Etini 10
Andja w’oyoyo wa dimena efula wayoshikike Nzambi
1, 2. Kakona kayoyala l’okongo wa ta dia Armagedon mbedia kete na?
KAKONA kayeta l’okongo wa ta dia Armagedon lam’ayedia Nzambi kete na? Etena kako, nshi y’eyoyo ya lotombo yayome. Wane wayoka lo Armagedon, wane wakenya kolamelo yawo lo lowandji laki Nzambi, wayoto lo andja w’oyoyo. Nde olo wayonga l’okondo wa nkumbo y’anto lam’ayowolongola engenongeno wa mamba oma le Nzambi lee!
2 Oma lo ɔlɔmbɔyelo wa Diolelo diaki Nzambi, wane wayoka wayotate la nongosola Paradiso. Wayotshumanya welo awo dia sala elimu wayokimanyiya anto tshe ane wayonga la loseno lo nshi yako. Kete kayotate la ndjala edjaselo koliki ololo, k’ongenongeno le anto tshe.
Losembwe lambohena kolo
3. Okitshekitshelo akona w’asolo wayonga esadi eto l’okongo wa Armagedon na?
3 Tshe keso kayotshama paka oma lo elanyelo ka andja waki Satana. Shonodi tshe yatomba oma lo etemwelo wa kashi, oma lo edjaselo k’anto kana ka lowandji honga nto. Eshimu wa kashi waki Satana hodimbiya anto nto; ahole tshe wakahandjolaka sango yako wayolanyema mbala kako otoyi la andja waki Satana. Ohotokokanyiya yema: lohelele la kolo tshe la andja waki Satana layomo! Nde okitshekitshelo w’asolo lee!
4. Enya otshikitanelo one wayonga lo kene kendana la wetshelo.
4 Lo etena kako, olakanyelo wa dimena wayotomba oma le Nzambi wayohena tokanyi ta kolo ta lowandji l’anto. “Ana aye tshe wayetshama le Latuyalaka.” (Isaya 54:13) Diese ko oma lo wetshelo ako wa pudipudi w’enonyi l’enonyi, “kete kayulula [mete, NW] la ewu kaki Latuyalaka, uku atululaka ashi a wake.” (Isaya 11:9) Anto hawoteka nto akambo wa kolo, koko “ambidjashi wa kete wayeka losembwe.” (Isaya 26:9, NW) Tokanyi ndo elimu w’ololo wayonga akambo wayoshikikala lo etena kako.—Etsha 17:31; Filipi 4:8.
5. Kakona kayokome kolo ndo atshi wa kolo tshe?
5 Omaloko, odiakanelo honga nto, ndo akambo wa ngala, kana weho w’akambo w’osehe tshe hawonga nto. Ndoko onto layena paa nto oma lo akambo w’otshatsha wa kolo k’onto okina. Tukidi 10:30 mbutaka onkone ate: “Untu l’ololo hamoki pundju. Keli antu wa kolo hawutshikalaki la kete.”
Demba dia wolo di’olowanyi diambokaloyama
6, 7. (a) Paa kakona kayoshila lam’ayôlɛ Diolelo na? (b) Woho akona wakadienya Yeso lam’akinde lane la kete na?
6 Lo andja w’oyoyo, kolo tshe kakaye oma lo otombokwelo wa ntondotondo, kayoshila. Enyelo, Diolelo diaki Nzambi diayoshidiya hemo ndo lotshundu. Ɛlɔ kene kanga w’eko la demba dia wolo, koko lam’ele we lo tatshunde, washo aye hawotena dimena nto, wanyu aye wayôngɔ, atui aye hawotoka nto dimena, lowa laye la demba layonga enyanga enyanga, tini diaye dia lateyi wa demba diayolemba, ekomelo ko nyoi kotaneme.
7 Koko, kema edja nto, paa nye yakatahene oma le ambutshi aso wa ntondo yayoshila. Onde we mbohoka kene kakenya Yeso kendana la okalanganelo wa demba lo nshi yakinde lane la kete? Bible mbewoyaka ate: “Elui a weki w’antu wakayi le ndi, wakayi ndu la akanga a dikomo, tshumbi, tutshungu, nyumi, la ekonyi ekina efula. Vo [wakawaokɛ polo l’ekolo ande, NW], ku ndi akâkonoya. Okone lam’akenyi elui w’antu akanga a nyumi wamboteketa, tshumbe wambokendakenda, tutshungu wambosena, vo wakambi.”—Mateu 15:30, 31.
8, 9. Ewoya ongenongeno one wayonga lo andja w’oyoyo etena kayonga demba dia wolo di’olowanyi diambokaloyama.
8 Nde ongenongeno a woke wayonga lo andja w’oyoyo lam’ayoshila hemo yaso tshe lee! Asui ane watomba oma lo ohekoheko wa demba hoke dimena, hawotonga nto. “Ndoko onto lodjashi layota ate: ‘Dimi la hemo.’ ” “[Lo etena kako, NW], ashu w’akanga tutshungu wayosena, La atui w’akanga a puki wayodiho. [Lo etena kako, NW], akanga a tshumbi wayulimbolimbo uku peli, ndo lolemi la kanga lumi layemba l’ongenongeno.”—Isaya 33:24, NW; 35:5, 6.
9 Onde honga ongenongeno dia la pindju tshe we memo ko ndjaoka dia we eko la demba dia wolo? Onde honga ongenongeno le esombe w’anto dia mbeya one wayokalola elongolongo nto okoke okoke polo ndo koma la demba di’olowanyi oko ne diaki la Adama la Eva l’etatelo? Bible mbishaka daka ne ate: “Ku dimba di’untu ako diayuyala ashashi uku dimba dia dikenda. Ndi ayuyala uku akindi lu nshi yande y’olongo a pami.” (Jobo 33:25) Aande ongenongeno wayonga etena kayokadjema talatala ya lo washo, diango dia losala dia kimanyiya woho wa mboka, ekandjo wa akanga a dikuse, la olimu w’enganga lee! Hatotonga nto l’ohomba wa lopitadi, kana enganga ndo wane wasaka kongolo!
10. Kakona kayokome nyoi na?
10 Anto ane wayonga la demba dia wolo hawotolanga mvo nto. Eelo, hawotovokaka nto ne dia, anto hawôdiene nto la nyoi ndo ohombelo wa akambo w’olowanyi wakawaheni. “Kristo pombaka mbole polo ndo lam’ayodja Nzambi andoshi ande tshe la tshina di’ekolo ande. Ondoshi w’ekomelo wayolembiama ele nyoi.” “Ushasha a Unyashungu eli lumu la pundju.”—1 Koreto 15:25, 26; Romo 6:23; enda nto Isaya 25:8.
11. Woho akona wata Enyelo lo tshena pe dia engenongeno ene wayonga lo andja w’oyoyo?
11 Lo kene kendana la engenongeno ene wayokondja nkumbo y’anto oma le Nzambi lo Paradiso, dibuku di’ekomelo dia lo Bible mbutaka ate: “Ndi ayukitula asoi tshe lu ashu awo; nyoi hayuyala ntu, delu hadiuyala ntu, [koyanga otanda, NW], kuyanga ndjawi, kuyanga kandji. Akambu wa ntundu wambushila.”—Enyelo 21:3, 4.
Wakavu wambokalola lo loseno
12. Woho akona wakenya Yeso wolo wakandakondja oma le Nzambi wa mbolola anto na?
12 Yeso ladiko dia konola akanga a hemo la wa tshumbe, akatshe nto akambo efula. Nde akatondja ndo anto oma lo diombo. Nde akenya wolo wa mamba one wakawosha Nzambi dia mbolola anto. Onde we mbohoka kene kak’ete lam’akatshu Yeso lo luudu laki pami kimotshi kakavusha onande la womoto? Yeso akate osekaseka wakavu ate: “Ona umuntu, lambukutela nti: eto.” kakona kakatshama na? “L’etena kako, ona umuntu aketo, akakendakenda.” Lam’akawenyi kene kak’ete, anto “wakatamanya mamba, [l’ongenongeno w’efula, NW].” Takawakoke mbishe ongenongeno awo!—Mako 5:41, 42; enda nto Luka 7:11-16; Joani 11:1-45.
13. Woho akona w’anto wayolo?
13 Lo andja w’oyoyo, “eulwelu k’antu w’ololo la antu wa kolo uma lu nyoi kayuyala.” (Etsha 24:15) L’etena kako, Yeso ayoyakimanyiya la wolo wakawosha Nzambi dia mbolola wane wakavu, oko akandashikike lo eteketa ande ene ate: “Dimi leko eulwelu la lumu. One lambetewo, kuyanga ndi ayovo, [ayokalola lo loseno, NW].” (Joani 11:25) Nde akate nto ate: “Wane tshe wele lo waembo w’ohoma [wane wele lo yimba yaki Nzambi] wayoka dui diande [diaki Yeso] ko wayotomba.” —Joani 5:28, 29, NW.
14. Lam’ele nyoi honga nto, akambo akona wayonyema kame lato?
14 Ayonga ongenongeno w’efula lo andja w’otondo lam’ayokalola wane wakavu lo loseno olui l’okongo w’okina dia pomana la wakiwo wa ngandji! Kema edja nto sango ya nyoi yatoshaka kandji l’asolo le wane wa sena hayotonga nto. Lo dihole dia monga ngaso, ayonga lokadimola: waewoyelo wa anto ane wayolo wayosha ongenongeno le wakiwo wa ngandji. Omaloko, etanda honga nto, ahole washimbewo edo honga nto kana lene atowâtshumbaka, kame ndo waombo hawotonga nto!
Andja wele woladi wa mete wayoyala loko
15. Woho akona wayokotshama l’ololo tshe akambo w’omvutshi Mika ane wakewoma edja la ntondo na?
15 Woladi wa mete wayonga l’ahole tshe wodjashi anto. Ata la apohodi awo ndo ahole ane wasalawo bonge ayonga awui w’edjedja. Lande na ngaso na? Ne dia shonodi ya wedja, ya nkumbo, ndo ya waoho w’anto honga nto. L’etena kako, l’ololo tshe “wudja hawuyedia tombo tawo dia ndo la wudja ukina, kuyanga mbeka akambo wa ta ntu.”—Mika 4:3.
16. Woho akona wayolama Nzambi diaha ata monga na?
16 Daka so kokaka mambiya lo menda okondo w’onto woludi l’ata wele lo kedja akila efula ndo wahashile. Koko eko ngaso ne dia andja weko la tshina dia lowandji l’anto kame la edienge. Enda kene kayonga lo andja w’oyoyo, la tshina dia Diolelo diaki Nzambi: “Nyuyi, nyuyendi elimu wa Latuyalaka . . . [Nde ambokumiya ata polo lo tokoma ta kete, ambowela ota, ambokola dikonga, ambotshumba pusupusu ka ta lo dja, NW].”—Osambu 46:8, 9.
17, 18. Lo andja w’oyoyo, diokanelo diakona diayonga lasa anto la nyama?
17 Anto wayonga la woladi kame la wa nyama, oko woho waki l’Edena. (Etatelo 1:28; 2:19) Nzambi mbutaka ate: “Lu lushi loso, dimi layudja la nyama ya l’ukunda, fudu ya l’ulungu la diango dia yakutula dia la kete sheki dikambu diaye . . . Layuwetamiya la lutui tshitshi.”—Hosea 2:18.
18 Ki kako kayoyala la wekeeko akona? “La undu ayudjase kame la on’okoko. Koi la ona mbudi wayetama kame. Osongo wa ngombe, tambwe, la [nyama, NW] ka wata wayuyala kame, ku kiendakenda ayoyilombola.” Ndoko lushi otoyi nto nyama honga la diaaso dia mbokadja onto wâle kana nyama kina. Kanga “tambwe ayole adiyu [oko, NW] ngombe”!—Isaya 11:6-9; 65:25.
Kete yambokadimo Paradiso
19. Kete kayokadimo engo kakona?
19 Kete k’otondo kayokadimo Paradiso dia edjaselo k’anto. Dio diako diele Yeso akalake pami kimotshi kaki la mbetawo le nde ate: “We ayonga lami lo Paradiso.” Bible mbutaka onkone ate: “Oswe wa shenga la kete ya wumu wayongenangena. Kete y’ofumbo yayangasana ndo yayoto alembolembo oko osongo wa safrana. . . . Ne dia lo kete ya shenga ekedi w’ashi wayokundo, ndo akeledu wa weke l’oswe wa shenga.”—Luka 23:43, NW; Isaya 35:1, 6, NW.
20. Dikambo kuna ndjala henya anto paa nto na?
20 La tshina dia Diolelo diaki Nzambi, ndjala hohenyahenya wa miliyo y’anto nto. “Nono yayonga efula la kete. Kete ya l’ete w’akona yayongonya mbo ya nde efula.” “Etamba wa lu dikambo wayoto elua, kete yayutundja tumbatumba. Vo wayuyala la lutui tshitshi lu kete yawo.”—Osambu 72:16, NW; Ezekiyele 34:27.
21. Kakona kayonga lo dihole dia pomba luudu, kolo lo wa kartiye ya kesonawo kana lo ahole wosuka- ni laso na?
21 Wola honga nto, anto hawotohomba mvudu nto, kolo kayoshila lo tini dia ngelo dia weke kana lo wa kartiye. “Wayuhika mvudu, wayodjaseka loko. Hawukamba dikambo di’elua ku akina ndjole elua uma loko.” “Wayudjase, untu l’untu la tshina di’okodi ande wa vinyo, ndu la tshina dia utamba ande wa fingu. Ku nduku untu ayuwautsha woma.”—Isaya 65:21, 22; Mika 4:4.
22. Woho akona walimbitshiya Bible dikambo di’etshoko wayela lowandji laki Nzambi na?
22 Anto wayokondja diango so tshe, ndo dikina dioliki, lo Paradiso. Osambu 145:16 mbutaka ate: “We [Nzambi] atukhukulaka lunya laye, atulutshaka engo tshe keli la lumu.” Kema dikambo dia diambo lam’ata Bible l’onyo w’amvutshi ate: “Keli akanga a memakana wayokita kete, [ndo wayongenangena lo ki k’otamanya, NW]. . . . Antu w’ololo wayukita kete, wayudjase loko pondjo.”—Osambu 37:11, 29.
Akambo wa ntondo wamboshila
23. Woho akona wayonya Diolelo diaki Nzambi asui tshe wakeni anto na?
23 Lowandji la Diolelo diaki Nzambi layoshidiya kolo tshe kakoto lo nkumbo y’anto yediko y’enonyi nunu samalo ene wambeta. Ongenongeno wayonga nshi yako wayosombola paa nye yambena anto. Loseno hofukutana nto oma lo diohwelo dia asui wakete. Okoke okoke, tokanyi ndo elimu w’ololo ene wayonga la anto lushi tshe ayoshidiya tokanyi tshe ta kandji.
24, 25. (a) Isaya akandewoya? (b) Lande na kahombaso mbetawo dia mboho paa yakete ayonga anyanya?
24 Nzambi la tokane mete mbutaka ate: “Dimi lotsha tonga olongo w’oyoyo [lowandji l’oyoyo la l’olongo lone layole anto] la kete k’oyoyo [tshunda di’anto w’ololo]; akambo wa ntondo wayohame ndo hawotoya nto l’otema. Koko nyongenengene, nyoyale la ongenongeno wa pondjo lo kene kayangami la tonga.” “Kete tshe yambuyala la mumuya ndu la ki. [Anto, NW] wambutundo la kembu y’ongenongeno.”—Isaya 14:7; 65:17, 18, NW.
25 Oma lo ekimanyelo ka Diolelo diande, Nzambi ayokadimola eongelo k’akambo wa kolo ane wambonga edja efula. Nde ayotenya ngandji kande k’otamanya pondjo pondjo la tofukwe etshoko ene wayolemanya asui ane wakatadiene lo nshi yambeta. Ayonga tokanyi t’anyanya, endaka sho mbidja lomba lo mboho kene kakete.
26. Lande na kele Nzambi ayonya kolo tshe yakateni lo nshi ya ntondo?
26 Eko osoku mbayonya Nzambi oma lo asolo aso paa nye yambotena l’andja one. Nde mbeyaka ate: kema ekomo kakiso lo woho wakatôto kema olowanyi, ne dia takahene ohombelo ako wa kokele oma le ambutshi aso wa ntondo. Kema ekomo kaso ne dia takoto lo andja wa Satana, koko ohondonga Adama la Eva kôtsha kolo, tshike tohoto lo paradiso. La ketshi k’efula Nzambi ayonya kolo ya ntondo nye yatosoya.
27. Waewoyelo akona wakafundama edja la ntondo lo Bible wayokotshama l’ololo tshe lo andja w’oyoyo?
27 Lo andja w’oyoyo, anto w’ayonga la lotshungo lone lakewoma lo Romo 8:21, 22 (NW) onkone: “Ditongatonga dio lawo nto diayotshungo oma lo lohombo la ehondelo dia ngenangena lo lotshungo la lotombo l’ana a Nzambi. Mete sho mbeyaka one: polo ndo kakiye, ditongatonga tshe lo tetemala la kuma akumu kame ndo la sowa kame.” L’etena kako anto wayena ekotshamelo ka disambe ne: “Diulelu diaye diayi. Lulangu laye latshami La kete uku atshamalo l’ulungu.” (Mateu 6:10) Akambo w’ololo efula wayonga lo paradiso ka la kete ayonga aledi wa kene k’eta l’olongo.
[Esato wa lo lɛkɛ 23]
Lo andja w’oyoyo, esombe wayokalola elongolongo
[Osato wa lo lɛkɛ 24]
Weoho tshe wa hemo ndo wa tshumbe wayonyema lo andja w’oyoyo
[Osato wa lo lɛkɛ 25]
Lo andja w’oyoyo, wane tshe wakavu w’ayolo dia monga la loseno
[Osato wa lo lɛkɛ 26]
‘Hawoteka ata nto’
[Esato wa lo lɛkɛ 27]
Anto la wa nyama wayonga la loseno la woladi lo Paradiso
[Osato wa lo lɛkɛ 27]
‘Nzambi ayokukola lonya lande ko ayolotsha diango tshe diele la loseno’
[Osato wa lo lɛkɛ 28]
Diolelo diaki Nzambi diayonya fonu tshe y’eso lo tetemala la mena