ƆKƆNDƆ 88

Joani ambobatiza Yeso

ENDA enga kayaholɔ l’ɔtɛ wa pami kengo. Pami kakɔ lokombo lande Yeso. Nde aya l’ɛnɔnyi oko 30. Pami kele kâmɛ lande lokombo lande Joani. Sho takeke dikambo dimɔtshi di’endana lande. Onde wɛ akohɔ etena kakatshu Mariya dia tênda l’otɔ lande, Elizabɛtɛ, ndo woho wakakunyɔkunyɔ ɔna laki l’otema w’Elizabɛtɛ l’ɔngɛnɔngɛnɔ? Ɔn’akɔ laki atotɔ aki Joani. Ko kakɔna kasala Yeso nde la Joani kakianɛ na?

Joani mala dindja Yeso l’ashi w’Ɔkɛdi wa Jɔrɔdana. Woho ɔsɔ mbabatizawɔ onto. Ntondo vɔ dindjaka onto la tshondo l’ashi, ko ndjotopola. Nɛ dia ɔsɔku mbakasalaka Joani l’anto, ko vɔ ndjowɔlɛ ɔnɛ: Joani Obatizanyi. Ko lande na kakabatiza Joani Yeso na?

Joani akasale ɔsɔku nɛ dia Yeso akaye dia ndjobatizama le nde. Joani akabatizaka anto wakalangaka mɛnya dia vɔ wamboyatshumuya lo kɔlɔ yakawasale. Ko, onde Yeso akasale dikambo dimɔtshi dia kɔlɔ diakandakoke ndjatshumuya oka? Kema, Yeso kosala kɔlɔ nɛ dia nde aki Ɔna Nzambi lakaye oma l’olongo. Lâsɔ nde akalɔmbɛ Joani dia nde mbobatiza l’ɔkɔkɔ okina. Tênde ɔkɔkɔ akɔ.

Ntondo ka Yeso ndja le Joani, nde aki otshudi w’abaya. Otshudi w’abaya ekɔ onto lasala diangɔ di’abaya oko mɛsa, kɔsa l’ekala. Yɔsɛfu, om’aki Mariya aki otshudi w’abaya ko nde aketsha ndo Yeso olimu akɔ. Koko, Jehowa kotoma Ɔnande la kɛtɛ dia nde ndjoyala otshudi w’abaya. Nde aki l’olimu ɔmɔtshi wa lânde wakandawosha dia nde sala, ndo etena ka Yeso tatɛ la sala olimu akɔ kakakoke. Ɔnkɔnɛ, dia Yeso mɛnya ɔnɛ nde amboya kakianɛ dia ndjosala lolango la She, nde akalɔmbɛ Joani dia nde mbobatiza. Onde Nzambi akangɛnangɛna dikambo sɔ?

Eelo, nde akangɛnangɛna, nɛ dia lam’akayatombaka Yeso oma l’ashi, dui diakaye oma l’olongo diata ɔnɛ: ‘Ɔnami ɔnɛ, dimi mbɔ̂ngɛnangɛnaka.’ Ndo nto, akɛnama oko olongo ambodihɔ ko enga kengo kakaholwɛ Yeso. Koko kondjala enga ka mɛtɛ. Akɛnamaka tsho oko enga. Koko, aki mɛtɛ nyuma k’ekila ka Nzambi.

L’etena kengo, Yeso aki l’awui efula wa kana yimba, ɔnkɔnɛ nde akatshu lo dihole dimɔtshi dia ndamɛ nshi 40. Satana akayelana lande lɛkɔ. Satana akahembe Yeso tena sato dia nde sala dikambo dimɔtshi diahɔtɔnɛ l’ɛlɛmbɛ wa Nzambi. Koko Yeso kosala.

L’ɔkɔngɔ a dikambo sɔ, Yeso akakalola ndo akahomana l’apami amɔtshi wakonge andjedi kana ambeki ande wa ntondo. Nkombo y’amɔtshi yɔ nyɛ: Andɛlɛ, Petero (lakawelɛka nto ɔnɛ Simɔna), Filipi la Natanyɛlɛ (lakawelɛka nto ɔnɛ Batɛlɛmi). Yeso l’ambeki asɔ w’eyoyo wakonɔ lo lɛkɛ la kɛtɛ la Ngalileya. La Ngalileya vɔ wakatemalaka la Kana, ngelo ka wa Natanyɛlɛ. Lɛkɔ, Yeso akatotshɔka lo difɛstɔ dia woke dia diwala, ndo akatosalaka dihindo diande dia ntondo. Onde wɛ dieyaka? Nde akakadimula ashi wanu.

Mateu 3:​13-17; 4:​1-11; 13:55; Mako 6:3; Joani 1:​29-51; 2:​1-12.