Nyetsha ananyu

Yeso akeke woho wa monga l’okitanyiya

ONDE wɛ tongaka l’okakatanu dia monga l’okitanyiya tena dimɔtshi?—a Naka ngasɔ mbediɔ, kete ɔsɔ kema dui dia diambo. Sho tshɛ tongaka l’okakatanu dia monga l’okitanyiya tena dimɔtshi. Onde wɛ akeyaka dia kânga Yeso akeke woho wa monga l’okitanyiya?—

Onde wɛ mbeyaka anto wahomba ana w’akɛnda tshɛ nkitanyiya?— Ele papa la mama. Bible mbutaka ɔnɛ: “Nyukitanyia ambutshi anyu le Khumadiondjo.” (Efeso 6:1) Onto akɔna ele She aki Yeso?— Jehowa Nzambi ndo nde kele Shɛso sho lawɔ. (Mateu 6:9, 10) Ko naka wɛ nkadimola ɔnɛ Yɔsɛfu mbaki she Yeso ndo Mariya mbaki nyango, kete ndo okadimwelo ɔsɔ wekɔ mɛtɛ. Onde wɛ mbeyaka woho wakawayokomaka ambutshi ande?—

Ondjelo Ngabiriyɛlɛ akatɛ Mariya woho wakandahombe ndjokoma nyango aki Yeso, kânga mbakinde ateyana ndoko la pami. Jehowa mbakasale dia nde ntshɔ diemi lo tshimbo ya dihindo dimɔtshi dia woke. Ngabiriyɛlɛ akatɛ Mariya ate: “Wulu wa Khum’Ulungu wayukukhukhume la dedi diandi. Okone vo wayole ona layuyuta vati: l’Ekila, On’a [Nzambi].”—Luka 1:30-35.

Nzambi akasangola lɔsɛnɔ l’Ɔnande oma l’olongo ko lidja l’otema waki Mariya. Oma lâsɔ, Ɔnɔsɔ akayahamaka l’otema ande woho watohamaka ana akina tshɛ l’etema w’anyangɛwɔ. Ngɔndɔ oko divwa l’ɔkɔngɔ, Yeso akôtɔ. L’etena kakɔ kâmɛ, Yɔsɛfu akatshuke Mariya ndo anto efula wakɔshi dia Yɔsɛfu mbaki she aki Yeso ka mɛtɛ. Koko, Yɔsɛfu aki she aki Yeso ka lôdia. Ɔnkɔnɛ, lo yoho mɔtshi, Yeso aki l’ambutshi ahende w’apami.

Etena kaki Yeso eke l’ɛnɔnyi 12, nde akasale dikambo dimɔtshi diakɛnya polo lo yɛdikɔ yakɔna yakandokaka Jehowa She ka l’olongo ngandji. L’etena kɛsɔ, oko waki mbekelo kawɔ, nkumbo kaki Yeso wakande lɔkɛndɔ l’otale otsha la Jerusalɛma lo dambo di’Elekanelo. L’ɔkɔngɔ wa dambo sɔ, lam’akawayakalolaka oya la Nazarɛta, Yɔsɛfu nde la Mariya wakɛnyi dia Yeso komonga kâmɛ la wɔ. Onde wɛ mbeyaka lande na kakawawohɛ?—

Lo mɛtɛ, Yɔsɛfu nde la Mariya waki l’ana akina oya l’etena kɛsɔ. (Mateu 13:55, 56) Ndo nto, ondo vɔ wakayakalolaka l’ewotɔ awɔ wele oko Jakɔba nde la Joani kâmɛ la shɛwɔ Zebede, ndo nyangɛwɔ Salɔme, ɔnɛ laki ondo kadiyɛnde la Mariya. Ɔnkɔnɛ, ondo Mariya akafɔnya dia Yeso aki l’olui w’ewotɔ ande ekina.—Mateu 27:56; Mako 15:40; Joani 19:25.

Etena kakɛnyi Yɔsɛfu nde la Mariya ɔnɛ Yeso amboshishɔ, vɔ wakakalola esadi eto otsha la Jerusalɛma. Vɔ wakatawoyangaka wele bu l’elongamelo ka mbɛna nto. Lushi la sato, vɔ wakatotanaka lo tɛmpɛlɔ. Mariya akawombola ate: “Ukundi ambuyututshela okone na? Enda, dimi la sho tambukuyanga la lunyangu!” Koko Yeso akâkadimola ate: “Katanyanyangi na? Nyu hanyeyi nyati: dieli la mi dia ndjala lu luudu la Papa?”—Luka 2:45-50.

Onde wɛ fɔnyaka dia Yeso akakadimola nyango lo yoho ya kɔlɔ?— Lo mɛtɛ, ambutshi ande wakeyaka dia nde akalangaka ntɛmɔla Nzambi lo luudu lande. (Osambu 122:1) Lâsɔ, shi aki dimɛna dia Yeso mbɔsa dia tɛmpɛlɔ kaki Nzambi mbaki dihole dia ntondo diakawahombe ntshɔ dia tôyanga?— L’ɔkɔngɔ diko, Mariya akatetemala nkanyiya lo dikambo di’okadimwelo wakawosha Yeso.

Dionga diakɔna diaki la Yeso otsha le Yɔsɛfu nde la Mariya?— Bible mbutaka ɔnɛ: “[Jesu] akatshu la wo, akakumi la Nazareta; akakitanyiaka aui awo.” (Luka 2:51, 52, sho mbɛnganyisha alɛta ango.) Wetshelo akɔna wakokaso nkondja oma l’ɛnyɛlɔ kaki Yeso?— Eelo, sho lawɔ pombaka monga l’okitanyiya otsha le ambutshi aso.

Koko aha nshi tshɛ mbakidiɔ dui dia wɔdu dia Yeso monga l’okitanyiya—kânga otsha le She lele l’olongo.

L’otsho wa la ntondo ka nyɔi kande, Yeso akalɔmbɛ Jehowa dia kana Nde ayotshikitanya kɛnɛ kakandalangaka dia Yeso nsala naka kokaka. (Luka 22:42) Koko Yeso akakitanyiya Nzambi kânga mbaki dui sɔ komonga wɔdu. Bible mbutaka ɔnɛ “ndi akeki [dia] ndjala la ukitanyia lu akambu wakandasuwaka.” (Heberu 5:8) Onde wɛ fɔnyaka dia ndo sho lawɔ kokaka nkondja wetshelo ɔsɔ?—

[Nɔtɛ ya l’ɛse ka dikatshi]

AMBOLA:

▪ Ngande wakayokomaka Mariya nyango aki Yeso, ndo ngande wakayokomaka Yeso lo monga l’ambutshi ahende w’apami lo yoho mɔtshi?

▪ Lande na kaki ambutshi waki Yeso kombeya dia nde akatshikadi l’ɔkɔngɔ?

▪ Lende akalongamɛka Yeso di’ambutshi ande mboyanga?

▪ Wetshelo akɔna wakokayɛ nkondja oma l’ɛnyɛlɔ kaki Yeso?

[Osato wa lo lɛkɛ 31]

Lande na kɔsayɛ dia Yɔsɛfu nde la Mariya wakahombe toyanga Yeso ntondo lo tɛmpɛlɔ?