ƆKƆNDƆ 108
Lo mboka k’otsha la Damasɛkɛ
ONDE wɛ mbeyaka pami kengo kɔkwɛ lo kɛtɛ? Toko Saulo. Ohɔ dia nde mbakalamaka ekutu w’apami wakôkaka Stefano ave. Ohênda osase a woke ongo! Kakɔna kambotomba na?
L’ɔkɔngɔ wa Stefano ndjakema, Saulo akatatɛ pɛnyahɛnya ambeki wa Yeso. Nde akatshɔka lo luudu la luudu dia tâwatondjaka ko tâwadjaka lo lokanu. Ambeki efula wakalawɔ otsha l’esomba ekina ndo wakatotatɛ la sambisha “lukumu l’ololo” lɛkɔ. Koko Saulo akatshɔka l’esomba ekina dia tayangaka ambeki wa Yeso. Kakianɛ, nde aki lo tatshu otsha la Damasɛkɛ. Koko, l’atei a mboka, dikambo dimɔtshi dia diambo diakatombe diɔ nɛ:
La shashimoya, osase w’oma l’olongo wakahɛtɛ Saulo. Nde akakɔ lo kɛtɛ, oko wɛnaso lanɛ. Ko dui dimɔtshi diakate ɔnɛ: ‘Saulo, Saulo! Lande na kapɛnyahɛnyayɛ na?’ Anto waki kâmɛ la Paulo wakɛnyi osase ndo wakoke dui, koko vɔ kokoka shihodia kɛnɛ kakatɛkɛtamaka.
Saulo akambola ate: ‘Nkumadiɔndjɔ, wɛ na?’
Ko dui diakɔ diakawotɛ ate: ‘Dimi Yeso, ɔnɛ lahɛnyahɛnyayɛ.’ Yeso akate ɔsɔku nɛ dia lam’akahɛnyahɛnyaka Saulo ambeki ande, nde akôkaka oko nde ndamɛmɛ mbakandahɛnyahɛnyaka.
L’etena kɛsɔ Saulo akawombola ate: ‘Nkumadiɔndjɔ, kakɔna kahombami sala na?’
Yeso akawotɛ ate: ‘Emala kele otshu otsha la Damasɛkɛ. Lɛkɔ, wayotokotɛ kɛnɛ kahombayɛ sala.’ Etena kakemala Saulo, lam’akandadihola asho, nde kokoka mɛna ndoko ɛngɔ. Nde akayala tshungu! Ɔnkɔnɛ, apami waki kâmɛ lande wakokimɛ lo lonya ko wakɔ̂lɔmbɔla otsha la Damasɛkɛ.
L’etena kakɔ, Yeso akatɛ ombeki ande ɔmɔtshi waki la Damasɛkɛ ate: ‘Ananiya, emala. Tshɔka otsha l’ɔsɛsɛ welɛwɔ Osembwe. Lo luudu laki Judasɛ kele otombole pami kɛmɔtshi lokombo lande Saulo. Dimi lambɔ̂sɔna dia nde ndjâla okambi ami wa lânde.’
Ananiya akakitanyiya dui sɔ. Lam’akandatane Saulo, nde akawahɛ anya ndo akawotɛ ate: ‘Nkumadiɔndjɔ akatumi dia ndjokɔsɛnya ndo dia ndjokolodia la nyuma k’ekila.’ Ɔtɛkɛta kele edja, diangɔ dimɔtshi diele oko kaya diakamɔ oma lo asho waki Saulo ko nde akɛnyi nto.
Yeso akakambe la Saulo olimu lo yoho ya diambo dia sambisha anto wa lo wedja efula. Nd’akɔ kakayoyalaka ɔpɔstɔlɔ Paulo, tayeka akambo efula w’endana lande. Koko ntondotondo, totokênda kɛnɛ kakatome Nzambi Petero dia nde sala.
Etsha 8:1-4; 9:1-20; 22:6-16; 26:8-20.