TSHAPITA 25

Onde Atshi Wa Kɔlɔ Koka Tshikitanya Dionga Diawɔ?

KEMA otonga dikambo dia dimɛna efula otondonga onto tshɛ salaka kɛnɛ kele ɔlɔlɔ?. . . Koko ndoko onto lasala paka ɔlɔlɔ oto nshi tshɛ. Onde wɛ mbeyaka lande na kasalaso sho tshɛ awui wa kɔlɔ tena dimɔtshi kânga lam’alangaso sala kɛnɛ kele ɔlɔlɔ?. . . Ekɔ nɛ dia sho tshɛ takotɔ la pɛkato. Koko anto amɔtshi salaka awui efula woleki kɔlɔ. Vɔ petshaka anto akina ndo pumuyaka anto asɔ l’okonda. Onde wɛ fɔnyaka dia vɔ koka tshikitanya dionga diawɔ ko mbeka woho wa monga anto w’ɔlɔlɔ?. . .

Ohenda ɔlɔngɔ a pami walama ahɔndɔ waki anto wôka Stɛfano ave. Lokombo lande la lo Hɛbɛru ekɔ Saulo, koko lokombo lande l’oma la Rɔma ekɔ Paulo. Nde ekɔ lo ngɛnangɛna woho wadiakawɔ Stɛfano ombeki ɔmɔtshi waki Ombetsha a Woke. Tende lande na kasala Saulo awui wa kɔlɔ wa ngasɔ.

Saulo eke ose olui ɔmɔtshi w’ɔtɛmwɛlɔ w’ase Juda wakawelɛka Afarisɛ. Afarisɛ wakikɔ la Bible, koko vɔ wakalekaka mbidja yimba lo wetshelo w’ewandji awɔ ɛmɔtshi w’ɔtɛmwɛlɔ. Kɛsɔ mbakatshutshuya Saulo dia sala awui wa kɔlɔ.

Saulo akikɔ lam’akawande Stɛfano la Jerusalɛma. Wakatɔlɛ Stɛfano la ntondo ka tuminadi tele Afarisɛ amɔtshi waki tushushi lɔkɔ. Kânga mbakawataka awui wa kɔlɔ lo lokombo la Stɛfano, nde komboka wɔma. Ko wonya akɔ wâmɛ, Stɛfano akonge la dihonga ndo akasambisha tushushi dimɛna lo kɛnɛ kendana la Jehowa Nzambi ndo la Yeso.

Koko tushushi tɔsɔ kɔngɛnangɛna kɛnɛ kakawokaka. Vɔ wakeyaka awui efula lo dikambo diaki Yeso. Ndo yema tshitshɛ la ntondo ka dikambo sɔ, vɔ wakasha dikimɔ dia ndjaka Yeso! Koko, l’ɔkɔngɔ wa lâsɔ, Jehowa akolola Yeso dia tɔsɛna l’olongo. Koko, lo dihole dia vɔ tshikitanya tokanyi tawɔ, tushushi tɔsɔ wakalɔshana l’ambeki waki Yeso.

Tushushi takɔ wakande Stɛfano ndo wakatshu la nde l’andja w’osomba. Vɔ wakɔkɔmɔla wolo polo ndo lo nde nkɔ la nkɛtɛ ndo wakawoke ave. Ndo oko wakokayɛ mɛna lo sango nɛ, Saulo ndokôngo awaenda. Nde akafɔnyaka dia kema kɔlɔ ndjaka Stɛfano.

Onde wɛ mbeyaka lande na kakafɔnyaka Saulo ngasɔ?. . . Lo lɔsɛnɔ lande l’otondo, Saulo aki Ofarisɛ, ndo nde aketawɔka dia wetshelo waki Afarisɛ waki dimɛna. Nde akɔsaka anto asɔ oko ɛnyɛlɔ ka nde ndjela, diakɔ diakandasalaka awui oko vɔ.​—⁠Etsha 7:​54-60.

L’ɔkɔngɔ wa vɔ ndjaka Stɛfano, kakɔna kakasale Saulo na?. . . Nde akone dia munda ambeki akina tshɛ waki Yeso! Nde akatshu lawakawɔ ndo akande oyadi apami kana wamato. Oma lâsɔ nde akawadje lo lokanu. Ambeki efula wakamɔ oma la Jerusalɛma, koko vɔ kotshika dia sambisha awui wendana la Yeso.​—⁠Etsha 8:​1-4.

Dui sɔ mbakatshutshuya Saulo dia nde nyomoleka mpetsha ambeki waki Yeso. Ɔnkɔnɛ, nde akatshu le Kayifasi laki Ɔlɔmbɛdi wa Lâdiko ndo akakondja lotshungɔ la nde tshɔ ntonda Akristo wa l’osomba wa Damasɛkɛ. Saulo akalange mbaela oko ase lokanu oya la Jerusalɛma dia ndjowasha dilanya. Koko lam’akandatatshɔka otsha la Damasɛkɛ, dui dimɔtshi dia diambo diakatombe.

Osase wakangamɔ oma l’olongo ndo nde akoke dui dimɔtshi diata ɔnɛ: “Saulu, Saulu, okoko wana wansuyaye?” Yeso mbakatɛkɛta oma l’olongo. Osase wakahɛtɛ wolo efula polo lo konya Saulo tshungu, ndo anto waki kâmɛ la Saulo mbakahombe mbɔlɔmbɔla otsha la Damasɛkɛ.

L’ɔkɔngɔ wa nshi shato, Yeso akɛnama lo ɛnɛlɔ le ombeki ande ɔmɔtshi waki la Damasɛkɛ wakawelɛka Ananiya. Yeso akatɛ Ananiya dia tenda Saulo, woho wa tɔ̂sɛnya washo ndo mbôsambisha. Saulo aketawɔ akambo wa mɛtɛ wendana la Yeso wakosambisha Ananiya. Nde akasɛnɛ dimɛna nto. Lɔsɛnɔ lande l’otondo lakatshikitana ndo nde akakome okambi wa kɔlamelo waki Nzambi.​—⁠Etsha 9:​1-22.

Onde wɛ ambokoka mboka kakianɛ lande na kakasalaka Saulo awui wa kɔlɔ?. . . Aki nɛ dia wakawetsha awui wa kɔlɔ. Nde akayelaka ɛnyɛlɔ k’anto waki komonga la kɔlamelo otsha le Nzambi. Ndo nde aki l’atei w’anto wakalekaka ndjela tokanyi t’anto lo dihole dia ndjela Ɔtɛkɛta wa Nzambi. Ko lande na kakatshikitanya Saulo lɔsɛnɔ lande ndo kakandatatɛ sala kɛnɛ kele ɔlɔlɔ kânga mbele Afarisɛ wakatetemala ndɔshana la Nzambi na?. . . Aki nɛ dia Saulo kompetsha akambo wa mɛtɛ. Ɔnkɔnɛ, lam’akawawetsha kɛnɛ kele mɛtɛ nde aki suke dia kitanyiya akambo akɔ.

Onde wɛ mbeyaka woho w’onto wakayokomaka Saulo l’ɔkɔngɔ diko?. . . Eelo, nde akayeyamaka oko ɔpɔstɔlɔ Paulo, ɔpɔstɔlɔ ɔmɔtshi waki Yeso. Ndo ohɔ dia Paulo akafunde abuku efula wa lo Bible ndeka afundji akina tshɛ.

Ekɔ anto efula wele oko Saulo wakoka tshikitanya yoho yawɔ ya lɔsɛnɔ. Koko ɔsɔ kema dikambo dia wɔdu nɛ dia ekɔ onto ɔmɔtshi la tshutshuya anto la wolo dia vɔ sala awui wa kɔlɔ. Onde wɛ mbeyaka onto akɔ?. . . Yeso akatɛkɛta dikambo di’onto ɔsɔ lam’akandɛnama le Saulo lo mboka k’otsha la Damasɛkɛ. Yeso akatɛ Saulo oma l’olongo ate: ‘Dimi lambokotoma dia todihola washo w’anto, dia towanya oma lo wodjima oya l’osase ndo oma lo lowandji laki Satana oya le Nzambi.’​—⁠Etsha 26:​17, 18.

Eelo, Satana Diabolo mbatshutshuya anto tshɛ dia sala awui wa kɔlɔ. Onde tena dimɔtshi wɛ mɛnaka wolo dia sala kɛnɛ kele ɔlɔlɔ?. . . Sho tshɛ tɛnaka dikambo sɔ wolo tena dimɔtshi. Satana todjɛka wekamu. Koko ekɔ ɔkɔkɔ okina wele sala kɛnɛ kele ɔlɔlɔ bu nshi tshɛ dikambo dia wɔdu. Onde wɛ mbeyaka ɔkɔkɔ akɔ?. . . Ɔkɔkɔ akɔ ko: takotɔ la pɛkato.

Pɛkato kɛsɔ mbasala mbala efula dia sho mɛna wɔdu sala kɛnɛ kele kɔlɔ lo dihole dia sala kɛnɛ kele ɔlɔlɔ. Lâsɔ ahombaso sala na?. . . Eelo, sho pombaka sala la wolo tshɛ dia sala kɛnɛ kele ɔlɔlɔ. Lam’asalaso dui sɔ, sho koka ndjashikikɛ dia Yeso, onto ɔnɛ latoka ngandji ayotokimanyiya.

Lam’aki Yeso lanɛ la nkɛtɛ, nde akɛnya ngandji kaki lande otsha le anto wakasale awui wa kɔlɔ koko wakayotshikitanyaka waonga awɔ. Nde akeyaka dia aki wolo efula le wɔ dia vɔ tshikitanya waonga awɔ. Ɛnyɛlɔ, aki wamato amɔtshi wakeyana l’apami efula. Ɔsɔ aki mɛtɛ dui dia kɔlɔ. Bible mbetaka wamato wa ngasɔ ɔnɛ wamato wa loseka kana wa monanyi.

Mbala kɛmɔtshi womoto ɔmɔtshi la ngasɔ akoke anto watɛkɛta dia Yeso, ɔnkɔnɛ nde akaye lɛnɛ aki Yeso lo luudu laki Ofarisɛ ɔmɔtshi. Womoto akɔ akatɛ Yeso esɔ l’ekolo ndo akakitola asɔi ande oma l’ekolo waki Yeso la divo diande. Nde aki la lonyangu efula l’ɔtɛ wa pɛkato yande, ɔnkɔnɛ, Yeso akôdimanyiya. Koko Ofarisɛ ɔsɔ kɔfɔnyaka dia vɔ kokaka dimanyiya womoto ɔsɔ pɛkato yande.​—⁠Luka 7:​36-50.

Onde wɛ mbeyaka kɛnɛ kakatɛ Yeso Afarisɛ amɔtshi?. . . Nde akawatɛ ate: ‘Wamato wa loseka wayeta la ntondo kanyu lo diolelo diaki Nzambi.’ (Mateu 21:31) Yeso akate ngasɔ dikambo wamato wa loseka wakonge la mbetawɔ le nde ndo vɔ wakatshike awui awɔ wa kɔlɔ. Koko Afarisɛ wakatetemala la salɛ ambeki waki Yeso awui wa kɔlɔ.

Ɔnkɔnɛ, lam’ɛnya Bible dia kɛnɛ kasalaso kekɔ kɔlɔ, sho pombaka monga suke dia tshika awui asɔ. Ndo lam’ekaso kɛnɛ kalanga Jehowa dia sho sala, sho pombaka sala tshɛ dia sala dui diakɔ. Ngasɔ mbayotɔngɛnangɛna Jehowa ndo mbayondotosha lɔsɛnɔ la pondjo.

Dia tokimanyiya dia mbewɔ sala kɛnɛ kele kɔlɔ, tadia kâmɛ Osambu 119:​9-11; Tukedi 3:​5-7; ndo 12:⁠15.

[Osato wa lo lɛkɛ 133]

Lande na kɛna Saulo dia ekɔ dimɛna ndjaka Stɛfano?

[Osato wa lo lɛkɛ 135]

Onto akɔna atɛkɛtɛ Saulo, ndo Onto akɔ ambotoma Saulo dia sala na?

[Osato wa lo lɛkɛ 136]

Lande na kambodimanyiya Yeso womoto ɔnɛ lakasale awui wa kɔlɔ?