Loseno La Woladi Lo Andja W’oyoyo
Ohotokenda tokenyo tongo tosangemi lo kiandakianda nye. Akokiyato l’asolo aye na? Onde otema aye hakombola woladi, ongenongeno ndo lolombe l’enyato? Solomete. Koko onde do mbedio dia mbetawo one weho wa akambo ango wayosalema lushi lomotshi la kete?
Ondo ngaso mbakanyiya anto efula. Awui weta nshi nye ele ata, odiakanelo, ndjala, hemo, otshundelo—oko okukiso la shila paka amotshi wa lateyi awo. Koko, kokaka sho nongame. Êwoya kene kayoya, Bible lo mbuta ate “lo ndjela daka diande [diaki Nzambi], sho l’elongamelo ka olongo w’oyoyo la kete y’oyoyo lene ahombama losembwe ndjâla.”—2 Petero 3:13; Isaya 65:17.
“Olongo w’oyoyo” la “kete y’oyoyo” sho, oko wata Bible, kema olongo w’oyoyo la kete y’oyoyo nye y’enama. Olongo la kete y’enama yakatongama kokele, ndo oko wenya Bible yayoshikikala pondjo. (Esambu 89:36, 37; 104:5) “Kete y’oyoyo” ayonga tshunda dia anto w’ololo wane wayosena la kete, ndo “olongo w’oyoyo” ayonga mete diolelo dia l’olongo diolowanyi ndo diololo, lowandji lone layaheme tshunda dia anto wa la kete. Onde mete sho kokaka mbetawo dia “kete y’oyoyo,” mbuta ate andja w’oyoyo w’ongenongeno, w’ayonga?
Toheke dikambo ne dia oyango wa dimena oso waki lo didjango dietatelo diaki Nzambi diendana la kete. Nde akakitsha anto ahende wa tondo lo Edena, paradiso ka la kete, ndo akawasha olimu w’ololo efula. Nde akawatela: “Nyoyale la diwutshi, nyofulane, nyolodia kete, ndo nyoyôlele.” (Etatelo 1:28) Eelo, didjango diaki Nzambi diaki paka dia pami la womoto wonge l’ana ndo wete kete y’otondo Paradiso. Kanga mbakawayenaka dimena l’okongo dia pindole Nzambi, waka shikike dia takawakoke kondja loseno la pondjo, didjango dia tondo diaki Nzambi kokadimo. Ndo dio diayokotshama lo andja w’oyoyo.—Isaya 55:11.
Dikambo dikina, etena kingo kalombaye disambe dia kumeso, kana dia Sheso, ko we lo nomba dia Diolelo diaki Nzambi daye, we lo nomba dia Lowandji lande la l’olongo lanya kolo la kete ndo l’ôle lo andja w’oyoyo. (Mateu 6:9) Sho kokaka suya dia Nzambi ayetawo dombelo so, ne dia Dui diande lo ndaka ate: “Anto w’ololo mbayokanga kete, ndo loko mbayowodjase pondjo.”—Osambu 37:29.
Loseno lo andja w’oyoyo waki Nzambi
Diolelo diaki Nzambi ayoyala kioko y’engenongeno wa mamba lo kene kendana la kete; diayolodja andja wotondo l’engenongeno wakawombeka Nzambi mal’etatelo. Lohetsho la tokanyi ta kolo amboshila! Onto tshe ayonga ongenyi w’osukanyi ande. Lo Bible, Nzambi lo ndaka dia nde ‘ayokumiya ata polô ndo lo tokoma ta kete.’ “Ndoko wodja wayembe wodja okina toombo ta ta dia mbolosha, hawoteka awui wa ta too.”—Esambu 46:9; Isaya 2:4.
Komelo ko kete yayoyala ekambo kambokadimo paradiso. Onkone mbata Bible: “Osoe wa shenga la kete ya wumu yayongenangena, kete y’ofumbo yayangasana ndo yayotɔ alembolembo oko osongo wa safrana. . . . Ne dia lo kete ya shenga ekedi w’ashi wayokundo, ndo akeledu wa weke l’osoe wa shenga. Kete y’okango yayokoma oko oduwa wuludi la lolenge, ndo kete y’ave yayokadimo oko teko diashi.”—Isaya 35:1, 6, 7, MN.
Ndjala honga too pondjo. Bible mbutaka ate: “Kete yayongonya diango diayo.” (Esambu 67:6; 72:16) Onto tshe ayongenangena lo kene kayondokondja malo olimu ande, mbatolaka Otungi aso: “Mete vo wayone dikambo dielowa ndo wayole elowa omaloko. . . . Hawotone dikambo dia akina nde.”—Isaya 65:21, 22.
Lo andja w’oyoyo waki Nzambi, ndoko awui wamvudu ya weke yahana anto lahana l’etitadi, ndoko esomba wa weke wa hinana anto lohinana, ne dia Nzambi akashikike dia: “Metemete vo wayoka mvudu ndo wayodjase loko . . . Hawoka dia onto ukina ndjodjase loko.” Bible ndakaka too dia: “hawotena paa too wenena.” (Isaya 65:21-23) Omaloko, anto tshe wayonga l’olimu wa dimena w’ongenongeno. Loseno halotonga etitadi too.
L’etena kadio, Diolelo diaki Nzambi diayokaloya etonoelo ka woladi kâki l’asa nyama la nyama, ndo l’asa anto la nyama l’ekambo ka Edena. Bible lo mbuta: “Lawondu ayodjase nshi motshi la on’okoko, ndo nkoyi ayetama kame la ona mbudi, osongo wa ngombe, osongo wa tamboe, ndo nyama ka wata; ko kiendakenda ayoyilombola.”—Isaya 11:6-9; Hosea 2:18.
Oho kanyiya yema. Lo Paradiso ka la kete wa hemo tshe ndo dikomo dia lo demba, dio lawo too, diayokono! Dui dia Nzambi toshikikeka dia: “Ndoko ombidjashi layota ate: ‘Leko la hemo.’ ” (Isaya 33:24) “[Nzambi] ayokitola asoyi tshe lo washo awo, ndo nyoyi honga too; koyanga otanda, koyanga ndjawi, koyanga kandji hayotoyala too. Akambo wa tondo wamboshila.”—Enyelo 21:4.
Engenongeno engo kendaka
Otema aye dikitaka mete wonya wokaye alaka waki Nzambi wendana la loseno la lo andja w’oyoyo wa losemboe. Kanga mbele anto amotshi kanyiyaka dia awui aso amboleka amena ko hawotonga mete, engenongeno wa amena wa ngaso kokaka ndja omale Otungi aso wa ngandji.—Osambu 145:16; Mika 4:4.
Mbuta ate dia sena pondjo lo Paradiso k’oyoyo ka la kete, akambo wa lombama weko. Yeso akenya otoyi woliki woke wa latiyi w’akambo ako lo disambe diande tshale Nzambi. Nde akate ate: “One ele loseno la pondjo: weeke dia nkêya, wememe, Nzambi otoyi ka mete, ndo one lakayatumi, Yeso Kristo.”—Joani 17:3, MN.
Dio diako diele, endaka sho nangaka mete sena lo andja w’oyoyo wakatolake Nzambi, sho pombaka tondo mbeka dia mbeya lolango lande ko l’okongodiko mbolitsha. Dikambo dia eko mete “andja one wayeta ndo nsaki yawo, koko one latsha lolango la Nzambi atodjaseka pondjo” ndo ayonga la loseno l’ololo luludi l’engenongeno wa pondjo w’omale Otungi aso wa ngandji.—1 Joani 2:17.