Ambola w’oma le ambadi aso . . .

Lande na kasambisha Ɛmɛnyi wa Jehowa lo luudu la luudu?

▪ Lo ndjela Bible, Yeso akadjangɛ ambeki ande ate: “Okone nyutshu, nyete wedja tshe ambeki, . . . nyuwaetshaki.” (Mateu 28:19, 20) Onde didjango sɔ mendanaka l’Akristo tshɛ? Ambeki wa Yeso wa lo ntambe ka ntondo wakashihodia dia diɔ mendanaka l’Akristo tshɛ. Ɛnyɛlɔ, ɔpɔstɔlɔ Petero akafunde ate: “Ndi [Yeso] akatokokomiya ati: Nyusambisha antu.” (Etsha 10:42) Ndo ɔpɔstɔlɔ Paulo nde lawɔ akayofunda ate: “Naka dimi lambusambisha lukumu l’ololo, dimi kema la dikambu dia ndjatumbula, ne dia okende weko ladiku diami. Fono keko lemi, naka dimi halasambisha lukumu l’ololo.”—1 Koreto 9:16.

Aha paka ɔpɔstɔlɔ Paulo nde la Petero ato mbakakitanyiya didjango diaki Yeso sɔ, koko ndo ambeki akina wa lo ntambe ka ntondo. Vɔ waketɛ esambishelo olimu awɔ woleki ohomba. (Etsha 5:28-32, 41, 42) Ɛlɔ kɛnɛ, Ɛmɛnyi wa Jehowa wekɔ lo nsala la wolo dia nsambisha anto akina. L’ɛnyɛlɔ ka Yeso, ɔtɛ a dui wa losango lasambishawɔ ele “diulelu dia l’ulungu.”—Mateu 10:7.

Waa na wahomba sambishama losango la Diolelo? Yeso akɛnya ɔnɛ anto wa l’ahole tshɛ. Nde akatɛ ambeki ande ate: “Nyu nyayuyala emenyi ami . . . edja ndu l’ekumelu ka kete.” (Etsha 1:8) Nde akawatɛ nto ate la ntondo k’ekomelo ka dikongɛ nɛ di’akambo ndja, “lukumu l’ololo lone la diulelu layusambishama lu kete tshe, uku omenyi.” (Mateu 24:14) L’ɔtɛ wa didjango sɔ mbele, Akristo wa lo ntambe ka ntondo wakasale la wolo dia nsambisha anto akina, aha paka wanɛ wakaweyaka ato kana wanɛ waki kɔtɛmɔlaka. (Kolosai 1:23; 1 Timote 2:3, 4) Woho akɔ wâmɛ mbele, Ɛmɛnyi wa Jehowa ɛlɔ kɛnɛ wekɔ lo nsala la wolo dia nsambisha anto tshɛ.a

Naa yoho yoleki dimɛna ya nsambisha losango la Diolelo? Yeso lakeyaka woho wa nsambisha anto efula akatome ambeki ande l’esomba, lo tongelongelo ndo lo mvudu y’anto dia tosambisha. (Mateu 10:7, 11, 12) L’ɔkɔngɔ wa nyɔi ndo eolwelo ka Yeso, ambeki ande wakatetemala nsambisha ‘lo luudu la luudu.’ (Etsha 5:42) Lo ɛnyɛlɔ ka Yeso, vɔ wakasambishaka ahole tshɛ wakawahomanaka l’anto ndo wakatanemaka anto efula. (Joani 4:7-26; 18:20; Etsha 17:17) Ɛlɔ kɛnɛ, Ɛmɛnyi wa Jehowa wekɔ lo nkamba la toho takɔ tâmɛ dia nsambisha anto tshɛ.

Koko, Yeso kɔmɛnya ɔnɛ onto tshɛ ayetawɔ losango lakɔ. (Mateu 10:14; 24:37-39) Onde dui sɔ pombaka nkɔmɔla Akristo dia vɔ nsambisha? Dia nkadimola lo dimbola sɔ, tɔshi ɛnyɛlɔ kɛnɛ: Naka wɛ ekɔ l’atei w’anto woshawɔ ɔkɛndɛ wa nyanga anto wakaki l’ɔkɔngɔ wa didimu dimɔtshi dia nkɛtɛ, onde wɛ ayotshika mbayanga lo mbuta ɔnɛ tamboshola paka anto yema tshitshɛ tsho woki, ka lanɛ amboshila? Ndoko, koko wɛ ayotetemala nyanga ele l’elongamelo k’ɔnɛ anto akina koka nyomotanema. Woho akɔ wâmɛ mbele, Yeso akakeketsha ambeki ande dia vɔ ntetemala nsambisha wele l’elongamelo ka nkondja anto amɔtshi wayetawɔ lokumu l’ɔlɔlɔ la Diolelo diaki Nzambi. (Mateu 10:23; 1 Timote 4:16) Lo nyanga anto asɔ l’ekimanyielo k’esambishelo ka luudu la luudu, Ɛmɛnyi wa Jehowa mɛnyaka dia vɔ mbokaka Nzambi ndo wanyawɔ anto wakoka ndjoshimbamɛ naka vɔ mbetawɔ losango la Diolelo ngandji.—Mateu 22:37-39; 2 Tesalonika 1:8.

Awui wele lo periodikɛ kadiɛyɛ kɛnɛ wekɔ etenyi kɛmɔtshi ka losango la lo Bible lɔsɔ. Ɔnkɔnɛ, dia wɛ mbeya awui akina, lam’alangɛ nsawola l’Ɔmɛnyi wa Jehowa wayohomana layɛ kana fundɛ afundji wa periodikɛ kɛnɛ.

[Nɔte ka l’ɛse ka dikatshi]