wakafundama lo Bible. Ko lande na Mariya la Yɔsɛfu bu lanɛ na? Lende ewɔ na? Ɛsɔ tênde dikambo diakɔ.

Ɔnɔnyi tshɛ Yɔsɛfu akatshɔka la nkumbo kande otsha la Jerusalɛma dia tosala difɛstɔ diakawelɛka ɔnɛ Pasaka. Oma la Nazarɛta polo la Jerusalɛma aki etale efula. Ndoko onto laki la mutuka, kânga kawolo. Vɔ kondjalaka la diangɔ sɔ nshi shɔ. Anto efula wakakɛndakɛndaka l’ekolo ndo wakasalaka nshi shato lo mboka otsha la Jerusalɛma.

Yɔsɛfu akayongaka la nkumbo ka woke. Akose wa Yeso wa amato la w’apami wakandahombe kokɛ wakikɔ. L’ɔnɔnyi ɔsɔ Yɔsɛfu la Mariya wakakalola l’anawɔ oya la Nazarɛta. Vɔ wakafɔnya vate kana Yeso aki kâmɛ l’anto akina wakatasambaka lawɔ. Koko lam’akawatemala, lâsɔ ko wonya ambodja, vɔ kɔmɛna Yeso. Vɔ wakôyange le wanɛ wotɔ lawɔ l’angɛnyi awɔ, koko nde kondjala le wɔ! Ɔnkɔnɛ vɔ wakakalola oya la Jerusalɛma dia ndjôyanga lɛkɔ.

L’ɔkɔngɔ diko, vɔ wakayoshola Yeso lale embetsha. Nde akâlongaka ndo akambolaka wembola. Ndo anto tshɛ wakambaka woho wa yimba yaki la Yeso. Ko Mariya akate ate: ‘Ɔna le, lande na atosalɛyɛ ɔnkɔnɛ na? Dimi la shɔ tambokoyanga la lonyangu efula.’

Yeso akakadimola ate: ‘Lande na atanyanyange na? Onde nyu hanyeye dia dimi pombaka ndjâla lo luudu la Mbapa?’

Eelo, Yeso akalangaka ndjâla lɛnɛ okokinde mboka dui dia Nzambi. Kema ɔsɔ ekɔ mboka kahombaso ndjela ndo sho lawɔ? Lam’akawakalola la Nazarɛta, Yeso akatshɔka lo sanganya y’ɔtɛmwɛlɔ oseka lomingu tshɛ. Nɛ dia nde akahokɛka lutui ɔlɔlɔ nshi tshɛ, nde akeyaka akambo efula w’oma lo Bible. Tônge oko Yeso ndo toyele ɛnyɛlɔ kande.

Luka 2:​41-52; Mateu 13:​53-56.