Woho Wakamba Emendji Wêteta Oko Alami Wa Kɔlamelo
“Lo yɛdikɔ yakalongola onto l’onto losha lɔmɔtshi, nyokambe lalɔ lam’akambanɛnyu onto la onyande oko alami wa dimɛna efula wa ɔlɔlɔ w’ɔtɛkɔya wa Nzambi wɛnama lo weho la weho.”—1 PETERO 4:10, NW.
JEHOWA mbɔsaka Akristo tshɛ wa kɔlamelo oko alami. Esangɔ efula, olami toyalaka okambi wele l’ɔkɛndɛ wa nama luudu l’otondo. Nde mbeyaka nto monga kapita ka diangɔ dia nkumɛnde. (Luka 16:1-3; Ngalatiya 4:1, 2) Yeso akelɛ olui w’akitami ande wa kɔlamelo wa lanɛ la nkɛtɛ ate: “Olami wa kɔlamelo.” Nde akasha olami ɔsɔ ‘diangɔ diande tshɛ,’ l’atei a diangɔ diakɔ mbele ndo elimu w’esambishelo ka Diolelo.—Luka 12:42-44, NW; Mateu 24:14, 45.
2 Ɔpɔstɔlɔ Petero akate ɔnɛ Akristo tshɛ wekɔ alami wa ɔlɔlɔ w’ɔtɛkɔya wa Nzambi wɛnama lo weho la weho. Okristo tshɛ ekɔ la dihole diasungana la nde, lo dihole diakɔ mbakokande kotsha olimu w’olami la kɔlamelo tshɛ. (1 Petero 4:10) Akristo wakasɔnama oko dikumanyi wekɔ alami, l’atei awɔ mbele ndo emendji wêteta. (Tito 1:7) Ngande wahombaso mbɔsaka dikumanyi sɔ diele emendji wêteta na? Naa waonga la eyango wahombawɔ monga lawɔ na? Ndo ngande wakokawɔ kimanyiya etshumanelo lo yɛdikɔ yoleki ɔlɔlɔ na?
Tândolake Olimu Wasalawɔ
3 Lam’akawafundɛka omendji ɔmɔtshi wêteta nde la wadiɛnde mukanda, atshukanyi amɔtshi w’Akristo wakate vate: “Sho nangaka mɛnya lowando lele laso lo menda wenya tshɛ wakanyatosha la ngandji kakanyatoke. Nkumbo kaso k’otondo kakakimanyiyama efula oma l’ekeketshelo la alako w’oma le nyu. Sho mbeyaka ɔnɛ sho pombaka tetemala pama lo nyuma, koko l’ekimanyielo ka Jehowa la k’anangɛso l’akadiyɛso wele oko nyu, sho bu la pâ efula kânga mbele olimu a leeka kundju kandji.” Ɛtɛkɛta wa ngasɔ mbokɛmaka efula nɛ dia emendji wêteta ndjashaka le onto tshɛ lele onyawɔ ombetawudi, oko watokotshaka olami w’ɔlɔlɔ ehomba w’ase luudu. Amɔtshi wekɔ tomanamana lo mbisha alako wa lo sɛkɛ. Efula ka l’atei awɔ wɛ hawadje anya l’olimu w’esambishelo, ndo akina mbeyamaka dimɛna lo woho wewɔ l’ohetoheto ndo l’etema wa kɛtshi. Naka emendji wêteta ndjâtshutshuya dia monga la weshasha ɛsɔ ndo kamba lawɔ lam’akambɛwɔ anyawɔ, kete wayokoka mbelamɛ l’ɔlɔlɔ tshɛ ɔnɛ “alami wa dimɛna efula.”
4 Ɔpɔstɔlɔ Paulo akafunde ate: “Kɛnɛ kayangawɔ le alami ele di’onto monga la kɔlamelo.” (1 Kɔrɛtɔ 4:2, NW) Nkambɛ anyayɛ Akristo l’etshumanelo kekina lomingu la lomingu ekɔ diɛsɛ dia lânde ndo di’ɔngɛnɔngɛnɔ. Koko ɔsɔ ekɔ nto ɔkɛndɛ a wotsho. Ko lâsɔ, ngande wakoka emendji wêteta kotsha olimu awɔ w’alami dimɛna dimɛna ndo la kɔlamelo tshɛ na?
Woho Wakokawɔ Kotsha Olimu Awɔ w’Alami Dimɛna
5 Ekɔ ohomba di’emendji wêteta ndjaɛkɛka le Jehowa lo dɔmbɛlɔ naka vɔ nangaka monga alami w’eshika. Lo menda prɔgramɛ yawɔ la ɛkɛndɛ efula wele lawɔ, tena dimɔtshi vɔ kokaka ndjôka oko wotsho ambâheka. (Ɛdika la 2 Koreto 5:4.) Ɔnkɔnɛ, vɔ pombaka ndjaɔtɔnganyiya la lembo lɔnɛ lakembe omembi w’esambu ate: “Ukitsha wutshu aye le [Jehowa], ku ndi ayukembelawo. Ndi hetawo untu ololo [tshingatshinga, NW].” (Osambu 55:22) Ndo ɛtɛkɛta ɛnɛ waki Davidi nto mbishaka onto esambelo: “[Jehowa] latutembelaka wetshu asu, atumbwami!”—Osambu 68:19.
6 Oma lende akakondjaka Paulo wolo wa nde kotsha ɛkɛndɛ ande wa lo nyuma na? Nde akafunde ate: “Lo akambo tshɛ, dimi lekɔ la wolo oma le ɔnɛ lambisha nkudu.” (Filipi 4:13, NW) Eelo, Jehowa Nzambi mbaki Kiɔkɔ ya wolo waki la Paulo. Lo yoho yakɔ yâmɛ mbakatosha Petero dako nɛ ate: “Naka ɔmɔtshi ekɔ lo kambɛ anto akina olimu, nde akambe olimu oko onto lêndɛ lo wolo watoyakaka oma le Nzambi; kele lo akambo tshɛ, Nzambi atombwame lo tshimbo ya Yeso Kristo.” (1 Petero 4:11, NW) Ɔnangɛso ɔmɔtshi laki omendji wêteta ɛnɔnyi efula akake epole ɔsɛkɛ dia mɛnya ohomba wa mbɛkɛka otema le Nzambi, nde akate ate: “Endɛka le Jehowa nshi tshɛ lam’ayangayɛ dia kandola ekakatanu ndo yangaka ekimanyielo k’ɔlɔngɔswamelo ande.”
7 Ekɔ ohomba di’omendji wêteta w’oshika salaka akambo lo yoho yakoka. Oko Akristo akina, nde salaka tshɛ dia ‘sɛdingola akambo woleki ohomba.’ (Filipi 1:10)a Naka dikumanyi dia l’etshumanelo diekɔ la wembola lo dikambo dimɔtshi, kete ekɔ ɔlɔlɔ vɔ mumbola omendji w’otshimbedi woye dia ndjênda etshumanelo kawɔ dia nde mbasha kanyi yande. (Tukedi 11:14; 15:22) Ondo woho wasɛdingolande akambo lo yoho yakoka ndo alako washande wotumbi oma l’Afundelo wayoyokimanyiya dikumanyi diakɔ lam’ayowoyotetemala nyanga dia shidiya dikambo diakɔ l’ɔkɔngɔ wa nde tshika etshumanelo kakɔ. Lo kanyi yakɔ yâmɛ mbakatɛ Paulo Timɔtɛ ate: “Akambu wakayuki le mi l’atei [w’]emenyi efula, uwakimo le akanga a kolamelu, weya lama mbetsha ndu akina.”—2 Timote 2:2.
8 Ekɔ ohomba mbekaka Afundelo, nyangiayangiaka ndo kanaka lawɔ yimba dia wɛ mbeya mbisha alako w’eshika. (Tukedi 15:28) Omendji ɔmɔtshi wa distrikɛ akate ate: “Lam’asanganaso la dikumanyi, hatohombe mboka wɔma dia mbetawɔ ɔnɛ hateye woho wakokaso kadimola dimbola dimɔtshi.” Naka wɛ ndjâtshutshuya dia monga la ‘lokanyi la Kristo’ lo dikambo dimɔtshi, kete wɛ ayokoka mbishaka anto alako w’oma lo Bible, alako wayowakimanyiya dia vɔ ndjaɔtɔnganyiya la lolango la Nzambi. (1 Koreto 2:16) Tena dimɔtshi, omendji wêteta pombaka fundɛ la Société Watch Tower mukanda dia nde mbɛ̂nya mboka kahombande mbidjɛ. Lo dikambo tshɛ, mbetawɔ le Jehowa la ngandji k’akambo wa mɛtɛ ekɔ ohomba efula ndeka ndo woho wɛnamaso le anto akina kana lolemi laso la diɛsa. L’ɔtɛ wa nde ndja la ‘ɛtɛkɛta wambotamanya kana mɛnya ewo kande,’ Paulo akamɛ olimu ande la Kɔrɛtɔ ‘lo wɔdu, ndo lo wɔma, ndo la lokomba efula.’ Onde nde kosala olimu akɔ dimɛna? Kema, dui sɔ diakakimanyiya Ase Kɔrɛtɔ dia vɔ monga la mbetawɔ, ‘aha lo lomba l’onto, koko lo nkudu ka Nzambi.’—1 Koreto 2:1-5.
Waonga Akina w’Ohomba Efula
9 Dionga dia ndjadjaka lo dihole dia onyayɛ onto kimanyiyaka emendji wêteta dia vɔ kondja etombelo w’ɔlɔlɔ. Petero akakɔkɔmiya Akristo tshɛ dia vɔ ‘mbokanaka kɛtshi,’ mbuta ate di’onto l’onto ‘ndjadjaka lo dihole dia onyande.’ (1 Petero 3:8) Omendji w’otshimbedi mɛnaka dia nde pombaka ‘ndjasha le onto tshɛ la l’atei w’etshumanelo ndo mbokanɛka l’otema ɔtɔi.’ Lo kanyi yakɔ yâmɛ mbakafunde Paulo ate: “Nyongenengene la wane wangenangena; nyuleli la wane walela.” (Romo 12:15) Dionga dia ngasɔ tshutshuyaka emendji wêteta dia vɔ ndjasha l’otema ɔtɔi dia mboka ekakatanu la akambo wakomɛ anyawɔ ambetawudi. Lâsɔ mbakokawɔ mbisha onto alako w’ekeketshelo w’oma l’Afundelo, alako wakoka kimanyiya onto akɔ naka nde mbayela. Omendji ɔmɔtshi w’otshimbedi weya ndjadja lo dihole dia onyande onto akalongola mukanda ɔnɛ oma le etshumanelo kosukanyi la Turin, lo wodja w’Italie: “Naka wɛ nangaka anto ndjasha le yɛ, kete yashaka le anto akina; naka wɛ nangaka monga onto langɛnyangɛnya anto akina, kete onga la waonga wahombama dia mbangɛnyangɛnya; naka wɛ nangaka anto kolanga, kete onga la waonga w’onto lakoka nangema; naka wɛ nangaka anto kokimanyiya, kete etawɔka kimanyiyana. Wetshelo ɔsɔ mbakatakondja oma le yɛ!”
10 Ndjâkitshakitsha ndo mbokanaka l’onto tshɛ ekɔ waonga wakimanyiya emendji wêteta dia vɔ sala ɔlɔlɔ efula. Omendji ɔmɔtshi w’otshimbedi akate ate: “Monga l’okitshakitsha ekɔ dui dioleki tshɛ ohomba.” Nde akewola emendji wêteta wêke eyoyo ate: “Aha wɛ mbetawɔ sɛngiyama lo yɛdikɔ yahakoke oma le anangɛso wele l’ɔngɔnyi efula l’ɔtɛ wa kɛnɛ kakokawɔ kosalɛ, ndo aha mbokanaka paka l’anto wa ngasɔ ato, koko yâtshutshuyaka nshi tshɛ di’aha monga la shɔnɔdi le anto.” (2 Ekondo 19:6, 7) Ndo nto, omendji wêteta wele mɛtɛ l’okitshakitsha hatoyaɔsa la nɛmɔ diambotamanya lo woho wênde ɔkɛndji waki la Société. Omendji ɔmɔtshi wa distrikɛ akate l’ɔlɔlɔ tshɛ ate: “Yâkitshakitsha ndo etawɔ mbishaka ananyɔ lotoi. Okanaka l’anto nshi tshɛ.” Oko wakinde onto loleki woke lo tena tshɛ, Yeso Kristo akakoke sala di’aha anto ngɛnangɛnaka monga lâlende, koko nde aki l’okitshakitsha w’efula ndo akokanaka l’oseka onto tshɛ ko kânga ana w’akɛnda wakangɛnangɛnaka monga lâlende. (Mateu 18:5; Mako 10:13-16) Emendji wêteta nangaka ana w’akɛnda, ɛlɔngɔlɔngɔ, epalanga kana esombe—vɔ mɛtɛ nangaka oseka onto tshɛ lele l’etshumanelo—mbotɛ dui aha la mengenga.
11 Lo mɛtɛ, ‘sho tshɛ totakanaka mbala efula,’ ndo ndoko omendji wêteta wahasalaka munga. (Jakoba 3:2) Naka omendji wêteta ambosala munga kɛmɔtshi, yoho yalɔmbande edimanyielo l’otema ɔtɔi mbishaka dikumanyi dikina ɛnyɛlɔ ka ndjâkitshakitsha. Lo ndjela Tukedi 22:4, “difutu dia ndjakitshakitsha la woma wa [Jehowa] [woludi la dilɛmiɛlɔ] dieli: ekundji, nemo la lumu.” Kema ekambi tshɛ wa Nzambi pombaka ‘ndjâkitshakitsha lam’akɛndakɛndawɔ la Nzambi kawɔ’? (Mika 6:8) Lam’akawawombola ɔnɛ dako diakɔna diakokayɛ mbisha omendji wêteta w’oyoyo, omendji ɔmɔtshi w’otshimbedi akate ate: “Ɔsaka anangɛso tshɛ la nɛmɔ efula ndo lɛmiyakawɔ efula; ɔsakawɔ oko vɔ koleka. Wɛ ayeka akambo efula oma le anangɛso. Yâkitshakitsha. Onga kam’eyɛ. Toyalake kanga lotamanya.”—Filipi 2:3.
12 Ohetoheto l’olimu w’Okristo mbetɛka ɛtɛkɛta w’omendji wêteta wotsho. Mɛtɛ, naka nde la wadiɛnde mbisha ɛnyɛlɔ k’anto wele l’ohetoheto l’olimu w’esambishelo ka lokumu l’ɔlɔlɔ, kete ndo dikumanyi, ndo wadiɛwɔ, ndo anto akina tshɛ wa l’etshumanelo wayokeketshama dia monga l’ohetoheto l’olimu awɔ w’esambishelo. Dako di’oma le omendji ɔmɔtshi w’otshimbedi diɔ nɛ: “Onga l’ohetoheto l’olimu.” Nde akate nto ate: “Lakɛnyi lo tshɛ nte: naka etshumanelo kekɔ l’ohetoheto efula, kete tɔ hatonga l’ekakatanu efula.” Omendji okina w’otshimbedi akate ate: “Dimi fɔnyaka nte: naka dikumanyi ntshɔ̂ka dia tosambisha vɔ l’anangɛso l’akadiyɛso ndo mbakimanyiyaka dia vɔ ngɛnangɛna olimu w’esambishelo, kete vɔ wayokondja wɔladi wa lo yimba la ɔngɛnɔngɛnɔ w’efula lo kambɛ Jehowa.” Ɔpɔstɔlɔ Paulo ‘akayala la dihonga dia sambisha lokumu l’ɔlɔlɔ la Nzambi le Ase Tɛsalɔnika l’atei w’ekakatanu a wolo efula.’ Diɔ diakɔ mɛtɛ diakawawôhɔka la lolango, wakohɔka oyelo ande l’atei awɔ, olimu ande w’esambishelo ndo wakakombolaka mbɛ̂na nto!—1 Tesalonika 2:1, 2; 3:6.
13 Wonya wasambishande nde l’anyande Akristo, omendji wêteta mendaka awui awɔ la wɛɔdu awɔ. Kânga mbakoka tokanyi tawashande mbakimanyiya efula, nde mbeyaka ɔnɛ amɔtshi ondo hawotoyaokaka dimɛna lam’asambishawɔ la ekumanyi kɛmɔtshi kambohokɔ akambo efula. Lâsɔ lo tena dimɔtshi, ayoleka ɔlɔlɔ keketsha onto lo dihole dia mbosha alako. Lam’atshindɛnde apandjudi kana ambatshi mboka otsha le ambeki wa Bible, vɔ mbeyaka mbotshikɛ dihole dia nde nɔmbɔla wekelo. Ondo dui sɔ diayowaɛnya weho ɛmɔtshi wakokawɔ ndowanya yoho yawɔ y’olakanyelo.
14 Emendji wêteta wele l’ohetoheto mbishaka anto akina ohetoheto. Omendji ɔmɔtshi w’otshimbedi wa l’Uganda akakɛndakɛnda l’atei wa ngamba oshidi a tango w’otondo dia tshindɛ ɔnangɛso ɔmɔtshi otsha le ambeki amɔtshi wa Bible waki kopamaka dimɛna. Lam’akawatatshɔkaka, mvula ka mamba kakalɔ ko vɔ wakalɔwɛ lɔwi. Lam’akoke nkumbo kɛsɔ k’anto asamalo ɔnɛ ɔngɛndangɛnda awɔ ekɔ omendji wêteta, vɔ wakâmbe hakoke. Vɔ wakeyaka ɔnɛ wa pasitɛlɛ kana asasɛrdɔsɛ wa l’ɔtɛmwɛlɔ awɔ hawokoke ndjâkiyanya woho ɔnɛ lo dikambo dia lemba l’ɛkɔkɔ kânga lushi ɔtɔi. Lushi la Lomingu lakayoyelaka, vɔ wakɔtɔ lo losanganya mbala kawɔ ka ntondo ko wakɛnya saki kawɔ ka monga Ɛmɛnyi wa Jehowa.
15 L’osomba wa Oaxaca, lo wodja wa Mexique, omendji ɔmɔtshi w’otshimbedi akayâtshutshuya dia sala dui dimɔtshi diakiwɔ kombɔlɔmba mɛtɛ dia nde sala. Nde akayâlɔngɔsɔla dia tshikala etsho ɛnɛi lo luudu la lokanu dia nde tênda olui ɔmɔtshi w’ase lokanu esambele wakayala apandjudi wa Diolelo. L’edja ka nshi efula, nde akatshindɛka ase lokanu asɔ lam’akawatasambishaka lo shambrɛ la shambrɛ ko tekaka ndo l’ambeki wa Bible. Lo menda saki kaki lawɔ, wakatetemala mbeka l’ambeki amɔtshi dimɛna polo ndo l’otsho. Omendji ɔsɔ w’otshimbedi wele l’ohetoheto akafunde ate: “L’ekomelo ka nshi yakimi lo luudu lakɔ la lokanu, ndo dimi, ndo ase lokanu, takoke ɔlɔ wa mamba lo menda woho wakatakeketshana onto la onyande.”
16 Emendji wêteta nyangaka dia keketsha anto. Lam’akatshu Paulo dia tênda tshumanelo dia la Makɛdɔniya, nde ‘akadikeketsha l’ɛtɛkɛta efula.’ (Etsha 20:1, 2) Ɛtɛkɛta w’ekeketshelo kokaka monga ohomba efula dia keketsha akɛnda la epalanga dia vɔ ndjadjɛ eyango wa lo nyuma. Lo filialɛ kɛmɔtshi ka woke kaki la Société Watch Tower, wekelo ɔmɔtshi wakawasale lo ngango akɛnya dia emendji w’etshimbedi wakakeketsha suke la % 20 ya wanɛ wakayakimɔ la lolango lawɔ dia vɔ mbɔsa olimu wa lo tena tshɛ. Oma l’ɛnyɛlɔ kande k’ɔlɔlɔ k’osambisha wa Diolelo wa lo tena tshɛ, wadi aki omendji wêteta mongaka ndo nde lawɔ kiɔkɔ ya woke y’ekeketshelo.
17 Esombe la wanɛ wambɔkɔmɔ lo tokanyi wekɔ l’ohomba efula w’ekeketshelo. Omendji ɔmɔtshi w’otshimbedi waya osombe akafunde ate: “Dui dia l’olimu ami diambisha ɔngɛnɔngɛnɔ wa l’etei k’otema, ɔngɛnɔngɛnɔ waheyama ndo mbuta, ele diɛsɛ dia kimanyiyaka wanɛ wambɔla yɔɔ ndo waya kema la wolo l’atei a lemba l’ɛkɔkɔ wa Nzambi. Ɛtɛkɛta wa lo Romo 1:11, 12 wekɔ la kitshimudi ya lânde le mi, nɛ dia dimi kondjaka ekeketshelo k’efula la wolo wa mamba l’etena ‘kashami anto wa ngasɔ weshasha ɛmɔtshi wa lo nyuma dia vɔ keketala.’ ”
Afuto wa l’Olimu Wasalawɔ l’Ɔngɛnɔngɛnɔ
18 Emendji wêteta ndjashaka l’otema ɔtɔi lo dikambo di’anyawɔ ambetawudi. Vɔ nangaka keketshaka tshumanelo ndo dietɛ nge lo nyuma. (Etsha 15:41) Omendji ɔmɔtshi wêteta kambaka lotumu la wolo “dia keketsha anango, dia mbasha wolo, ndo dia mbasha saki ka kotsha olimu w’Okristo ndo tetemala ndjela awui wa lo Bible.” (3 Joani 3) Okina nyangaka dia shikikadia anyande ambetawudi lo mbetawɔ. (Kolosai 2:6, 7) Sho pombaka mbohɔ ɔnɛ omendji wêteta ekɔ ‘onyaso la lo lotumu,’ koko nde bu owandji lâdiko dia mbetawɔ k’anto akina. (Filipi 4:3; 2 Koreto 1:24) Oyelo ande dia ndjênda etshumanelo ekɔ etena k’ekeketshelo, k’olimu wambâhema nto, la diaaso di’olui wa dikumanyi menda woho wambohama etshumanelo ndo sɛdingola eyango w’otsha la ntondo. Oma l’ɛtɛkɛta ande la ɛnyɛlɔ kande, apandjudi wa l’etshumanelo, ambatshi mboka, ekambi w’olimu ndo dikumanyi kokaka nongamɛ dia keketshama ndo sokoyama dia sala olimu wele la ntondo. (Ɛdika la 1 Tesalonika 5:11.) Lâsɔ nyɛsɔ tosukɛke diembwelo di’omendji w’otshimbedi l’otema ɔtɔi ndo tosalake woho wa kimanyiyama efula oma l’olimu wasala omendji wa distrikɛ.
19 Emendji wêteta la wadiɛwɔ kondjaka difuto dia woke l’olimu wasalawɔ la kɔlamelo, ndo vɔ kokaka monga l’eshikikelo ɔnɛ Jehowa ayowatshɔkɔla lo menda ɔlɔlɔ wasalawɔ. (Tukedi 19:17; Efeso 6:8) Georg nde la Magdalena wekɔ wadi l’omi ndo waya esombe, vɔ wakakambe ɛnɔnyi efula l’olimu w’omendji wêteta. Lo losanganya la woke lakasalema la Luxembourg, onto ɔmɔtshi akaye le Magdalena dia ndjɔtɛkɛta la nde, onto akɔ aki ɔnɛ lakandasambisha ambeta ɛnɔnyi ndekana 20. Saki kaki la omoto ɔsɔ l’Ose Juda ka mbeka akambo wa mɛtɛ kakalokɔlokɔ oma l’ekanda watɛkɛta awui wa Bible wakawosha Magdalena ko l’edjedja ka wonya, nde akayobatizama. Kadiyɛso kɛmɔtshi ka lo nyuma akaye le Georg dia ndjɔtɛkɛta la nde, nde akohɔ etena kakandaye lakande ambeta oko ɛnɔnyi 40 w’etondo. Woho wakandasambishaka lokumu l’ɔlɔlɔ l’ohetoheto tshɛ akayotshutshuyaka omoto ɔsɔ nde l’omɛnde dia vɔ mbetawɔ mɛtɛ. Nyamɛ mbokaka lâsɔ mɛtɛ dia Georg la Magdalena waki l’ɔngɛnɔngɛnɔ wa mamba.
20 Olimu wakayala l’etombelo w’ɛlɔlɔ wakasale Paulo l’Ɛfɛsɔ akawosha ɔngɛnɔngɛnɔ ndo ondo akôtshutshuya dia nde mbuta ɛtɛkɛta ɛnɛ wakate Yeso ate: “Ɔngɛnɔngɛnɔ wa mbisha, ndeka wa nongola.” (Antomami 20:35, Dyookaneelo dy’oyooyo) Lam’ele ɔnɛ lakamba olimu w’omendji wêteta pombaka mbishaka tena tshɛ, wanɛ wakamba olimu akɔ kondjaka ɔngɛnɔngɛnɔ, djekoleko lam’ɛnawɔ etombelo w’ɛlɔlɔ w’oma lo lotumu lawɔ. Omendji ɔmɔtshi w’otshimbedi akakimanyiya ekumanyi kɛmɔtshi kakakɔmɔ otema, ko ekumanyi kakɔ akawotɛ ɔnkɔnɛ lo mukanda wakandôfundɛ ate: “Wɛ ‘akakimanyiya ndo akakeketsha’ efula lo lɔsɛnɔ lami la lo nyuma—lo yɛdikɔ yahayeye ndo mbeya. . . . Ndoko lushi lokoyoshihodia ekimanyielo k’efula kakayasha Asafu wa nshi nyɛ, kanga ‘ekolo waki suke la mbɛtɔla oma lo mboka.’ ”—Kolosai 4:11; Osambu 73:2.
21 Okristo ɔmɔtshi waya osombe wakakambe olimu w’omendji w’otshimbedi ɛnɔnyi efula nangaka kana yimba lo kɛnɛ kofundami lo 1 Koreto 15:58, lɛnɛ akatɔkɔkɔmiya Paulo ate: “Nyutetemali, nyushikikali, nyutamanya ntsha ulimu wa Khumadiondjo nshi tshe, ne dia nyu mbeyaka nyati: Pa kanyu le Khumadiondjo kema anyanya.” Emendji wêteta wekɔ mɛtɛ l’akambo efula wa sala l’olimu wa Nkumadiɔndjɔ. Ndo sho mɛtɛ ngɛnangɛnaka lo menda woho wakambawɔ l’ɔngɛnɔngɛnɔ efula oko alami wa kɔlamelo wa ɔlɔlɔ w’ɔtɛkɔya wa Jehowa!
[Footnote]
a Enda sawo diele l’ɔtɛ a dui ɔnɛ: “Onde Wɛ Kokaka Ngɛnangɛna Lam’eyɛ l’Awui Efula wa Sala?” lo Tshoto y’Etangelo ya Yitshu 15, 1991, lɛkɛ 28-31 (lo Falase).
[Study Questions]
1, 2. (a) Oko le yɛ, “olami” kɛdikɛdi na? (b) Wa na wele ndo vɔ lawɔ l’atei w’alami wakamba la Nzambi?
3. Bonde kakoka emendji wêteta mbelamɛ ɔnɛ “alami wa dimɛna efula”?
4. Wembola akɔna wayangaso sɛdingola kakianɛ?
5, 6. Lande na kele ndjaɛkɛka le Jehowa lo dɔmbɛlɔ ekɔ ohomba efula lo lɔsɛnɔ l’omendji wêteta?
7. Woho akɔna wele salaka akambo lo yoho yakoka ekɔ ohomba l’olimu w’omendji wêteta?
8. Bonde kele ekɔ ohomba mbekaka Bible, nyangiayangiaka ndo kanaka latɔ yimba?
9. Lande na kahomba dikumanyi diele emendji wêteta ndjadjaka lo dihole di’anyawɔ?
10. Kakɔna kakate emendji w’etshimbedi la wa distrikɛ lo dikambo dia ndjâkitshakitsha, ndo ɛnyɛlɔ kakɔna kakatotshikɛ Yeso lo dikambo sɔ?
11. Nɔmba edimanyielo, l’etena kahombama, kokaka monga l’etombelo akɔna?
12. Lande na kele ohetoheto l’olimu w’Okristo ekɔ ohomba efula?
13. Omendji wêteta mendaka dikambo diakɔna wonya wasambishande kâmɛ l’anyande Akristo?
14. Lande na kakokaso mbuta ɔnɛ emendji wêteta wele l’ohetoheto mbishaka anto akina ohetoheto?
15. Naa dikambo dia dimɛna efula diakɛnyi omendji ɔmɔtshi w’otshimbedi wele l’ohetoheto wakamba lo Mexique?
16. Lande na kele ekɔ ohomba efula di’emendji wêteta la wadiɛwɔ mbishaka anyawɔ ekeketshelo?
17. Omendji ɔmɔtshi w’otshimbedi waya osombe ngande wɔsande diɛsɛ diande dia kimanyiyaka akina?
18. Naa eyango wa l’Afundelo wele l’emendji wêteta?
19, 20. Ngande walongola emendji wêteta la wadiɛwɔ difuto l’ɔtɛ w’olimu wakambawɔ la kɔlamelo?
21. Bonde kakokayɛ mbuta ɔnɛ divɛsa dia 1 Koreto 15:58 kotshamaka l’elimu wasala emendji wêteta?
[Caption]
[Notɛ ka l’ɛsɛ ka dikatshi]
[Caption]
[Wembola]
[Caption on page 15]
[Diombwɛlo di’osato wa lo lɛkɛ 15]
Emendji wêteta nyangaka dia keketsha anyawɔ ambetawudi
[Caption on page 16]
[Diombwɛlo di’osato wa lo lɛkɛ 16]
Ndo akɛnda ndo epalanga kokaka kimanyiyama lo monga lâle emendji wêteta la wadiɛwɔ
[Caption on page 17]
[Diombwɛlo di’osato wa lo lɛkɛ 17]
Olimu wasala omendji wêteta l’ohetoheto mbishaka akina ohetoheto
[Caption on page 19]
Wate Na Ayoyokadimola?
◻ Lande na kakoka emendji wêteta mbɔsama oko “alami wa dimɛna efula”?
◻ Naa awui amɔtshi wakimanyiya emendji w’etshimbedi la wa distrikɛ dia vɔ kondja etombelo w’ɛlɔlɔ efula?
◻ Lande na kele okitshakitsha la ohetoheto ekɔ ohomba efula le wanɛ wakamba olimu w’omendji wêteta?
◻ Naa eyango w’ɛlɔlɔ wele l’emendji wêteta?