Tshumanelo Diambɔlɔngɔswama dia Esambishelo ka Diolelo dia Nzambi
Lanɛ la kɛtɛ, Yeso Kristo akasambisha Diolelo dia Nzambi, akatatshɔkaka lo ngelo la ngelo ndo l’esomba l’esomba. Nde akalowanya ambeki ande ndo akâtome dia sala olimu akɔ wâmɛ. La ntondo ka nde mbudɛ otsha l’olongo, nde akadjangɛ ambeki ande dia vɔ mbetɛ anto wa lo wedja tshɛ ambeki. Omako tɔngɔ katɔ, etshumanelo k’Akristo wa ntondo kakalɔngɔswama dia sala esambishelo ka lokumu l’ɔlɔlɔ. L’oseka dihole tshɛ diakatatshɔkaka ambeki, anto wakâtanaka wasambisha Diolelo dia Nzambi.—Mateu 4:17, 23; 10:1-16; 28:19, 20; Luka 4:43, 44; 8:1; 10:1-9; Etsha 1:8; 4:31; 5:42; 8:12; 19:8; 28:23, 30, 31; Romo 10:9, 10, 14.
Lo pɔlɔfɛsi ka Yeso k’endana l’ekomelo ka dikongɛ di’akambo nɛ, nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” Esambishelo kɛsɔ kele ɔkɛndɛ wa ntondo w’etshumanelo k’Akristo ɛlɔ kɛnɛ.—Mateu 24:14; Mako 13:10.
L’andja w’otondo, tshumanelo tshɛ di’Ɛmɛnyi wa Jehowa diambɔlɔngɔswama dia membola mbilo yawɔ tshɛ l’ɔnɔngɔ l’esambishelo ka lokumu l’ɔlɔlɔ la Diolelo dia Nzambi. Di’akambo tshɛ salema la kongamu, lo wodja tshɛ mbalasa ka la Société Watch Tower mbishaka etshumanelo tshɛ mbilo kɛmɔtshi dia tɔ kisambisha. Ko etshumanelo kakɔ ndjâtolaka mbilo kakɔ lo tenyi diayoshamaka le apandjudi wele l’ɔkɛndɛ wa mbidja yimba di’anto wa lɔkɔ nongola diewoyelo.—1 Koreto 14: 33, 40.
Esangɔ tshɛ, Ɛmɛnyi membolaka anto lo luudu la luudu. Lo sanganya yawɔ ya l’etshumanelo, Ɛmɛnyi wa Jehowa ndowanyemaka lo yoho ya vɔ sambisha diewoyelo dia Diolelo lo tshena pe lo soko la la soko oma l’ekimanyielo ka Bible. Ɛmɛnyi tshɔ̂ka l’ekanda w’endana la Bible watawatshikɛ onto tshɛ lalanga pamia ewo kande ka Dui dia Nzambi.
Dia vɔ mbisha onto tshɛ lele lo mbilo diaaso dia nde mboka diewoyelo di’ohomba dia Diolelo, etena katshɔwɔ lo luudu la luudu, Ɛmɛnyi fundaka kombo y’anto wele kema lâwɔ lo kiatshi mɔtshi ndo ya wanɛ wele, l’ɛkɔkɔ ekina, hawokoki sambishama ɔlɔlɔ. Vɔ wayoyowaembola l’etena kekina. Etena katɛnyaka onto ɔmɔtshi posa kande, vɔ fundaka lokombo lande lo kiatshi mɔtshi dia ndjokalola dia ndjowela sango kina y’oma l’Afundelo. Onto tshɛ lalanga kokaka kondja wekelo wa Bible wa mbala la mbala. Akambo asɔ tshɛ salemaka aha la futa ndoko mɛya.
Ndo nto, Ɛmɛnyi wa Jehowa ndowolɛka wanɛ w’eta l’otadimbo periodikɛ. Ɔsɔku mbakokawɔ pomana l’anto efula wahawakoke tana la wâkawɔ. Wolo w’oshika mbidjamaka dia komɛ onto tshɛ layoka.—Etsha 17:17; Enyelo 14: 6, 7; 22:17.
Lande na Ɛmɛnyi wa Jehowa tetemalaka la membola anto lam’eyawɔ ɔnɛ efula ka l’atei awɔ hawotɛnya saki kawɔ na? Mɛnamaka dia akambo w’onto l’onto totshikitanaka, amɔtshi tolongolaka diembwelo dia mbala kayaye ɔlɔlɔ, mbeyaka ndjâla ko ose nkumbo ɔmɔtshi amboya lo soko ko ndjokitɛ lo ndjasha lo diewoyelo.
Yeso akatɛ ambeki ande ate: “Keli ntundu nyutayangi diulelu la ololo wa Unyashungu.” Esambishelo ka Diolelo dia Nzambi kekɔ ohomba efula dia sho nyanga Diolelo ntondo, lɔkɔ mbele, Ɛmɛnyi wa Jehowa mbetɛka dui sɔ oweso w’ohomba lo lɔsɛnɔ lawɔ.—Mateu 6:33; 2 Timote 4:2.
• Naa olimu wakasale Yeso la Akristo wa ntondo wakalakema dia salema ndo lo nshi yaso nyɛ na?
• Woho akɔna wɔlɔngɔswami olimu w’esambishelo waki Ɛmɛnyi wa Jehowa na?
• Lande na Ɛmɛnyi tetemalaka membola anto lam’eyawɔ ɔnɛ efula ka l’atei awɔ hawotɛnyaka saki kawɔ na?
[Esato wa lo lɛkɛ 16, 17]
Ɛmɛnyi wa Jehowa wekɔ lo sambisha Diolelo dia Nzambi lo wedja wotshikitanyi
Thaïlande
Mexique
Pays-Bas
Corée
Curaçao
Ghana
Angleterre
Australie