Emendji w’Eteta​—⁠ Ekambi Wakamba Kâmɛ lo Mɛtɛ

L’atei w’etshumanelo k’Akristo wa l’eleko ka ntondo, emendji w’eteta wakembolaka tshumanelo dia dikeketsha wakikɔ. Vɔ wakayakimɔka l’etondo awɔ, aha la nyanga okundji, dia kimanyiya ase tshumanelo dia vɔ tetemala la kɛndakɛnda lo yoho yasungana la ntondo ka Nzambi.​—⁠Etsha 11:​23, 24; 14:​21, 22; 15:⁠32;

20:​2, 31-35; Filipi 2:​20-22, 29; 1 Tesalonika 2:​5-12.

Ɛlɔ kɛnɛ, tshumanelo di’Ɛmɛnyi wa Jehowa diekɔ lo nongola, ndo vɔ lawɔ, ɛlɔlɔ ɛmɔtshi oma lo diembwelo di’emendji w’eteta. Anto asɔ wambohokɔ awui efula l’olimu w’esambishelo w’Ɛmɛnyi wa Jehowa ndo oko wewɔ emendji kanda y’ɛnɔnyi. Vɔ wakayatshungola oma l’olimu awɔ wa l’emunyi ndo oma l’ɛkɛndɛ awɔ wa l’atei a nkumbo, ɔsɔku mbakawakoke ndjasha l’olimu wa lo tena ndo lo tena. Le wanɛ wambotshukana, ndo wadiɛwɔ kambaka esangɔ tshɛ l’olimu wa lo tena ndo lo tena kâmɛ la waomɛwɔ.

Omendji w’otshimbedi ekɔ l’ɔkɛndɛ w’otshimbedi ɔtɔi, wele la tshumanelo l’asa 18 la 25. Nde membolaka etshumanelo tshɛ otsha lo yɛdikɔ ya mbala hiende l’ɔnɔnyi, ndo l’ɔkɔngɔ w’ɛnɔnyi ehende kana esato kete wambɔsɛkɔla otsha l’otshimbedi okina. Lo yoho shɔ mbakoka tshumanelo kondja wahɔ oma lo diewo la akoka waki emendji w’eteta wotshikitanyi.

Omendji w’otshimbedi tɔsɛdingolaka lɔsɛnɔ la lo nyuma l’etshumanelo ɔlɔlɔ ndo olimu atɔ. Nde atoshaka alako efula ndo atosanganaka kâmɛ la dikumanyi ndo l’ekambi w’olimu dia nde mɛna woho wakokawɔ nɔngɔsɔla olimu awɔ l’atei w’etshumanelo.

L’edja ka lomingu lakɔ, vɔ akɔ ahende, nde la wadiɛnde, naka nde ambotshuka, totshindɛka Ɛmɛnyi wa lo ngelo kakɔ l’olimu w’esambishelo, ndo mbakimanyiyaka dia vɔ ndowana l’olimu awɔ wa luudu la luudu. Nde la wadiɛnde têmbolaka ndo anto weke kâ ndjasha lo mɛtɛ dia mbakeketsha lo mbetawɔ. Vɔ kokaka kêmbola naka wɛ ambɔlɔmba dikambo diakɔ.

Omendji wa distrikɛ ekɔ l’akoka wa lo nyuma kana diewo diɔfɔnyi la nɛ diele la omendji w’otshimbedi. Nde atokindolaka oma l’otshombedi ɔnɛ otsha l’okina, dia tâwakimanyiyaka lo losanganya la woke lɔmɔtshi. Nde la wadiɛnde watokambaka olimu w’esambishelo kâmɛ l’Ɛmɛnyi wa l’etshumanelo k’otshimbedi wewɔ lo membola lomingu lakɔ. Nde atɔlɔmbɔlaka ɔlɔngɔswɛlɔ w’ekomelo w’ekongelo ka losanganya l’otshimbedi, lɔkɔ nde atoshaka alako efula, ndo dako dia lo sɛkɛ.

Etena katowoshidiyaka diembwelo diawɔ lo etshumanelo kɛmɔtshi kana l’otshimbedi ɔmɔtshi, emendji w’eteta watotshɔkaka otsha lo etshumanelo kana otsha l’otshimbedi wayela, lo ndjela ekongelo kakalɔngɔswama, polo ndo lam’ayembwama tshumanelo tshɛ kana etshimbedi ɛsɔ otsha lo yɛdikɔ ya ngɔndɔ shamalo; ko l’ɔkɔngɔ diko, vɔ ndjotatɛ okindwelo wakiwɔ.

Lo wedja efula emendji w’eteta mbetetaka lo mutuka kana lo mashinyi wɛmba anto lo wodja akɔ. Vɔ tɛngɔlaka ndo l’akalo kana l’ekolo lo wedja ekina. La Société mbafuta akuta wa lɔkɛndɔ l’emendji w’eteta ndo mbashaka, vɔ la wadiɛwɔ, yema y’ekimanyielo ka tshitshɛ lo ehomba awɔ w’onto l’onto. Esangɔ tshɛ, ase etshumanelo mbele l’ɔkɛndɛ wa mbahangia ndo mbalesha.

Pombaka ndjâla la lomba la ndjâlambola l’olimu ɔsɔ. Emendji w’eteta la wadiɛwɔ wakɔshi tɛdikɔ dia kambɛ tshumanelo olimu aha la mbaɛndja wotsho w’efula.​—⁠1 Tesalonika 2:⁠9.

• Oyango akɔna waki l’emendji w’eteta lo etshumanelo k’Akristo wa l’eleko ka ntondo na?

• Ɛlɔ kɛnɛ, woho akɔna walowanyema emendji w’eteta ndo wakokawɔ kotsha olimu awɔ na?

• Kɔndɔla olimu wasalema oma le emendji w’otshimbedi la wa distrikɛ la woho wasɛnawɔ.

[Osato wa lo lɛkɛ 20]

Omendji wa distrikɛ asha dako lo losanganya lɔmɔtshi l’otshimbedi

[Esato wa lo lɛkɛ 21]

Emendji w’otshimbedi mbetshaka l’esambishelo ka luudu la luudu, sawolaka la dikumanyi dia l’etshumanelo, membolaka ambeki wa Bible weke kâ ndjasha lo mɛtɛ ndo mbishaka alako l’etshumanelo